అయినవాళ్లు..... కవిత

నాడి పట్టి చూసే వైద్య నారాయణులు 
మందులిచ్చి ఊరట నిచ్చే
 వారల సహాయక బృందాలు
 నిస్సహాయ చూపులతో
 ఆ పక్కనే పరుండిన 
 మరికొందరు వ్యాధి పీడితులు దప్ప 
 అయిన వాళ్ళ పలకరింపులూ 
 ఆప్తుల పరామర్శలూ నోచుకోని
 అభాగ్యులీ  ' కరోనా ' బాధితులు!
 కన్న వాళ్ళు, వాళ్లు కన్నవాళ్ళు 
 ఒకరికొకరు దరిజేరరాని 
 దయ లేని క్షణాలివి !
 ఈ క్లిష్టసమయాన మరణం
 సంభవించిన అదెంత దారుణం!
 గుండెలవిసేలా రోదిస్తూ 
 రక్త సంబంధీకులు
 కడచూపు సైతం
 నోచుకోని నిర్భాగ్య జీవులు
 కడకు అనాధ శవాలుగా
 అంత్యక్రియలు !
 అయినవారు కానివారై 
 విధిలేక వెనుదిరుగుతున్న క్షణాన 
 ఏమీ కాని వారే అంతా అయినవారై 
'  ఆ నలుగురై ' 
 విద్యుక్తధర్మాన్ని నిర్వర్తిస్తూన్న 
విశాల హృదయులూ 
మానవతా మూర్తులు !
 వారందరికీ మన:పూర్వక 
 ధన్యవాదాలు!