చిన్నారి పజిల్స్.. మాటల ఆట...

 చిన్నారి పజిల్స్ 🙂( సరదాగా కాసేపు )

( ఈనాడు ' హాయ్ ! బుజ్జి !!' లో ప్రచురితం )

నిజం తెలుసుకుంటే...బ్రతుకంతా సంబరమే...

🥀🐦🥀🐦🥀🐦🥀🐦🥀🐦🥀🐦🥀🐦🥀

తొంగి చూడకు గతంలోకి...

అక్కడంతా చీకటి !!

కమ్ముకున్న మేఘాల దాగి

తడి ఆరని కన్నీటి తడి...

తరచి తరచి వగచితివో... 

మరింత అలజడి...

అందులో... 

మురిపిస్తాయి..మైమరిపించే 

సందడులు కొన్ని..

మిణుకు మిణుకుమంటూ 

కొద్ది క్షణాలే అవన్నీ...

మరుక్షణమే మాయమై

మళ్లీ మొదలు...వేధిస్తూ 

జ్ఞాపకాల సుడిగాలులు... 

అందుకే... 

చూడకు గతంలోకి...

అక్కడంతా  చీకటి...!!

"వేదన కొంత... వెలుతురు కొంత...

ఇంతే కదా...జీవితమంతా...!"

మేఘాల మాటున దాగిన ఆ తడి...

మండుతున్న నీ గుండెను

సేద దీర్చే పన్నీటి జడి అనుకో !!

నిజం తెలుసుకుని సాగిపో...

ముందుకు...మున్ముందుకు...

ఆపై...అంతా వెలుగే...

బ్రతుకంతా సంబరమే !!

🥀🐦🥀🐦🥀🐦🥀🐦🥀🐦🥀🐦🥀🐦🥀

 

కొత్త అమ్మ కాదు.. చిన్నమ్మ అసలే కాదు.. సొంత అమ్మే... !( కథ )

                                             ~ రచన: యం. ధరిత్రీ దేవి 

"వీళ్లేనా శరణాలయంలో చేర్చాలనుకుంటున్న పిల్లలు?" 

ఎనిమిదేళ్లలోపు వయసున్న పాప,  బాబు లను చూస్తూ అడిగింది అనాధ శరణాలయం నిర్వాహకురాలు వసుంధర. 

" అవునమ్మా... " 

 ఆ పిల్లల నాయనమ్మ, తండ్రి ఇద్దరూ ఒకేసారి బదులిచ్చారు. 

" చాలా చిన్న పిల్లలు. ఇంతకూ  ఎందుకు చేర్చాలనుకుంటున్నారు? తండ్రి ఉన్నాడు. నాయనమ్మవు నీవూ  ఉన్నావు.. వీళ్ళ బాగోగులు చూడ్డానికి మరో పెళ్లి కూడా చేశావు నీ కొడుక్కి.. ఇందరుండగా... వీళ్ళు అనాధలెలా అయ్యారు?... "

 భార్య చనిపోయిన ఆర్నెళ్లకే మళ్లీ మనువాడిన అతన్ని చూస్తూ అడిగింది వసుంధర. ఆ సూటి ప్రశ్నలకు క్షణం మాట్లాడలేదు ఇద్దరూ. 

" నిజమేనమ్మ.. కానీ..ఎంతైనా సవతి తల్లి.. కన్నతల్లిలా ఎలా చూస్తుంది.. ! అందుకే... "

 తల పంకించి, 

" ఆమె వచ్చి ఎన్నాళ్ళయింది? "

" నెల దాటిందమ్మ... "

" నెల రోజులకే ఆమె వీళ్ళని సరిగా చూడదని నిర్ణయించుకున్నావా ?.  "

 చాలా 'కూల్' గా అడగడానికి ప్రయత్నించింది వసుంధర. 

" అవునమ్మ.. ఎందర్ని చూడ్డం లేదూ.. !"

" అలాంటప్పుడు కొడుక్కి పెళ్ళెందుకు  చేశావు? నీవే చూసుకోవచ్చు గదా, సొంత నాయనమ్మవేగా.. "

" అయ్యో అమ్మ ! నా కొడుకు వయసెంతని?  పైగా రేపో మాపో  పోయేదాన్ని నేను... వీళ్లను ఎన్నాళ్లని చూడగలను?  వంటా గింటా... మిగతా అన్ని పనులూ  నాతో అవుతాయా?... "

" కదా.. అవేవీ  నీతో కావు. అవన్నీ చేయడానికి ఓ ఆడది కావాలి. బయటి వాళ్లు చేయలేరు. చేయరు. ఇంటి మనిషే కావాలి. అందుకు నీ కొడుక్కి పెళ్లే చేయాలి. తప్పదు..."

