అద్భుతం !!

                                           ~~ యం. ధరిత్రీ దేవి 
 మూడు రోజుల క్రితం
 నా అరచేతిలో ఒదిగిన 

 ఓ చిన్ని విత్తనం...

 చూసింది నను అమాయకంగా...!
 ఈ దినం అది అంకురమై... 
 నేల తల్లి ఒడిని
 దోబూచులాడుతూ... 
 కొంటెగా చూస్తూ
 ఇచ్చింది దర్శనం!
 ఎంత అద్భుతం!
 ఎంతటి విషయం
 దాచుకుందో కదా
 దాని అంతర్భాగం !

 అలా అలా...చూస్తున్నా...

 చూస్తూనే ఉన్నా...
 ఋతువులు మారి మారి... 
 రోజులు వారాలు దొరలి దొరలి... 

 వత్సరాలై తరలి తరలిపోతుండగా...

 దినం దినం ప్రవర్ధమానం
 అవుతూ అవుతూ... 
 ముసి ముసిగా నవ్వుతూ...
 మౌనంగానే ఎదిగి ఎదిగి... 
 నింగికేసి ఎగసి ఎగసి...
 కొమ్మలు రెమ్మలతో 
 అలరారుతూ...
 పువ్వుల గుత్తులతో 
 పరిమళిస్తూ... 
 చూసే కనులకు
 విందులు చేస్తూ....
 కిలకిలా రావాల
 పక్షులకావాసమై... 
 వచ్చిపోయే
 జనాలకాశ్రయమై...
 చల్లచల్లగా సేదదీరుస్తూ... 
 అబ్బురపరిచెనే ఈనాడు నను...!!
 ఒకనాటి అతిసూక్ష్మ కణం...
 నా అరచేతిలో ఇమిడిపోయిన 
 ఆ చిన్ని విత్తనం !!
 నేడో నిండైన వృక్షరాజం !! 

 తలచి తలచి గతాన్ని... 

 తరచి తరచి చూస్తే... 

 నాకిదో అద్భుతం ! 

 నిజంగా అద్భుతం !!

🐦🐦🐦🐦🐦🐦🐦🐦🐦🐦🐦🐦🐦🐦🐦🐦🐦🐦