నీ పలుకులు పంచదార గుళికలే...

     

చిలకా..ఓ చిలకా..ఓ రామచిలకా  

పంచవన్నెల చిలుకా..అందాల ఓ చిలకా 

పచ్చానీ ఆరెక్కలు వయ్యారి ఆ నడకలు 

పదుగురికి పంచేను పరవశాల తరంగాలు 

పలుక నేర్చినావులే.. పదము పలికినావులే

'రామ’నామస్మరణ చేత'రామ'చిలుక వైతివిలే /చిలుక/ 

                                                                               

ఎర్రానీ ఆ ముక్కు ముచ్చటైన ఆ వంపు 

మెడ చుట్టూ మెరిసేటి ఆ హారం సొంపు 

ఆకుపచ్చ కోక గట్టి అందమంత మూటగట్టి 

కులుకుతున్న నిన్ను జూసి నెమలి కూడ 

తెల్లబోయి తేరిపార చూడసాగెనే

నాట్యమాడ సంచయించి ఆగిపోయెనే 

ఒక్కసారి చూడు చూడు అటు చూడవే     /చిలుక/

ఆకుల్లో దాగి దాగి దోబూచులాడతావు

చూసే మా కళ్ళకు విందులే చేస్తావు 

కొమ్మ మీద వాలిపోయి అటూ ఇటూ వెతుకుతావు 

జామచెట్టు చూస్తావు.. జామకాయ కొరుకుతావు 

కొరికినవే మీకంటూ మాకోసం విసురుతావు

తీయనైన ఆపళ్లు నీకు మహా ఇష్టం

రుచి చూసిన ఆ పళ్ళే మాకు మరీ ఇష్టం    /చిలుక/

     

రోడ్డువారగుంటావు జోరు మీదుంటావు

జాతరలో ఉంటావు జాతకమే చూస్తావు

అరచేతిని అందిస్తే జోస్యమే చెబుతావు  

చిలుక పలుకు భవిత తెలుపు అంటావు

రేపుతావు రేపటిపై అంతులేని ఆశలు

నీ పలుకులు పసందైన పంచదార గుళికలే 

ఆరిపోవు దీపానికి నీ మాటలు ఆసరాలే       /చిలుక/

                             ~ యం.ధరిత్రీ దేవి