నా స్మృతుల్ని సమాధి చేయగలవా..!!😌

 

అమ్మా.. నేచేసిన నేరమేమిటమ్మా..!?

అంత ప్రేమ అంతలోనే ఎలా మాయమైపోయెనమ్మ..?

ఆటాడుతూ పడిపోతే అల్లల్లాడిపోయావు 

బువ్వ తినిపిస్తూ పొలమారితే కలవరపడతావు..

నే నవ్వితే నీ మోమున కోటి కాంతులు !!

' అమ్మా' అని పిలిస్తే చాలు అక్కున చేర్చుకుంటావే..!

మరి..ఆ పిలుపు వద్దంటూ ఎందుకమ్మా 

నా నోరు నొక్కేయాలనుకున్నావు ?

లాలపోసి.. జోలపాడి నిద్రబుచ్చిన ఆ చేతులు..

పౌడరద్ది..దిష్టిచుక్క పెట్టి.. ఫ్రాకు తొడిగి..

బుట్టబొమ్మలా తీర్చిదిద్దిన ఆ చేతులు..

ఎలా బిగించాయమ్మా ఉరి నా లేత గొంతుకు ..!?

అర్ధరాత్రి ఆకలికేడిస్తే.. నోటి కందిన 

ఆ పాలధారల కమ్మదనం.. మరువగలనా!

నను హత్తుకుని ఆదమరిచి నీవు..

నిదురించడం నాకింకా గురుతే..

తప్పటడుగులనాడు అంబరాన్నింటిన 

నీ సంబరం.. ఎక్కడ? అదృశ్యమైపోయెనా !

నా చిలుకపలుకులు నిన్నలరించిన క్షణాలు..

నాకెరుకే..! అంతలోనే అంత చేదెలా అయితినమ్మా!!

అత్తింట ఆరళ్ళు.. అదనపు కట్నపు సెగలు..

అప్పుల బాధలు.. నిను చుట్టుముడితే..

నాన్న అరాచకాలు నిను వేధిస్తే..

శిక్ష నాకు వేశావేమిటమ్మా! ఎదురీత చేతగాక..

తలరాత మార్చాలనుకున్నావు..

నువ్వు లేక నా అనాధ బ్రతుకు 

ఊహించలేకపోయావు.. చివరికి... 

మిగిలిందేమిటమ్మా !? నా ఆయుష్షు కూడా 

పోసుకుని నీవు మాత్రం మిగిలావు..!!

సమస్యలు వేధిస్తే.. బ్రతుకులు చిదిమేయాలా !

పది నెలలు కడుపున మోశావు..

మరణం అంచులు తాకి.. మరో జన్మ ఎత్తి..

నాకు జన్మనిచ్చావు.. ఆపాటి కడగండ్లు 

నీకు దూదిపింజలే!! సహనానికి మారుపేరు నీవు..

అంత కఠినంగా ఎలా మారిపోయావు?

ఇప్పుడు తీరాయా నీ వెతలు !

సమసిపోయాయా నీ సమస్యలు !!

అమ్మా.. నీకో ఊరట..! కన్ను మూసిన 

నీ కంటి పాపకు.. ఇక నిశ్చింతేలే ..!

నాలాంటి అభాగ్యులు కోకొల్లలిక్కడ ..

అమ్మ చేత.. నాన్న చేత హతులై..

నాకు తోడుగ ఉన్నారిచట.. నా బెంగ నీ గురించి..

ఎలా మోయగలవమ్మ..! నీ జీవితకాలం 

దహించే ఆ వేదన!! నన్ను సమాధి చేశావు..

నా స్మృతుల్ని చేయగలవా..!

నా అభ్యర్థన ఒక్కటే.. దయచేసి..

మళ్లీ ఉరి బిగించుకోకు..

నన్ను వెతుక్కుంటూ వచ్చి..నా చెంత చేరకు...

😌🤔😌🤔😌🤔😌🤔😌🤔😌🤔😌🤔😌

[ 'విహంగ ' ఆన్లైన్ మాసపత్రిక మే 2026 

    సంచికలో ప్రచురితమైన నా కవిత 🙏]

ఒక్క క్షణం ఆగండి.. ఆలోచించండి...

 😪

<><><><><><><><><><><><><><><><><><>>

 *  ప్రేమ విఫలమై ప్రేమికులిద్దరూ రైలు పట్టాలపై ఆత్మహత్య!