" అంతే కదమ్మా..."

" అంతవరకూ  ముక్కూ  మొహం ఎరగని ఆమె నుండి అంత ఆశిస్తున్నావు... సరే.. బాగుంది.. నీ ఇంటికొచ్చి, అంతవరకూ  ఏ బంధం  లేని మిమ్మల్ని సొంత వాళ్లుగా, నీ కొడుకు పిల్లల్ని సొంత పిల్లలుగా చూడాలనుకుంటున్నావు నీవు ! అలాంటప్పుడు ఆమెను  మీరూ  మీ సొంత మనిషిలా చూసుకోవాలి కదమ్మా.... "

"................"

" మీరంతా కోరుకున్న విధంగా ఆమె ఉండాలంటే... ఆమె కోరుకున్న విధంగా మీరూ  ఉండాలి కదా ! నీ కొడుక్కి  రెండో పెళ్లి కావచ్చు... ఆమెకు మొదటిదే కదా! ఎన్ని ఆశలతో తన వాళ్లను వదిలి నీ ఇంట్లో అడుగు పెట్టి ఉంటుంది !.."

"................"

".. భార్యను పని చేయడానికే  వచ్చిన దానిలా, మీ అవసరాలు తీర్చడానికే వచ్చింది అన్నట్లుగా ప్రవర్తిస్తే.. మీమీద  తనకి ప్రేమాభిమానాలు ఎలా పుట్టుకొస్తాయి?  చెప్పు బాబూ, నీ భార్యను ప్రేమగా చూసుకుంటున్నావా ? "

 అతని వైపు చూస్తూ ప్రశ్నించింది వసుంధర. తల దించుకున్నాడతను. 

".. చూడండీ, పరిస్థితులకు తలఒగ్గే ఏ ఆడపిల్లయినా ఇలాంటి పెళ్లికి సిద్ధపడుతుంది. అనవసర భయాల్తో, అనుమానాలతో ముందుకుముందే ఆమె గురించి ఓ నిర్ణయానికి రాకండి. ఇంకా ఇంట్లో అడుగుపెట్టక ముందే ఆమె పట్ల ఓ రకమైన ఏహ్యభావాన్ని పిల్లల్లో కలిగించి వాళ్ల పసి మనసుల్ని విషపూరితం చేస్తే ఎలా? "

ఇద్దరిలోనూ చిన్నగా అలజడి !

"... కొత్త ఇంటికి, కొత్త మనుషుల మధ్యకు వెళ్తున్నాను, వాళ్లు నన్ను ఎలా చూసుకుంటారో అన్న భయం, అనుమానం ఆమెకూ  ఉంటాయి కదా ! తన వైపు నుంచి కూడా ఆలోచించాలి గదమ్మా... "

".. మేమేదో అనుకుని వస్తే, ఈవిడేంటి నీతి బోధలు చేస్తోంది మాకు.. అనుకోమంటే... ఒక్క మాట చెబుతాను. ఆ తర్వాత మీ ఇష్టం... "

ఇద్దరూ తలెత్తి  ఆమె కళ్ళల్లోకి చూశారు. 

" మీ పిల్లల్ని సరిగా చూసుకుంటూ ఉన్నదా లేదా అన్న విషయం కొద్దిరోజులపాటు పక్కనబెట్టి, ముందు మీరు ఆమెను ప్రేమగా, ఆప్యాయంగా చూసుకోవడం మొదలెట్టండి ఈరోజు నుండే... ఆమెను మీ సొంత మనిషిలా చూస్తూ, నీకు మేమున్నామనే భరోసా, ధైర్యం కలిగించండి. అప్పుడు.. అప్పుడు.. మీరేదయితే ఆమె నుండి ఆశిస్తున్నారో అది ఖచ్చితంగా మీకు అంది  తీరుతుంది..... "

"..................... "

".. మన ప్రవర్తనని బట్టే ఎదుటి వాళ్ళ ప్రవర్తన ఉంటుంది. మనం ఏది ఇస్తే అదే తిరిగి వస్తుంది. పెద్దదానవు..నీకు నేను చెప్పేదేంటి! ... పరాయింటిది అన్న ఆలోచన మాని,...అమ్మలా  ఆమెను అక్కున చేర్చుకో.. భర్తగా నీ గుండెల్లో చోటివ్వు బాబూ.. అప్పుడు నీ పిల్లలకు సవతి తల్లి కాదు.. కన్నతల్లే  దొరుకుతుంది.వాళ్లు ఎప్పటికీ అనాధలు కారు.."

