🌝🌛🌜🌝🌛🌜🌝🌛🌝🌛🌜🌝🌛🌜🌝🌛🌝
చంద్రయాన్ - 3 చంద్రునిపై దిగింది. భారతదేశ పతాకం ఎగురవేసింది. చరిత్రాత్మక విజయం !!
ఈ సందర్భంగా...మూడు సంవత్సరాల క్రితం "వెండితెర వీడని బంధం... అందాల చందమామ" అనే పోస్ట్ ను నా బ్లాగు లో ప్రచురించిన నాకు... ఓసారి అందులోకి తొంగి చూడాలనిపించింది... అలాగే...అందాల జాబిల్లి..చందమామపై వచ్చిన సినీ గీతాల్నిమరోసారి...అందరితోపంచుకోవాలనిపించింది. అందుకే ...
వెండితెరతో గొప్ప అనుబంధాన్ని పెనవేసుకున్న వెన్నెల రేడు, జాబిల్లిగా చిరపరిచితుడు, జగమంతటికీ అందాల చందమామ-- ఈ చల్లని రాజుపై వచ్చిన మధురాతి మధురమైన సినీ గీతాలెన్నో, ఎన్నెన్నో. అసలు జాబిల్లిపై ఇలా పాటలల్లాలని కవులకు ఎందుకనిపించిందో గానీ అవన్నీ తరాలు మారుతున్నా అజరామరమై అందరి మదిలో మెదుల్తూ, జనాల నోళ్ళలో నానుతూ భాసిల్లుతూనే ఉన్నాయి. వారి కలాల నుండి అద్భుత పదజాలం జాలువారగా, దిగ్గజాలైన సంగీత దర్శకులు అత్యంత మాధుర్యం ఒలికించే స్వరాలు కూర్చగా, అంతకుమించిన మాధుర్యంతో తేనెలు చిందిస్తూ ఆలపించిన గాయనీ గాయకులు ధన్యజీవులు. ఆ మహత్తరమైన సృష్టికర్తల అద్భుత సృష్టి ఓసారి మననం చేసుకుందాం మనసారా--
వెన్నెల రాత్రి. పది గంటలు దాటినవేళ... ఆరుబయట మంచం మీద వెల్లకిలా పడుకుని ఆకాశం వైపు చూస్తుంటే బంగారు వర్ణంలో గుండ్రంగా మెరిసిపోతూ అందాల చందమామ ఆహ్లాదకరంగా దర్శనమిచ్చి మనసంతా పులకించిపోతూఉంటుంది . అదలా ఉంటే...చల్ల గాలి మెల్లగా కదిలి, వస్తూ వస్తూ దూరాన ఎక్కడనుండో మృదుమధురంగా సాగిపోతున్న తీయని రాగాల ఓ గీతాన్ని మోసుకొచ్చి వీనులకు విందు సమకూరుస్తూ ఉంటుంది . అలాంటి పాటల్లో ఓ పాట ఇదిగో--
🌷 చల్లని రాజా ఓ చందమామా
నీ కథలన్నీ తెలిశాయి
ఓ చందమామ ఓ చందమామ
అంతేనా --- అలా అలా...ఒకటా...రెండా..! ఒకదానితో ఒకటి పోటీలు పడుతూ, రకరకాలుగా సంభాషణలు జరుపుతూ, చిత్ర విచిత్రమైన భావనలతో మది నుక్కిరిబిక్కిరి చేసే మధుర గీతాలు మరెన్నో !! ఓసారి మననం చేసుకుంటే చాలు....మరుక్షణం ఆ పాట మన మనోఫలకం మీద ప్రత్యక్షమైపోతుంది.. కావాలంటే... ఈ పాటల్ని చూడండి మరి !
మిస్సమ్మ సినిమా లో ఏ. ఎం. రాజా, లీలగారలు పాడిన ఈ పాట చూడండి.
🌷 నాతో తగవులు పడుటే
అతనికి ముచ్చట లేమో
ఈ విధి కాపురమెటులో
నీవొక కంటను గనుమా
రావోయి చందమామ
మా వింత గాధ వినుమా!