 * అమ్మాయి తన ప్రేమనంగీకరించలేదని వ్యధతో పురుగుమందు తాగిన యువకుడు!

* పదవ తరగతి పరీక్షలో ఒక సబ్జెక్టు తప్పినందుకు అవమాన భారం భరించలేక  అమ్మాయి ఉరేసుకుని  ప్రాణం తీసుకున్న వైనం..!

* ఉద్యోగ వేటలో విసిగిపోయి ఒకరు , ప్రేమ పెళ్లి విఫలమై ఒకరు,తండ్రి మందలించాడని మరొకరు!!...

 ఇలా రకరకాల కారణాలతో నిండు జీవితాల్ని అర్ధాంతరంగా ముగించేసుకుంటున్న యువత గురించి ప్రతిరోజు వార్తాపత్రికల్లో చదువుతున్నాం... టీవీల్లోనూ చూస్తూ ఉన్నాం...ఇలాంటి ఉదంతాల్ని వింటున్నప్పుడు...మనసంతా కాసేపు బాధతో నిండిపోతూ ఉంటుంది. ఈ మధ్య మరీ చిన్న పిల్లలు...అంటే మూడు, నాలుగు తరగతులు చదువుతున్న వాళ్ళు కూడా ఆత్మహత్యలు చేసుకుంటున్నారన్న వార్తలు మరీ విడ్డూరంగా ఉంటున్నాయి. సెల్ ఫోన్ ఎక్కువగా చూడొద్దు  అన్నందుకు ఓ పిల్లవాడు తండ్రి మీద అలిగి పురుగుమందు తాగి ఆత్మహత్య చేసుకున్నాడట!!

  గర్భస్థ శిశువుగా ఉన్ననాటి నుండి మొదలైన తల్లి కలలు ఆ బిడ్డ తన ఒడి చేరిన క్షణం నుండీ అలా కొనసాగుతూనే ఉంటాయి. బిడ్డ బాల్యం, అల్లరి, వారి చదువు సంధ్యలు, క్రమక్రమంగా వారు ఎదిగే తీరు, వారి ముద్దు మురిపాలు...ఓహ్! తల్లిదండ్రులు వారి చుట్టూ అల్లుకునే ఆశల పందిరి వర్ణించడానికి మాటలు చాలవు. మరీ ముఖ్యంగా ఈ రోజుల్లో.. అలా నిర్మితమవుతున్న వారి స్వప్న సౌధం కళ్ళముందు సాక్షాత్కరించే తరుణం ఆసన్నమవుతున్న క్షణాల్లో ఒక్కసారిగా భయంకరమైన కుదుపు..!! వారి కలలపంట, ఆశాజ్యోతి.. కొడుకు గానీయండి.. కూతురు గానీయండి... కళ్ళముందు హఠాత్తుగా నిర్జీవమై ఓ శవంగా వారి ముందు పడి గుండెల్ని పిండివేస్తే ఆ కోలుకోలేని దెబ్బ నుండి తేరుకోవడం జన్మలో వారి తరమా!!

   కొన్ని సందర్భాల్లో సమస్య తీవ్రమైనదే కావచ్చు.. కానీ అది తాత్కాలికమైనదే అని గ్రహించలేని విజ్ఞత వారిలో లోపించడం ఇక్కడ గమనించాల్సిన విషయం. ఒక్కోసారి కాస్త సహనం వహిస్తే సమస్య దానంతకదే  పరిష్కారమవుతూ ఉండటం కూడా చూస్తూ ఉంటాం. అప్పటికప్పుడు పరిష్కారం దొరకని సమస్యల్ని గురించి కొంతకాలం ఆలోచించకపోవడం మంచిది. కాలం అన్ని గాయాల్ని, ఇంకా చెప్పాలంటే ఎలాంటి గాయాలనయినా మానేలా చేస్తుంది అంటారు కదా... అలాగే ఈరోజు భయంకరంగా తోచిన గడ్డు సమస్య కొద్ది రోజుల వ్యవధిలోనే దూదిపింజలా తేలిపోవచ్చు. అంత ఆందోళన పడింది దీని కోసమా అని కూడా అనిపిస్తుంది. ఆమాత్రం దానికి భగవంతుడిచ్చిన అపురూపమైన ఈ బ్రతుకుని తాత్కాలిక సమస్య కోసమని  శాశ్వతంగా ముగింపజేయడం సమంజసమా!!?