"...కొత్తఅమ్మ కాదు.. చిన్నమ్మ అసలే కాదు, వాళ్లకెప్పుడూ ఆమె అమ్మే ! అలా ఉండాలంటే ముందు మీరు మారండి... "

తల్లీకొడుకులిద్దరూ రెండు చేతులూ జోడించి  నమస్కరించారు. ఇంతవరకూ వాళ్లకు తోచని కొత్త విషయం బోధపడింది.వాళ్ళ కళ్ళల్లో నీటి సుడులు...!!

మొహాల్లో అవ్యక్త భావన !!

🙏🙏🙏🙏🙏🙏🙏🙏🙏🙏🙏🙏🙏🙏🙏🙏🙏🙏

ఇంద్రధనుస్సు...The Rainbow.. TWO...మరోసారి

 *జనవరి  * 2024

అందరికీ నూతన సంవత్సర శుభాకాంక్షలు 🌷

**************************************

ఈనాటి 'ఇంద్రధనుస్సు' లో....

••••••••••••••••••••••••••••••••••••••••••••••••••••

*    పెద్దల మాట            ----   బాలరసాలసాల...

*   స్వాగతం 2024        ----   సర్వజనుల పండగ✍️  

*   స్ఫూర్తి                      ----   పాటల్లో పాఠాలు 

*   మనసు పలికిందిలా ----   ఆరనీకుమా.... ✍️

*   😄😊😛😁             ----   సరదాగా ఓ నిమిషం 

*   చిన్నారి పజిల్స్        ----   వాక్యాల్లో వాహనాలు✍️

*   మరిన్ని                    ----   విదేశాల్లో వివాహాలు...? 

•••••••••••••••••••••••••••••••••••••••••••••••••••

                                      నిర్వహణ:యం.ధరిత్రీ దేవి               *****************************************

                 పెద్దల మాట  

 శ్రీనాథుడు, పోతన...ఇద్దరూ గొప్ప కవులే. తెలియనివారెవరుంటారు చెప్పండి...!k ఒకటే తేడా...శ్రీనాథకవి తన కావ్యాలను మహారాజులకు అంకితమిచ్చి వారు బహూకరించే ధనరాశులతో  విలాసవంతమైన జీవితాన్ని అనుభవిస్తూ ఉంటాడు. పోతనామాత్యుడు తద్భిన్నం...వ్యవసాయం చేసుకుంటూ భార్యాబిడ్డల్ని పోషించుకుంటూ ఉంటాడు. 

" ఎందుకిలా కష్టపడతావు? నీ కావ్యాలను నాలాగా రాజులకర్పించి సుఖ జీవనం సాగించవచ్చు కదా..!"

అన్న శ్రీనాథునితో పోతనామాత్యుడు ఒకానొక సందర్భంలో అన్న మాటలివి... పద్య రూపంలో....

🌷

బాలరసాలసాల నవపల్లవ కోమల కావ్య కన్యకన్

గూళలకిచ్చి అప్పడుపు కూడు భుజించుట కంటె 

సత్కవుల్ హాలికులైననేమి  కందమూల 

కౌద్దాలికులైన నేమి నిజదార సుతోదర పోషణార్థమై 🌷

     " గున్నమామిడి చెట్టుకు పూసిన లేత చివుళ్ళలా కోమలమైనట్టి కావ్య కన్యకను అమ్ముకుని ఆ పడుపు కూడు తినడం కంటే నిజమైన కవులు తమ భార్యా  బిడ్డల ఉదర పోషణ కోసం నాగలి పట్టిన రైతు లయినప్పటికీ,అటవీ ప్రాంతంలో దుంపలు, పుట్ట తేనెలతో జీవించు వారైనప్పటికీ తప్పు లేదు....."