-- భార్యాభర్తల మధ్య తగవులు తీర్చటానికి కూడా ఆకాశంలోని చందమామను పిలుస్తారన్న మాట !పాట వింటూ ఉంటే ఆ పాటలో నటించిన...కాదు కాదు జీవించిన...మన అన్న ఎన్టీఆర్, మహానటి సావిత్రి కనులముందు సాక్షాత్కరించకమానరు. అప్పుడు టీనీజీలో ఉన్న సావిత్రిని, ఆ అమాయకపు ముఖారవిందాన్ని ఓసారి గుర్తుకు తెచ్చుకోండి...
🌷 చక్కనయ్యా చందమామ ఎక్కడున్నావూ
నీవు లేక చుక్కలన్నీ బిక్కు మన్నాయి
-- చందమామ కనిపించక బిక్కమొహం వేశాయి చుక్కలన్నీ... భార్యాబిడ్డలు చిత్రంలో చిన్నపిల్లలు వాళ్ళ అన్నయ్యను వెతుకుతూ పాడే పాట అన్న మాట. చిన్నపిల్లలకు సైతం చందమామే గుర్తొచ్చాడు చూశారా..!
🌷 చందమామా... అందాల మామ
నీ ఎదుట నేను... నా యెదుట నీవు
మా ఎదుట ఓ మామా ఎప్పుడుంటావో?
-- ఒకరినొకరం మనమిద్దరమే చూసుకుంటున్నాం గానీ... మా ఇద్దరి ఎదుట నీవు ఎప్పుడు ఉంటావు? అని ప్రశ్నిస్తున్న ఓ కన్నె మనసు. గాయని సుశీల గారు... ఆ కోకిల స్వరం ఆమెకే సొంతం.. అందుకే గానకోకిల అయింది మరి!!
🌷 చందమామ బాగుంది చూడు
చల్ల గాలి వీస్తోంది చూడు
ఆపైన.. ఆపైన.....
నువ్వు నా కళ్ళలో తొంగి చూడు..
-- నాయిక అమాయకుడైన కథానాయకుని ఆటపట్టిస్తూ ఇలా పాడుతుంది మరి! గానము: ఘంటసాల, సుశీల. అప్పటికి ఎంతో సీనియర్ నటి అయిన జమున గారు కృష్ణగారితో నటించడతో ఆయన మోములో సహజంగానే అమాయకత్వం కనిపించడం గమనించవచ్చు..
🌷 చందమామ వస్తున్నాడూ
చందమామ వచ్చేను..
నిన్ను నన్ను చూసేను
ఎక్కడైన దాగుందామా
చక్కనైన చిన్నదానా....
--తమని చూసే చందమామ చూపుల్ని తప్పించుకోవడానికి ఎక్కడైనా దాగుందామంటూ నాయకుడు నాయికతో చిలిపిగా అనడం - గానం: ఘంటసాల, సుశీల
---అంతేనా...! తమ బాధల్ని, సమస్యల్ని సైతం చందమామతో చెప్పుకునే వారు ఉంటారన్నమాట ఈ విధంగా--
🌷 మామా.. చందమామా.. వినరావా నా కథ
వింటే.. మనసు ఉంటే... కలిసేవూ నా జత
-- సంబరాల రాంబాబు-- లోని ఈ పాట విని తీరాల్సిందే.
🌷 నిండు చందమామ.. నిగనిగలా భామ
ఒంటరిగా సాగలేవు... కలసిమెలసి పోదామా.. ఓ..
-- జేసుదాస్ పాడిన ఈ పాట ఎన్నిసార్లు విన్నా తనివి తీరదు. విన్న వాళ్లకు తెలుస్తుంది ఆ స్వరంలోని మాధుర్యం..
🌷 చందమామ రావే... జాబిల్లి రావే
అమ్మాయి అలిగింది... అలక తీర్చి పోవే....