     పరీక్ష ఫెయిల్ అయితే మళ్లీ రాసి పాస్ అవ్వచ్చు. ఉద్యోగం ప్రయత్నం మీద ఏదో ఒక రోజు రాకపోదు. ఒకవేళ రాకపోయినా, బ్రతికి తీరాలి అనుకుంటే బ్రతుకుతెరువుకు బోలెడు మార్గాలు.. 

   ప్రేమ విఫలమైతే  అదే జీవితమా...చెప్పండి,! తల్లిదండ్రులతో పాతికేళ్ళు పెనవేసుకున్న బంధం ముందు కొద్దిరోజుల ప్రేమ బంధం విలువ ఎంత!? మీ మీదే  అన్ని ఆశలూ పెట్టుకున్న ఆ అమాయక ప్రాణుల గురించి క్షణమైనా ఆలోచించాల్సిన అవసరం పిల్లలకు ఉండాలా లేదా!!

  చావడం పిరికితనం కాదు. ఎంతో ధైర్యం కావాలంటూ ఉంటారు. సరే, ఆ ధైర్యమేదో బ్రతకడానికే తెచ్చుకోండి. ఏమైనా, ఒక్క విషయం.. ఈ బలహీన మనస్కులంతా గుర్తుంచుకోవాలి. చచ్చి సాధించేది ఏమీ లేదు. బ్రతికే సాధించుకోవాలన్న నగ్న సత్యం... జీవితం కాస్తా ముగిసిపోయాక ఇక చేసేదేముంది!!? తల్లిదండ్రులకు జీవితకాలం  భరించలేని వేదన తప్ప !!

   ఇలాంటి సున్నిత మనస్కులు ఆత్మహత్య చేసుకోవాలన్న ఆలోచన తీవ్రతరమైనప్పుడు.. ఒక్క క్షణం..ఒకే ఒక్క క్షణం...ఆగిపోయి...ఆలోచించడం అన్నివిధాలా శ్రేయస్కరం.ఆ సమయంలో వారికి,

         " గతంలో మీరు సాధించిన చిన్న చిన్న విజయాలు, పొందిన ప్రశంసలు, మీ ఆశలూ, ఆశయాలు... మననం చేసుకోండి. మీపై మీకు నమ్మకం కలగకపోదు. అంతకుమించి.. మిమ్మల్ని కన్న అమ్మానాన్నల గురించి... మీరు లేకుండా పోయాక వారి పరిస్థితి ఏమిటి? ఒక్కసారి..మీ నిర్జీవ దేహంపై పడి గుండెలవిసేలా వారు రోదిస్తున్న దృశ్యం ఊహించుకోండి..చాలు..ఎన్నటికీ..మరెప్పటికీ ఆ తలంపే మీ ఊహల్లోకి రాదు. అదే మిమ్మల్ని మీ కర్తవ్యం దిశగా నడిపించేలా చేస్తుంది..."

అని చెప్పాలనిపిస్తోంది.

  బాల బాలికలు, యువతీ యువకులే కాదు వయసుతో నిమిత్తం లేకుండా ఈ దుశ్చర్యకు పాల్పడుతున్న ప్రతీవారు బ్రతుకుపై తీపినీ, రేపటి పై ఆశను  పెంచుకుంటే సమస్యల్ని అవలీలగా దాటే మానసిక స్థైర్యం వచ్చి తీరుతుంది. కాబట్టి.. సమస్యలకు భయపడకుండా కాస్త ఆగండి.. ఆలోచించండి...

హృదయస్పందనకు దర్పణం..

కథ అంటే కాదు కల్పితం..

కథకుని హృదయస్పందనకు దర్పణం 
లోకం పోకడలను స్వానుభవంతో రంగరించి..

అల్లిన అనుభూతుల అనిర్వచనీయ కవనం..,!

వైవిధ్యభరిత మనస్తత్వ ఆవిష్కరణల 

అద్భుత విన్యాసం!

అతని ఊహా ప్రపంచంలో మెదిలి మెదిలి..

రూపుదిద్దుకొని.. కడకువీడి.. కాగితంపై 

అక్షరాల బారులై పరుచుకొని..పాఠకుని 

చేతికందిన అద్వితీయ బహుమతి 'పుస్తకం!'

కలల ప్రతిరూపం..ఊహకు నిలువెత్తు సాక్ష్యం..