   పోతనగారి ఔన్నత్యం, నిరాడంబరత ప్రస్ఫుటంగా తెలియడం లేదూ ఇందులో..!! ఆతరం వాళ్లలో ఈ పద్యం విననివారు బహుశా అరుదనుకుంటాను...ఓసారి మననం చేసుకునే ప్రయత్నం మాత్రమే ప్రస్తుతం నేను చేస్తున్నది...

~~~~~~~~~~~~~~~~~~~~~~~~~~~~~~~~~~   🌷 స్వాగతం 🌷సర్వజనుల పండగ 🐦 ✍️

  *ప్రభాతవేళ ! ప్రభాకరుని కిరణాలు భూమాతను సోకుతున్న వేళ ! తల్లి పొత్తిళ్ల  దాగిన చిరు మొగ్గల  లేలేత  పూరేకలు మెల్లి మెల్లిగా విచ్చుకుంటూ, పసిపాప నవ్వును తలపిస్తున్న వేళ ! సవ్వడి సేయక ఏతెంచిందిగా...నూతన సంవత్సరం !!

     తనకేం తెలుసు! జగమంతా సంబరాలు చేసుకుంటూ, కేరింతలు కొడుతూ, జేజేలు పలుకుతూ, వేయి కళ్ళతో ఎదురు చూస్తూ...అట్టహాసంగా, ఉత్సాహంగా, ఉల్లాసంగా... గత రాత్రి నుండీ నిద్ర మాని మరీ తనకోసం స్వాగత సన్నాహాలు చేస్తున్నారని !!

   ప్రతీ జనవరికీ మరల మరల... తిరిగి తిరిగి వస్తున్నా...ఎందుకోమరి... అందరికీ అంత  ఆనందం!అంత ఎదురుచూపులు !! ఇంతా చేసి.. అదంతా ఒక్కరోజే...! ఆ తర్వాత అంతా మామూలే...అంతే ! అదో ఆనవాయితీ ! అదో సంప్రదాయం! అందరూ కలిసి కొద్దిసేపు అన్నీ మరిచి... ఆడుతూ పాడుతూ, ఊసులాడుకుంటూ, సరదాగా నవ్వులు కురిపిస్తూ...!ఓస్ ! మంచిదేగా!!

   ఎన్నో పండుగలు చేసుకుంటాం.. కొన్ని మన ఇంటికే  పరిమితం.. కొన్ని కొందరికే  పరిమితం.. కొన్నేమో.. దేశానికి మాత్రమే పరిమితం. కానీ ఇది మాత్రం సరికొత్త పండుగ..! అందరికీ చెందిన పండుగ బహుశా ఇదొక్కటేనేమో!! కుల మతాలకు తావివ్వని, హద్దులూ  సరిహద్దులూ ఎరగని, ఆంక్షలు, ఆక్షేపణలూ లేనిది !! సర్వజనుల పండగ ఇది!🙂అదిగో ! నూతన సంవత్సర ఆగమనం!! ఆహ్వానిద్దాం... ఆనందిద్దాం..

      💐🙋‍🙂 HAPPY NEW YEAR 💐🙋‍🙂

                                2024

~~~~~~~~~~~~~~~~~~~~~~~~~~~~~~~~~~~~~~               స్ఫూర్తి ✍️

గొప్ప వ్యక్తులు చెప్పిన మాటలే కాదు... గమనిస్తే, కొన్ని సినీ గీతాలు కూడా ఎంతో ప్రేరణనిస్తుంటాయి..కదా !

🥀

    కడలి నడుమ పడవ మునిగితే కడదాకా ఈదాలి 

    నీళ్లు లేని ఎడారిలో కన్నీళ్ళైన తాగి బతకాలి 

    జగమంతా దగా చేసినా చిగురంత ఆశను చూడు 

🥀   

    చెమట నీరు చిందగా నుదుటి రాత మార్చుకో 

    మార్చలేనిదేదీ లేదని గుర్తుంచుకో 

    పిడికిలే బిగించగా చేతిగీత మార్చుకో 

    మారిపోని కథలే లేవని గమనించుకో 

    తోచినట్టుగా అందరి రాతలు బ్రహ్మే రాస్తాడు 

    నచ్చినట్టుగా నీ తలరాతను నువ్వే రాయాలి 

    నీ సంకల్పానికి  ఆవిధి సైతం చేతులెత్తాలి 

🥀

    అనుకున్నామని జరగవు  అన్ని

    అనుకోలేదని ఆగవు కొన్ని

    జరిగేవన్నీ మంచికనీ  

    అనుకోవడమే మనిషి పని...

