"చిన్నారి " పజిల్స్

 

[ఈనాడు దినపత్రికలో  "హాయ్! బుజ్జీ " శీర్షికన పబ్లిష్ అయిన పజిల్ 🙏]

బాల కార్మికులు కారు.. నవభారత నిర్మాతలు..

బడిఈడు బాలల్లారా..

చిన్నారి యోధుల్లారా..

బడిబాట పట్టాలి కదరా..!

పలుగూ.. పారా మీకెందుకురా!!

పలకా.. బలపం చేతబట్టండిరా ..

ఆటలతో పాటలతో ఆడీ పాడే 

వయసు మీది కదా..!

కేరింతలతో  కళకళలాడుతూ 

సాగాలీ మీ పయనం కాదా..!

మరలిరాని బాల్యమిదీ వినండీ..

అమూల్యమైనది బాబూ మరువకండి..

 అమ్మలూ.. నాన్నలూ..

 వింటారా ఓ మాట!

 కనంగానే పిల్లల్ని సరిపోయేనా !

 కలలు కూడా కనాలనీ 

 తెలియకుంటే ఎలాగా !?

 అవి నిజమయ్యేదారులు 

 వెతకకుండ లేవంటే ఎలా!

 మీరు కన్న ఈ బిడ్డలు.. మీ కంటిపాపలు..

 మీ బాధలు.. మీ బరువులు. 

 దాటనీయొద్దు మీ పరిధులు..

 వసివాడని పువ్వులండి..

 పసివారిని చేయకండి

 వాటిలోన భాగస్వాములు. 

 ఆ నవ్వులు చిదమకండి. 

 ఆ వెలుగులు ఆరిపోనీయకండి..

 వారి భవిత మీ బాధ్యత

 ప్రతి అడుగున ఇవ్వండీ చేయూత!

 మరలిరానిది బాల్యమన్నది..

 మరల మరల అనుభవించలేనిది..

 మధురమైన జ్ఞాపకాలు ప్రోగుపడే 

 తరుణమదీ.. తలచి తలచి..

 సంబరపడు తరిగిపోని పెన్నిధి..

 కట్టలేరు వెల అన్నది..

 పొందలేరు తిరిగి.. ధర చెల్లించి..

 తెలుసుకోండి పెద్దలారా.. ప్రేమ మూర్తులారా..!

 చిట్టి చిట్టి చేతులు.. లేలేత పాదాలు .

 కందిపోనివ్వకండి.. మొద్దుబారనీయకండి..

 పలక బలపం.. చేతబట్టనీయండి..

 పుస్తకాల బహుమతులు అందించి చూడండి..

 ఈనాటి చిన్నారులు వీరు..

 అవుతారు రేపటి ప్రపంచ పౌరులు   

 కాదు వారు బాల కార్మికులు 

 వెట్టి చాకిరీకి వారసులు అసలే కాదు 

 భావితరం దూతలు.. నవభారత నిర్మాతలు 

 వెలిగించాలి వారి మదిని విజ్ఞాన జ్యోతులు..

 సృష్టించి చూపుతారు ఎన్నెన్నో అద్భుతాలు..!!

 బడి ఈడు బాలల్లారా.. వింటున్నారా..

 బడిబాట పట్టండీ.. కదలండీ..

పలుగూ.. పారా వదలండి

పలకా.. బలపం ఇదిగో పుచ్చుకోండి 

 ఆటలతో పాటలతో ఆడి పాడే వయసు మీది   

 కిలకిల నవ్వులతో సాగాలీ మీ పయనం..

 మరలిరాని బాల్యమిది  ముమ్మాటికిది మీది..

 వాడిపోనియ్యకండి.. పదిలంగా వాడండి..

 మధురమైన జ్ఞాపకాలు.. నిక్షిప్తం చేసుకోండి..

 చిన్నారి బాలల్లారా.. రేపటి ప్రపంచ పౌరుల్లారా..

 బడిసంచీ ఇదిగో.. బడిబాట పట్టండీ..

 బడి గంట మోగుతోంది అదిగో..

 కదలండీ.. కదలండీ.. 

['సంచిక ' ఆన్లైన్ వారపత్రికలో(19.7.26) ప్రచురింపబడ్డ నా రచన🙏]

' చిన్నారి' పజిల్స్...

 

[ ఈనాడు దినపత్రిక.. " హాయ్ బుజ్జీ " శీర్షికన ప్రచురింపబడ్డ పజిల్..🙏]

జాతిపిత ఒక్కడే....

 🙏                                       ~~ యం.ధరిత్రీ దేవి ~~  

   

🥀🐦🥀🐦🥀🐦🥀🐦🥀🐦🥀🌹🥀🥀🌹🥀🥀

ఈ ధరణిపై ఇప్పటిదాకా

ఎందరో పుట్టారు... 

సామాన్యులు...అసామాన్యులు...

కొందరు మహానుభావులయ్యారు...

కొందరు అమరజీవులయ్యారు...

మరికొందరు....

చిరస్మరణీయులయ్యారు...

మహాత్ములూ... జాతిపితలూ మాత్రం 

ఎవరూ అవలేదు...

ఒక్క గాంధీజీ తప్ప...!!

                                                           

🥀🌷🌹🥀🌷🥀🌷🥀🌷🥀🌹🥀🌷🌹🥀🌷🥀

 

' చిన్నారి' పజిల్స్..