-- చెలి అలక తీర్చడానికి కూడా చందమామ రావాల్సిందే నా? బలిపీఠం లో శోభన్ బాబు, శారద గుర్తొచ్చారా..!
-- గానం: సుశీల, రామకృష్ణ
---- తను ప్రేమించిన వాడు ఎంతో ఉన్నతుడు. తానేమో కడు బీద. ఈ పాట చూడండి--
🌷 నీలాల నింగి మెరిసి పడే నిండు చందురుడా
నిరుపేద కలువ వేచెననీ మరిచిపోకుమా
-- గానం: పి. సుశీల చిత్రం.. గండికోట రహస్యం
🌷 చందమామ రావే జాబిల్లి రావే
కొండెక్కి రావే గోగుపూలు తేవే...
-- ఓ చిన్నపాప రాత్రివేళ చందమామను పిలుస్తూ ఆనందంగా పాడుతుంది సిరివెన్నెల సినిమాలో. ఆతర్వాత ఆ చిన్నపాపే సీతారామయ్యగారి మనవరాలై పెద్ద హీరోయిన్ ఐపోయిందిమరి!!
🌷 చందురుని మించు అందమొలికించు
చిట్టిపాపాయి జో... నిన్ను కన్నవారింట
కష్టముల నీడ తొలగిపోయేనులే...
-- చందమామను మించిన అందం నీదంటూ పాపకు పాడే జోల. రక్తసంబంధం-- సినిమాలో సుశీల ఆలపించిన విషాద గీతిక...
---- జానపదసొగసులు రంగరిస్తూ లయబద్ధంగా సాగే ఈ పాట భక్త కన్నప్పలో సుశీల, రామకృష్ణ పాడారు.
🌷 అత్తారింటికి దారేదమ్మ సందమామ
ఆమడ దూరం ఉందోలమ్మా సందమామ
ఆమడదూరం అయినా గానీ ఎల్లాలమ్మా.. వుయ్..
ఎన్నీయల్లో ఎన్నీయల్లో సందమామ..
సిన్నాదానీ మనువూ సెయ్యి సందమామ...
--- చందమామకు మరో పేరు జాబిల్లి. అలా సంబోధిస్తూ వచ్చిన పాటలకూ కొదవలేదు.
🌷 జాబిల్లి చూసేను నిన్ను నన్నూ
ఓయమ్మో, నీకింత సిగ్గేల బాలా రావా...
నను చేర రావా......
-- మహాకవి క్షేత్రయ్య లోని ఈ పాట సుశీల, రామకృష్ణ మధురాతి మధురంగా గానం చేశారు.
🌷 జాబిలమ్మ నీకు అంత కోపమా
జాజిపూల మీద జాలి చూపవా.....
-- అంటూ ఓ ప్రియుడు తన ప్రేయసిని జాబిలిగా వర్ణిస్తూ పాడుతున్నాడన్నమాట!
-- పెళ్లి చిత్రంలో ఎస్. పీ. బాల సుబ్రహ్మణ్యం గానం చేసిన పాట ఇది.
🌷 జాబిల్లి వచ్చాడే పిల్ల నిన్నెంతో మెచ్చాడే
నీకూ మనసిచ్చా డే, ఎదురుచూస్తున్నాడే పిల్లా...
-- తననే జాబిల్లిగా అనుకుంటూ మరదలితో సరసాలాడుతున్నాడు ఓ చిలిపి బావ....
-- అల్లుడే మేనల్లుడు-- సినిమాలో ఘంటసాల పాడిన పాట ఇది.
🌷 జాబిలితో చెప్పనా...జామురాతిరి
నీవు చేసిన అల్లరి, రోజా...
--వేటగాడు--చిత్రంలో సుశీల, బాలసుబ్రమణ్యం హుషారుగా పాడిన ఈ పాట అప్పట్లో జనాల్ని ఎంతగా ఉర్రూతలూగించిందో ఆ తరం ప్రేక్షకులకందరికీ విదితమే. ఇందులో ఎన్టీఆర్, శ్రీదేవి స్టెప్పులు స్పెషల్ ! ఆ డ్యూయట్ కోసమే పదేపదే సినిమా చూసినవాళ్ళున్నారంటే నమ్మితీరాలి..!