--- ఇవి కొన్ని మాత్రమే. ఇంకా.. చాలా..చాలా ఉంటాయి... గుర్తు తెచ్చుకుంటే..!

~~~~~~~~~~~~~~~~~~~~~~~~~~~~~~~~~~

  *   మనసు పలికిందిలా 🌄✍️

ఆశాదీపం ఆరిపోనీకు...

-------------------------

    కలిమి పోయిందా !

    కలవరపడకు...

    కష్టపడితే కలిసొస్తుంది...

    బలిమి పోయిందా !

    బాధపడకు....

    బతుబండేమీ ఆగిపోదు... 

    ఆరోగ్యం దిగజారిందా !

    దిగులు పడకు...

    బాగయ్యే మార్గాలున్నాయి...

    వెతుకు....అయితే...

    ఆశ ఆవిరైపోయిందా....!!

    నీవు జీవన్మృతుడవే సుమా... 

    ఆదీపం ఆరిపోనీకు ఎప్పటికీ....

    ఆశాజీవికి అపజయమెక్కడిది !

 మేలుకో...మిత్రమా!!👍           ~~~~~~~~~~~~~~~~~~~~~~~~~~~~~~~~~~~~~

🤗😊😄😇 సరదాగా ఓ నిమిషం... 

వెంగళప్ప : అప్పర్ బెర్త్ దొరికిందేమో... రాత్రంతా నిద్ర లేదు.

మిత్రుడు : పోనీ.. కింది బెర్త్ వాళ్ళను రిక్వెస్ట్ చేసి బెర్త్ మార్చుకోవాల్సింది... 

వెంగళప్ప : అడుగుదామనే  అనుకున్నా. కానీ, రాత్రంతా చూసినా బెర్త్  ఖాళీగానే ఉంది...

😛

ఇంటావిడ ( ఫోనులో ) : కాలింగ్ బెల్ పని చేయట్లేదని నిన్న ఫోన్ చేశాను. వస్తానని చెప్పి మీరు రాలేదు..? 

ఎలెక్ట్రీషియన్ : నిన్ననే వచ్చాను. కానీ, ఎన్నిసార్లు బెల్లు కొట్టినా మీరు తలుపు తీయలేదు...🤔

~~~~~~~~~~~~~~~~~~~~~~~~~~~~~~~~~~~~

  *                చిన్నారి పజిల్స్ 🧒🙎?  ✍️

( ఈనాడు 'హాయ్!బుజ్జి!!' లో  ప్రచురితం )