 

' ఈనాడు' దినపత్రిక.. "హాయ్ బుజ్జీ " శీర్షికలో పిల్లల కోసం ప్రచురింపబడ్డ పజిల్.. 🙏

కృషీవలునికి ప్రణమిల్లుదాం...

పల్లవి :

నింగిని మేఘం కరిగింది 

చినుకై నేలను రాలింది 

ఎండిన బీడు తడిసింది

పంటకు సై అంటు పిలిచింది

పదరా పదరా రైతన్నా

పరుగున కదలర ఓరన్నా

నాగలి పట్టర నాగన్నా

నాట్లు వేద్దాం రారన్నా  

పదరా పదరా పదరా                       //నింగిని//

చరణం 1 :

హలం భుజం పైకెత్తాడూ...

కాడెద్దులతో కదిలాడూ...

కాయకష్టం చేశాడు

కలలకు ఊపిరి పోశాడు

గింజలు పొలాన చల్లాడు

అదిగో మొలకల సందడి చూడు 

ఇదిగో  రైతన్న కన్నుల దివ్వెలు    

ఇల్లాలి మోమున విరిసే నవ్వులు  

ఇదిగో ఇదిగో ఇదిగో                          //నింగిని//

చరణం 2 

పైరగాలుల పలకరింపులు

పచ్చదనాల సింగారాలు 

అమ్మలక్కల ఆటలు పాటలు

కూలీల నడుమ అచ్చట్లు ముచ్చట్లు

సద్దిమూటల సరదాల సందళ్ళు

కోతకు వచ్చిన పసిడిపంటలు

కల్లాల నిండా ధాన్యం రాశులు,

కళకళలాడుతు పల్లెల లోగిళ్ళు  

అదిగో అదిగో అదిగో                           //నింగిని//

చరణం 3 :

జేబుల నిండుగ కాసులు ఉన్నా 

బ్యాంకుల బండెడు కోట్లు ఉన్నా 

పండించే రైతన్న లేకుంటే

అంగట్లొ సరుకులు వచ్చేదెట్లా

జనాల కడుపులు నిండేదెట్లా

కావాలంటే వెచ్చాలు మనకు 

రావాలి రావాలి మన రైతన్నలు 

లేకుంటె తప్పవు అగచాట్లు   

వినండి వినండి వినండీ                     //నింగిని//

చరణం 4 :

మట్టిని నమ్మిన మట్టి మనుషులు 

భూమి తల్లికి ముద్దులబిడ్డలు 

ఆరుగాలము శ్రమించు జీవులు 

నేలతల్లిని వదలని ప్రాణులు 

అన్నదాతలు వారే లేకున్న 

లోకాన కరువే...కనరాదు మెతుకే 

కడుపులు నింపే కృషీవలునికీ

కరములు జోడించి ప్రణమిల్లుదాము  

రారండి రారండి రారండీ                    //నింగిని//

[ 'సంచిక ' ఆన్లైన్ మాస పత్రిక ( 6.9.26 ) లో ప్రచురితమైన నా రచన 🙏]

                               

పుస్తకం... నా ప్రియ నేస్తం...

.                                          

🌷🌷🌷🌷🌷🌷🌷🌷🌷🌷🌷🌷🌷🌷🌷🌷

                                            ~ యం. ధరిత్రీ దేవి 

   పుస్తకం నా ప్రియ నేస్తం...

   నాకు ప్రాణప్రదం...

   అలసిన వేళ సేదదీర్చే ఔషధం

   ఒంటరినైన...ఊరడించే నెచ్చెలి...

   తెరిస్తే చాలు...అక్షరాలు కావవి...

   అనంతకోటి ఆలోచనలు 

   కొలువుదీరిన కూటమి...!

   మేధావుల కలం నుండి జాలువారి

   చెక్కుచెదరక నిలిచిన 

   అక్షర శిల్పాలే మరి...!!

   అలరిస్తూ..మురిపిస్తూ ఒకసారి...

   నవ్విస్తూ..విషాదంలో ముంచేస్తూ

   మరోసారి...అంతలోనే...

   ఓదారుస్తూ.. నిద్రాణమైన శక్తిని 

   తట్టిలేపుతూ..బద్ధకాన్ని వదిలిస్తూ...

   గమ్యం చూపిస్తూ..ఆగకుమా 

   సాగిపొమ్మంటూ..వెన్నుతడుతూ 

   ముందుకు తోసే స్ఫూర్తిప్రదాతలు 

   ఆ అక్షర దీపాలు...!!

   పుస్తకం..కాదు హస్తభూషణం...

   మస్తిష్కాన్ని మధించే 

   మహిమాన్విత ఉపకరణం..

   ఉజ్వల భవితకు సోపానాలు 

   వేసే ఉత్తమోత్తమ సాధనం...!

   విజ్ఞాన వినోదాల భాండాగారం...

   కాలక్షేపం కలగలసి..లభ్యం..

   మానసికోల్లాసం...!

   పుస్తకపఠనం..మెదడును

   పదును పెట్టే ఇంధనం...

   కావాలి దినచర్యలో అదో భాగం..

   నూతనోత్తేజానికి పడుతుందపుడే బీజం!!

   అందుకే...పుస్తకం నా ప్రియనేస్తం..

   నాకు ప్రాణప్రదం...!

🌷🌷🌷🌷🌷🌷🌷🌷🌷🌷🌷🌷🌷🌷🌷