'మనసు' చెప్పేది వినాలి...

  శారీరక ఆరోగ్యం గురించి అందరికీ తెలుసు. అవగాహన ఉంటుంది ప్రతి ఒక్కరికీ. మరి మానసిక ఆరోగ్యం సంగతేంటి? రెండింటికీ సమన్వయం కుదిరితేనే మనిషి ప్రవర్తన సవ్యంగా ఉంటుంది కచ్చితంగా. మనిషి మానసిక స్థితి అన్నది ఆ వ్యక్తి ఆలోచనా ధోరణిని ఎంతగానో ప్రభావితం చేస్తుంది. అది సవ్యంగా లేకున్నచో తీవ్రమైన ఇంకా విపరీత పరిణామాలూ చోటు చేసుకుంటాయి కూడా. అలా జరుగుతున్నవే...ఈమధ్యకాలంలో వెలుగుచూస్తున్న కొన్ని దుస్సంఘటనలు, అమానుషచర్యలు , అమానవీయకృత్యాలూ. నిత్యం వార్తాపత్రికల్లో, టీవీలో కానవస్తున్న ఈ వార్తలకు కొదువ ఉండటం లేదు.

   కారణాలు ఏవైనా కానీయండి... కన్నబిడ్డల్ని గొంతు కోసి చంపడాలూ, ఉరివేసి చంపడాలు.. అనుమానపిశాచంతో భార్యను కడతేర్చడం, ఆ శవాన్ని ముక్కలుగా నరికి పలుచోట్ల పారేయడం..! మద్యపానం కోసం డబ్బులు ఇవ్వలేదని కన్నతల్లినే హతమార్చడం.. తండ్రి ఉద్యోగం తనకు రావాలనే దురుద్దేశంతో బ్రతికుండగానే తండ్రిని చంపడం..! వగైరాలు..! ఇలా రాస్తూపోతే ఈ దురంతాలకు అంతన్నది ఉండదంటే నమ్మాలి. కొంతకాలం వరకు స్త్రీలపై హింస, హత్యలు జరగడం వినేవాళ్ళం. కానీ విచిత్రం..! ఇటీవల భార్యలు కూడా ప్రియుడన్న వాడితో కలిసి భర్తల్ని చంపుతున్నారు అన్న శోచనీయమైన  వార్తల్ని  వినాల్సివస్తోంది. మరో విషాదం! వింటేనే ఒళ్ళు జలదరిస్తుంది.. వివాహేతర  సంబంధానికి అడ్డుగా ఉన్నారన్న కారణంతో కడుపున పుట్టిన పిల్లల్ని కన్నతల్లే చంపిందన్న వార్తలు!!

   ఇదిలాగుంటే..చిన్నపిల్లలు కూడా తల్లి మందలించిందనీ, స్కూల్లో టీచర్ తిట్టిందనీ ఆత్మహత్యలట!! సెల్ ఎక్కువగా చూడొద్దు అన్నారని ఉరేసుకొని చావడాలు!! టీనేజర్స్ ప్రేమ పురాణాలయితే  కోకొల్లలు! తనను ప్రేమించడానికి నిరాకరించిందని అమ్మాయి గొంతు బ్లేడుతో కోసి చంపేశాడట ఒక ప్రబుద్ధుడు. మరొకడెమో ఆ పిల్ల ఇంట్లో దూరి, కత్తితో పొడిచి అంతమొందించాడట! 

 ఈ భయానక కృత్యాలు వినడానికే భీతి గొల్పుతుంటాయి. ఈ చర్యలకు కారణాలేమిటి? వీళ్లంతా ఇలా తయారవ్వడానికి దారితీస్తున్న పరిస్థితులు ఏమిటి? ఆ మానసిక దౌర్బల్యానికి మూలమేది? కచ్చితంగా ఇది మానసిక అనారోగ్యం అనడంలో సందేహం లేదు. మరి ఎలా బాగుపడాలి ఇలాంటి మనస్తత్వాలు? 

  ఈ చర్యలు నివారిస్తూ కాస్తలో కాస్తయినా పరిస్థితి మెరుగుపరచడానికి ఏర్పడినదే ప్రపంచ మానసిక ఆరోగ్య దినం ( world health day ). ప్రతి సంవత్సరం అక్టోబరు 10వ తేదీన ఇది జరుపబడుతున్నది. మనిషి మానసికంగా ఆరోగ్యంగా ఉండటానికి సలహాలు, సూచనలు చేస్తూ తోడ్పాటు నందించడానికి చేస్తున్న చిన్న ప్రయత్నమే ఇది. ప్రస్తుత సమాజానికి ఈ దిశానిర్దేశం (counselling ) చాలా చాలా అవసరం.