ఏమిటీ ! చిన్నపిల్లల్లా.. ! అనుకుంటున్నారు కదూ! నిజమే... చిన్నపిల్లలు పూరించాల్సినవే... కానీ, వీటిని రూపొందించే 'ప్రాసెస్' లో కాస్త ఆలోచించాల్సిందే నండోయ్... కావాలంటే, ఓ రెండు వాక్యాలు ప్రయత్నించి చూడండి.బోలెడంత కాలక్షేపం కూడ🙂ఏమంటారు!

~~~~~~~~~~~~~~~~~~~~~~~~~~~~~~~~~~~~~~

      *      మరిన్ని ••••

   ప్రధాని నరేంద్ర మోదీ ఇటీవల 'మన్ కీ బాత్' కార్యక్రమంలో ఓ ఆసక్తికర విషయాన్ని ప్రస్తావిస్తూ... కొంతమంది సంపన్నులు విదేశాల్లో వివాహాలకు మొగ్గు చూపుతుండడంపై ఆందోళన వ్యక్తం చేశారు. భారత్ లో పరిణయం (wed in India) ప్రచారం ప్రారంభించాలని సంపన్న పారిశ్రామిక కుటుంబాలను ఆయన కోరారు. వీరిలో  క్రీడా, రాజకీయ, సినీ రంగాల ప్రముఖులు ఎక్కువగా ఉంటున్నారు. కారణాలు అన్వేషిస్తే....

• వ్యక్తిగత గోప్యత

• స్వేచ్ఛ

• బంధుమిత్రులతో నచ్చినట్లుగా గడివే వీలు 

• భద్రతాపరమైన సమస్యలు పెద్దగా లేకపోవడం

   పై కారణాలన్నింటి వల్ల వివాహ నిర్వహణ సులభతరంగా ఉంటుందన్నది వారి ఆలోచన..! కానీ దీనివల్ల ఖర్చు  అయితే తక్కువ ఏమీ కాదట !! ఈ సందర్భంగా వివాహం కోసం చేసే ఖర్చంతా మనదేశంలోనే జరిగితే దేశ ఆర్థిక వ్యవస్థకు మేలు జరుగుతుందని ప్రధాని అభిప్రాయపడ్డారు. 

    ఇదంతా  పక్కన పెడితే... ఇటీవలి  కాలంలో సంపన్నులతో పాటు సామాన్యులు  కూడా పెళ్లిళ్ల కోసం పెడుతున్న ఖర్చు తక్కువగా  ఏమీ ఉండటం లేదు... పులిని చూసి నక్క వాత పెట్టుకున్నట్లుండే ఈ ధోరణి గురించి కాస్త ఆలోచిస్తే బాగుంటుందేమో !!

<><><><><><><><><><><><><><><><><>

             అందరికీ ధన్యవాదాలు 🙏

<><><><><><><><><><><><><><><><><              

      

ఊరంతా సంక్రాతి...సందడే సందడి...

సంక్రాంతి శుభాకాంక్షలు 

🦋🥀🦋🥀🦋🥀🦋🥀🦋🥀🦋🥀🦋🥀🦋🥀🦋

భోగి...సంక్రాతి... కనుమ...

ముచ్చటగా మూడురోజులు...

మురిపిస్తాయి...మైమరపిస్తాయి... 

మగువలు..ముద్దుగుమ్మలు... 

మెచ్చే సంబరాల  సంక్రాతి...

ఇంటి ముంగిట మెరిసే రంగోళి... 

ముద్దబంతులతో పోటీ...!

గొబ్బెమ్మల అందాలు... 

నట్టింట ధాన్యరాశులు... 

రైతన్నల కళ్ళలో కోటి ఆశలు !!

వంటలు.. పిండివంటలు... 

హడావుడి చేసే అమ్మలక్కలు... 

అల్లరి చేసే చిన్నారులు ...!!

బంధువుల అచ్చట్లు ముచ్చట్లు... 

లోకాభిరామాయణాలు.... 

సందడే సందడి....!!అంతేనా !

గణగణ గంటల బసవన్నలు.. 

హరిదాసుల ఆగమనాలు... 

నూతనవస్త్రాల గరగరలు.. 

అదిగో...!కొత్త సంవత్సరంలో తొలి పండగ !

తియ్యతియ్యని పలకరింపులు...

అందరినీ అలరించ సరికొత్త ముస్తాబులు 

చేసుకుని విచ్చేసిందిగా...సంక్రాతి  !

అందుకోండి  అందరూ శుభాకాంక్షలు🌷

తిరిగి అందరికీ అందించండి ఆప్యాయతలు 🙂

ఇంతులార ! పూబంతులార !!

రారండీ..రారండీ....

గొబ్బీయల్లో...గొబ్బీయల్లో...

పాడుదాం... ఆడుదాం ... 🤗

🦋🥀🦋🥀🦋🥀🦋🥀🦋🥀🦋🥀🦋🥀🦋🥀🦋

ముగ్గుల ముచ్చట్లు..!! కథ కాని ఓ కథ (సరదాగా కాసేపు )

💠🌸💮🌸💮🌸💮🌸💠💮🌸💮🌸💮🌸💮💠

                                             ~~ యం. ధరిత్రీ దేవి ~~

