కాకమ్మ కబుర్లు

                                    ~~యం. ధరిత్రీ దేవి

కావు కావు మంటూ కాకమ్మ అదిగో...

కారునలుపు రంగుతో పదునైన 

ముక్కుతో...చురుకైన చూపుతో

కొమ్మచాటు నోసారి..కోటగోడ నొకసారి..

నింగికెగిరి ఒకసారి..నేలను దిగి ఓసారి...

స్నేహానికి ప్రతిరూపం ఈ కాకమ్మ..

పంచుకుని తినే స్నేహశీలి కదా..!

తనవి కాని కోయిల గుడ్లను తన గూటిలో 

పొదిగే పరోపకారి కాకమ్మే కదా!

అందం లేదనా..! అంతః సౌందర్యం

అపారమే కదా!సుగుణశీలి..సులక్షణాల

పక్షి ఇదే కదా..కాకి గోల.. కాకి బలగం..

కాకి బంగారం..పిల్లకాకికేం తెలుసు 

ఉండేలు దెబ్బ..అబ్బో! సామెతలు కోకొల్లలే!!

నేస్తం అస్తమించెనా..స్పందించునే తక్షణం..

చుట్టూ చేరి కాకులన్నీ కలిసి 

ప్రకటించునే సంతాపం..! మనిషిలో లేని

మానవత్వం కనగలం కాకిలో..

పరిసరాల్ని ప్రక్షాళనం చేసే సర్వభక్షకి..

పర్యావరణ హితం గోరు పక్షి..

ప్రకృతిని విస్తరింపజేయు సహాయకారి..

విపత్తులను పసిగట్టగల నేర్పరీ ఇదే కదా!!

పురాతన పక్షిరాజం...పురాణాల్లోనూ 

దర్శనం../పవిత్రమైనదీ వాయసం...

కాలజ్ఞాని..ఇది శనివాహనమే!!ఇక...

పోరాటసమయాన..ఇది సమైక్యతావాది..

సాయంసంధ్యకు గూటికి చేరే కుటుంబ జీవి..

అనాదిగా సాంకేతికత నెరిగిన జ్ఞాని..

అలనాడే అట్టడుగున కూజాలో 

నీళ్లు పైకి రప్పించిన మేధావి మరి!!

గతించిన పూర్వీకులకిది వారధి...

పిండం కాకి ముడితేనే కానీ తృప్తిజెందరే 

మరి పితృదేవతలు !! కాకి కరువైన..

ఆవేళ..పర్వదినం అసంపూర్ణమే..!!

కాకి అరిస్తే చుట్టాలొస్తారట ! 

శుభసూచనలూ అందిస్తుందట!! అయితే...

ఇంతటి చరితగల కాకమ్మ 

కనుమరుగై పోతున్నది ఏమిటమ్మ!!

పలు సుగుణాల కాకమ్మకు రక్షణ కల్పిద్దాం..

ఆశ్రయమిచ్చే చెట్లను పెంచుదాం..పలువిధాల 

పరోపకారికి పిసరంత ఉపకారం చేద్దాం... 

కాకిజాతి అంతరించకుండా కాపాడుకుందాం....