   ఈ దినోత్సవం లక్ష్యం ప్రపంచవ్యాప్తంగా మానసిక ఆరోగ్య సమస్యల గురించి జనాలకు అవగాహన పెంచడం. ఆ పరిజ్ఞానాన్ని మెరుగుపరచడం... కారణాలు అన్వేషిస్తే...

* విపరీతమైన మానసిక ఒత్తిడికి లోను కావడం..

* పుట్టి పెరిగిన వాతావరణం..

* తల్లిదండ్రుల మధ్య సఖ్యత లోపించడం..

* పేదరికంలో మగ్గిపోవడం...

* ఇతరులతో పోల్చుకోవడం..

* ఆత్మ న్యూనతకు లోనుకావడం..

* వీటన్నింటితో పాటు వెర్రి తలలు వేస్తున్న 

   సాంకేతిక  పరిజ్ఞానం...

* మంచి దారిలో నడవడానికి బదులుగా 

   దుర్వినియోగం బాట పడుతున్న యువత...

   ప్రస్తుతం అనూహ్యంగా పెరిగిపోయిన సాంకేతికత వల్ల లభ్యమవుతున్న అశ్లీల వీడియోలు, నేర ప్రవృత్తిని ప్రేరేపించే సన్నివేశాలు అరచేతిలోనే అయాచితంగా...క్లిక్ చేస్తే చాలు ప్రత్యక్షమయ్యే విపరీత దృశ్య పరంపరలూ...ఇవన్నీ యువతనేగాక చిన్నపిల్లలకు, పెద్దవారికి సైతం వక్రమార్గాలకు తలుపులు తీస్తున్నాయి. మనసు చెదిరిపోవడానికి దోహదం చేస్తున్న ఇలాంటి వాటికి అడ్డుకట్ట వేయవలసిన అవసరం ఎంతేని ఉన్నది.అలాగే గృహిణుల దగ్గర్నుండీ ఉద్యోగస్తులు,పిల్లలు...ప్రతి ఒక్కరూ రోజువారీ బాధ్యతల నుండి కాస్త విరామం తీసుకోవడం చాలా ముఖ్యం. అందుకోసమై... 

   మెదడుపై ఒత్తిడి తగ్గించుకోవాలి. విశ్రాంతి తీసుకుంటూ ఎప్పటికప్పుడు శరీరాన్ని రీఛార్జ్ చేసుకోవాల్సి ఉంటుంది. తగినంత నిద్ర లేకున్నా అది ఆరోగ్యం మీద తద్వారా మానసిక స్థితి మీద క్రమక్రమంగా తీవ్రప్రభావం చూపించే అవకాశం కచ్చితంగా ఉంటుంది. ఇదంతా ఆ వ్యక్తికి ఏమాత్రం తెలియకుండానే జరిగే ప్రక్రియ..,! కోపం,చిరాకు, విసుగు, గట్టి గట్టిగా అరవడాలు...ఇవన్నీ మనిషి తీవ్ర ఒత్తిడిని ఎదుర్కోవడం వల్ల ఎదురయ్యే ప్రవర్తనా లోపాలే...! కాలక్రమేణా మనిషి హిస్టీరికల్ గా  మారే ప్రమాదమూ పొంచి ఉంటుంది. అలాంటప్పుడు తనకుతానే తన సమస్యను  గుర్తించగలిగితే మంచిదే.. అలా లేనిపక్షాన తెలిసినవారు, సన్నిహితులు సలహాలివ్వడం, సరైన మార్గనిర్దేశం చేయడం పాటించాల్సిఉంటుంది. ఇందుకోసమే ఇలాంటి మానసిక ఆరోగ్య దినోత్సవాలు..

   అందుకే అవసరమైనప్పుడు మన మనసు చెప్పేది వినాలి. విశ్రాంతి తీసుకోవాలి. మానసిక భావోద్వేగ శ్రేయస్సుపై దృష్టి పెట్టాలి. ఇవన్నీ పాటిస్తే... మానసిక ఆరోగ్యం చక్కగా ఉంటుంది. మన ఆలోచనలూ సవ్యంగా ఉండి మనతోపాటు మన కుటుంబం కూడా బాగుంటుంది. తద్వారా...మన సమాజం యావత్  ప్రపంచం  సంతోషంగా నిశ్చింతగా ఉండగలదు.

    కాబట్టి చివరగా చెప్పొచ్చేదేమిటంటే... మన ఆరోగ్యం మన చేతుల్లోనే... అది గ్రహించుకుంటే మనకు అంతా మంచే జరుగుతుంది... చెప్పినంత తేలిక అయితే కాదు పాటించడం.. కానీ ప్రయత్నిస్తే సాధించలేనిది ఏముంది..!

____________________________________________