   ఇంకా పూర్తిగా తెల్లారలేదు. ఇంటి ఇల్లాలు ఇందుమతి తలుపు తీసుకుని నిద్రకళ్ళతోనే మూలనున్న చీపురుకట్ట దొరకబుచ్చుకుని బయటి గేటు తెరిచింది. నిన్న...'భోగి' పండుగరోజు వేసిన రంగవల్లి చెక్కుచెదరక అలాగే నిలిచిఉంది.     దానిమధ్యలో గొబ్బెమ్మలు...వాటిపై బంతిపూలు..చుట్టూ వెదజల్లబడ్డ పూరేకలు...కాస్త వాడినా.. కళగానే కన్పిస్తున్నాయి. అవన్నీ ఇందుమతిని చూసి పలకరింపుగా నవ్వాయి. ఇందుమతికి అదేమీ పట్టలేదు. చీపురుచ్చుకుని నిర్ధాక్షిణ్యంగా బరబరా ఈ మూలనుండి  ఆ మూలకు ఊడ్చేయడం మొదలెట్టింది. ముగ్గు, అందులోని రకరకాల రంగులు, గొబ్బెమ్మలు, పూలు...అన్నీ  ఒక్కసారిగా బావురుమన్నాయి. అప్పుడు ఆ  దృశ్యం చూసిన ఎవరికైనా జంధ్యాల పాపయ్య శాస్త్రి గారి 'పుష్పవిలాపం' మదిలో మెదలక మానదు. నిన్న ఎంత శ్రమ తీసుకుని ఓపిగ్గా వేసింది...! ఎంత కళాత్మకంగా రంగులన్నీ నింపి రంగవల్లి తయారు చేసింది!! నవధాన్యాలతో గొబ్బెమ్మల్ని  అలంకరించి, బంతిపూలు అమర్చి, ముచ్చటగా పదేపదే చూసుకుని మురిసిపోయింది. ఇరుగమ్మలు,పొరుగమ్మల కంటే తన ముగ్గే బాగుండాలన్న తపన ఎంతలా పొంగిపొరలిందో కదా ఆ మొహంలో ! అంతా మరిచిపోయిందా! ఎంత దయలేకుండా ఊడ్చేస్తోందిప్పుడు! తెగ బాధ పడిపోయింది భోగి ముగ్గు..

   పావుగంటలో అంతా ముగించేసి, బకెట్ తో నీళ్ళు తెచ్చి ఛెళ్ళు చెళ్లుమంటూ అంతా చల్లేసింది. నిమిషాల్లో మొత్తం మటాష్ ! కాసేపాగి  ముగ్గుచిప్ప పట్టుకొచ్చి కొత్త ముగ్గుకు శ్రీకారం చుట్టింది. ఆరోజు మకర సంక్రాంతి. నిన్నటికంటే ఇంకా బాగుండాలి ముగ్గు... అందరూ తన ముగ్గునే మెచ్చుకోవాలి మళ్ళీ.. దీక్షగా నడుం నొప్పెడుతున్నా లెక్కచేయక కష్టపడి మరో అరగంటలో రంగులతో తీర్చిదిద్దింది. మిగతా అలంకరణలన్నీ అమర్చి, కాస్త దూరంగా వెళ్లి అన్నికోణాల్లోనూ చూసుకుని అక్కడక్కడా 'టచప్స్'ఇచ్చేసి, మళ్ళీ ఓసారి పరికించి, తృప్తిగా తల పంకించి , సరంజామా అంతా పట్టుకుని ఇంట్లోకి దూరిపోయింది. 

    కొత్త ముగ్గు 'మకర సంక్రాంతి'  ముగ్గు ఠీవిగా నిలబడింది. దాని సౌందర్యాన్ని పదే పదే చూసుకుని మురిసిపోయింది. తనను అంత అందంగా తీర్చిదిద్దిన  ఇల్లాలిని మనసారా మెచ్చుకుంది. అలా తనలో తనే తెగ మురిసిపోతున్నదానికి ఆ పక్కనే రంగు నీళ్లతో,  తడిసి ముద్దయిన గొబ్బెమ్మల ఆనవాళ్లతో,  చెల్లాచెదురైన పూరెక్కలతో అలుక్కుపోయి, దీనాతిదీనంగా తన వైపే చూస్తున్న నిన్నటి 'భోగి' ముగ్గు కంటబడింది. దాని దీనావస్థ  చూసి కిసుక్కున నవ్వేసింది  సంక్రాంతి ముగ్గు..

" ఏంటి ! అలా అయిపోయావు ! నేను చూడు. ఎలా కళకళలాడిపోతున్నానో !..."

అంటూ మళ్ళీ కిసుక్కుమంది. 

" మిడిసిపడకే వెర్రి మొహమా ! ఓరోజు ఆగు.. అప్పుడు నవ్వుదువుగానిలే..."

" నన్ను చూసి కుళ్ళుకుంటున్నావు.. నాకు తెలుసులే.. చూడు నన్ను ఎంత అందంగా తయారుచేసిందో ఇంటావిడ...!!"

భోగి ముగ్గుకు భగ్గుమంది. ఉండబట్టలేక, 

" ఓసి అమాయకురాలా...నన్ను కూడా ఇలాగే... చెప్పాలంటే,  ఇంతకంటే శ్రద్ధగా వేసిందే పిచ్చిమొహమా.. ఈరోజు చివరిసారిగా నా ముఖమైనా చూడకుండా ఒక దెబ్బతో ఊడ్చి పారేసి, నామరూపాలు లేకుండా చేసేసింది. అయినా, ఇప్పుడు నీకు అర్థం కాదులే.. రేపు మాట్లాడుకుందాం..."

అని గమ్మున ఉండిపోయింది. మూతి తిప్పుకుంది సంక్రాంతి ముగ్గు. ఆపై.... అలా మిడిసిపడుతూనే ఉంది రోజంతా...మరుసటి రోజు.. 