🌷 అలా మండిపడకే జాబిలీ
చలీ ఎండ కాసే రాతిరీ
దాహమైన వెన్నెల రేయి
దాయలేను ఇంతటి హాయి
ఎలా తెలుపుకోనూ ప్రేమనీ
ఎలా పిలుచుకోనూ రమ్మనీ.....
-- ఓ అమ్మాయి తన ప్రేమను సఖునికి ఎలా తెలుపుకోవాలో తెలియడం లేదంటూ జాబిలితో మొర పెట్టుకునే ఈ పాట 'జాకీ ' చిత్రంలో జానకి పాడినది.
🌷 పగడాల జాబిలి చూడు
గగనాన దాగెను నేడు
కోటి అందాల నా రాణి
అందిన ఈ రేయి...
ఎందుకులే నెలరేడు...
-- ఇక్కడ నాయకుడు ఘటికుడు. మరెంతో చతురుడు.
చెలి చెంతనుండగా నీవెందుకు అంటున్నాడు జాబిలితో.
అక్కినేని నాగేశ్వరరావు, జమునల కాంబినేషన్లో ఈ మెలోడియస్ సాంగ్ అప్పట్లో సూపర్ హిట్...
-🌷 చందమామ అందినరోజు ...
బృందావని నవ్విన రోజు....
తొలివలపులు చిలికిన రోజు...
కులదైవం పలికిన రోజు....
భలేమంచిరోజు...పసందైన రోజు...
వసంతాలు పూచే నేటిరోజు....
--- జరిగిన కథ లో ఘంటసాల గానం మరువగలమా !
చందమామతో ఈ కబుర్ల పాటలు పాత సినిమాల్లో ఎక్కువగా కనిపిస్తాయి( వినిపిస్తాయి). కొత్త సినిమాల్లో అయితే...'మురారి' లో...
చందామామ చందామామ కిందికి చూడమ్మా
ఈ నేల మీద నెలరాజును చూసి నివ్వెరపోకమ్మా..
అందులో మహేష్ బాబును చూసి నిజంగానే చందమామ నివ్వెరపోతాడేమో అన్నట్లుగా ఉంటుంది ఆ దృశ్యం..ఆ అద్భుత చిత్రీకరణ...!
తారలు దిగివచ్చిన వేళ.. మల్లెలు నడిచొచ్చిన వేళ..
చందమామతో ఒక మాట చెప్పాలి..ఒక పాట పాడాలి
ప్రేమాభిషేకంలో ఈ పాట శ్రీదేవిని మరోసారి తలపిస్తుంది కదా!
--- ఇలా చెప్తూ పోతుంటే కోకొల్లలుగా తడుతూనే ఉంటాయి అందాల చందమామ కబుర్లు, పాటలు. ఏదేమైనా ఈ పాటలన్నీ చూస్తుంటే, వెండితెరకూ ఆకాశంలో చందమామకూ ఏదో అవినాభావ సంబంధం ఉన్నట్టుగా అనిపించడం లేదూ.....
చంద్రయాన్ విజయం తర్వాత... ఈ పాటలన్నీ గుర్తొచ్చాయి...నేను ప్రస్తావించనివి ఇంకెన్నో ఉంటాయి.. ఈపాటికి మీకు మరికొన్ని మదిలో మెదిలే ఉంటాయి..
చివరగా రాసిన కవులకు, స్వరపరిచిన సంగీత దర్శకులకు ఇంకా వారి మధుర గానంతో చరితార్థులు, చిరస్మరణీయులు అయిన గాయకులకు మనఃపూర్వక నమస్సుమాంజలులు. 🙏
🌛🌜🌝🌛🌜🌝🌛🌜🌝🌛🌜🌝🌛🌜🌝🌛