  మళ్ళీ తెల్లారింది.. ఇందుమతి మళ్లీ చీపురుచ్చుకుని బయటకు రివ్వుమంటూ వచ్చింది. ఇక అంతా మామూలే... నిన్నటి ముగ్గు నిమిషాల వ్యవధిలో గతంలోకి జారిపోయి,  అదృశ్యమై కొత్త ముగ్గు ప్రత్యక్షమైంది...' కనుమ ముగ్గు'...!

      సంక్రాతి ముగ్గు వచ్చి భోగి ముగ్గులో కలిసిపోయింది...వెలిసిపోయిన రంగులతో, ఆకారాన్ని కోల్పోయి దీనాతిదీనంగా...! ఇప్పుడు ఫక్కున నవ్వడం భోగి ముగ్గు వంతయ్యింది. 

" తెలిసిందా ! నిన్న నన్ను జూసి నవ్వావు. మిడిసిపడ్డావు. ఇప్పుడు చూడు నీ గతి ఏమయ్యిందో!"

అంది దాని అవస్థ చూస్తూ... 

" అవును సుమీ!ఎంత దయలేనివారు ఈ ఆడువారు!!నిన్నంతా ఎంత అపురూపంగా చూసుకుంది నన్ను !ఈరోజిలా.. !"

ఏడుపు ముఖం పెట్టింది సంక్రాతి ముగ్గు. 

"..నిజమే..బుద్ధదేవుని భూమిలో పుట్టినారు గానీ..వీళ్లకు ప్రేమ అన్నది అస్సలు లేదు.. ఛీ ఛీ.. "

అని రెండూ ఏకమై ఆడజాతినంతటినీ దుమ్మెత్తిపోశాయి కాసేపు...అలసిపోయి పక్కకు తిరిగిన వాటికి 'కనుమ' ముగ్గు కన్నులపండుగగా దర్శనమిచ్చింది..చిత్రంగా,  అది ఆరెంటినీ చూసి ఏమాత్రం నవ్వలేదు, ఎగతాళి చేయలేదు, అలాగని...అయ్యో పాపం అనీ అనలేదు..!ఓ వేదాంతిలా మెల్లిగా దరహాసం చేసింది. రెండు ముగ్గులూ విస్తుబోయాయి కనుమ ముగ్గు వింత ప్రవర్తన చూసి ! అదే అడిగాయి...

" అదేంటి ! ఈరోజు నీ వైభవం చూసుకుని చాలా సంబరపడిపోతావనుకున్నామే ! మమ్మల్ని చూసి నవ్వుతావనీ అనుకున్నాం. కానీ, నువ్వేమో.. "

" అయ్యో ! ఎంత అమాయకత్వంలో ఉన్నారే ఇద్దరూ!ప్రతీసారీ...ప్రతీ సంవత్సరం..ఇది మామూలే కదా !ఈరోజు వేయడం...రేపు తుడిచేయడం ! మళ్ళీ వేయడం...మళ్ళీ తుడిచేయడం ! ఏళ్లతరబడి చూస్తూ కూడా మీకు విషయం బోధపడ్డం లేదంటే ఏమనుకోవాలి ! రేపు ఇంకో ముగ్గు వస్తుంది...మనంత అందంగా కాకపోయినా...అదీ ఇంతే ! ఆమాత్రం దానికి ఒకర్ని చూసి ఒకరం కుళ్ళుకోవడం,ఏడ్చుకోవడం ఎందుకు? అయినా... మీ చుట్టుపక్కలంతా అటూఇటూ ఓసారి చూసుకోండి. ఈ ఇందుమతే  కాదు...అందరాడాళ్లూ చేస్తున్నపనే ఇదీ.."

అలా చూసినవాటికి అందరిళ్ల  ముందూ తమలాగే రంగు నీళ్లతో అలుక్కుపోయిన నిన్నా మొన్నటి ముగ్గులు కంటపడ్డాయి.దాంతో, 

"ఔరా ! ఇంతులంతా ఇంతే సుమా !"అని మూగవోయాయి. 

"... మరేమీ  పరవాలేదులే.. బాధపడాల్సిందేమీ లేదు. మళ్ళీ సంక్రాంతి రాదా! మళ్లీ ఈ ఇందుమతి మనల్ని ఆహ్వానించదా ! అయినా, ఎంతో శ్రధ్ధగా పెద్ద పెద్ద ముగ్గులు నేర్చుకుని,  ఓపిగ్గా నడుం నొప్పెడుతున్నా లెక్కచేయక పట్టువిడవక, ఇంత కళాత్మకంగా మనల్ని వాళ్ళ ఇంటి ముందు తీర్చిదిద్ది కొలువుదీరుస్తుంటే సంతోషించక పాపం ఈ ఆడవాళ్ళనలా ఆడిపోసుకోవడం మీకు తగునా !"

అంటూ చురకలంటించింది. నిజమే కదా అనుకుని లెంపలు వేసుకున్నాయవి...దాని తెలివికి, తర్కానికీ  అబ్బురంగా చూస్తూన్న వాటితో,  

".. పుట్టడం,  గిట్టడం మనుషులకేనా..! మనకూ సహజమే ! సరేలే, రేపు నేనూ వచ్చి మీలో కలుస్తాగా...!"

అనేసింది అలవోకగా,  కుసింత వేదాంతం గుప్పిస్తూ..

"అమ్మ కనుమ ముగ్గూ ! నీకెంత తెలుసే !"

బుగ్గలు నొక్కుకున్నాయి నిన్నా మొన్నటి ముగ్గులు రెండూ...!!

💠🌸💠💮💠🌸💠💮💠❄️💠🌸💠🌸💠🌸💠

ఇదీ పరిష్కారం...కథ

 మార్చ్, 2022 మాలిక పత్రికలో కథ... 

' ఇదీ పరిష్కారం '  రచన : యం. ధరిత్రీ దేవి