సజీవంగా కళ్లెదుట సాక్షాత్కరించిన క్షణం...

ఆ సృష్టికర్త హృదిని ఎగసిపడే సంతోషతరంగం..

వర్ణనాతీతం!! అది అక్షరాలా అనుభవైకవేద్యం!!

ఆ కలం వెలిగించిన అక్షరదీపాలు..

దారి చూపే దివిటీలు..

ప్రగతికి బాటలు వేసే స్ఫూర్తిప్రదాతలు..

పాత్రల తీరుతెన్నులు..పాత్రోచిత చిత్రణ..

కథాగమనం..! ముగిసేదాకా జరిగే మేధోమధనం!!

కవితాహృదయం మాత్రమే ఎరిగిన అక్షర సత్యం!

చదువరి ఎదపై అదో చెరగని జ్ఞాపకం..

అంతర్లీనంగా అందే ఓ సందేశం..

సర్వజనావళికి  అదొక దిశానిర్దేశం..

రసజ్ఞత ఎరిగిన రచయితకు ఎదురేమున్నది..!

నవ్యత నిండిన రచనలకు కొదవేమున్నది..!?

అందుకే..కథ అంటే కానే కాదు.. కల్పితం..

కథకుని హృదయస్పందనకు అది దర్పణం..!!

🥀🥀🥀🥀🥀🥀🥀🥀🥀🥀🥀🥀🥀🥀🥀🥀🥀

['సంచిక ' ఆన్లైన్ వార పత్రికలో ప్రచురితమైన నా స్వీయ కవిత ]

జీవితమంటేనే పోరాటం...

మనసా..!నీకెందుకంత నిరాశ !!

బ్రతుకంటే దేనికంత భయం!?

ప్రాణత్యాగానికి ఎలా వస్తోంది అంత ధైర్యం!

అదేదో చూపించరాదా బ్రతకడం కోసం..

జీవితమంటే అంత విలువ లేనిదైపోయిందా !

క్షణికావేశం నీలోని విచక్షణను కమ్మేసిందా !

పది పరీక్ష తప్పితే  అదే పరమార్థమా !

మరో అవకాశం నీ కోసం 

వేచి ఉన్నదని మరిస్తే ఎలా ?

నాన్న కొడితే.. అమ్మ తిడితే..

అది ఎవరి కోసం? ముమ్మాటికీ నీకోసం..

ఉద్యోగం రాకుంటే.. మరణమే శరణ్యమా!

ప్రయత్నిస్తే దారులు శతకోటి.. ఎరుగవా..!

ఆశలుడిగిన జీవితం  చిగురులు వేయదా !!

అప్పుల పాలై అవమానాలతో తలవంపులా!

అయితేనేమి.. సహనం వహించి చూడు..

తలెత్తుకు తిరగ్గలవు.. తలరాత మారగలదు..

అనారోగ్యం అతలాకుతలం చేస్తోందా!

వెతికితే బాగయ్యే మార్గాలు  ఉన్నాయిగా !

ఇంట్లో శాంతిసౌఖ్యాలు  కరువా !

నెలకొల్పడం నీ చేతిలో పనే కదా సోదరా...

సమస్యలు సుడిగుండాలైతే..

సావకాశంగా ఆలోచించు..

సానుకూలంగా స్పందించు..

గోరంతను కొండలు చేయకు 

కాలమే చెబుతుంది అన్నింటికీ సమాధానం 

వేచి చూడు ఎదురవుతుంది పరిష్కారం 

నేటి సమస్య తాత్కాలికం 

రేపటికంతా తేలిపోయే దానికోసం 

బలిపెట్టకు నిండు జీవితం 

దేహంలో జీవం ఉంటేనే కదా..

'రేపు' అన్నది చూడగలం..!

ఆ రేపు అన్నది నీకు ఉండాలంటే 

జీవించి ఉండడం ప్రధానం..

ప్రాణంతో ఉంటేనే కదా 

చవిచూడగలం 'విజయం' !

ఆత్మాహుతి ఆలోచనలు కాదు నేస్తం..

దృఢసంకల్పం అవసరం 

ఈ జీవితం ఓ అమూల్య వరం 

అత్యద్భుతమైన ఈ అదృష్టం చేజారనీకు..

తుది శ్వాస వరకూ పోరాడు..

జీవితమంటేనే పోరాటం కాదా మనకు..,!

పోరాడటానికే మనం పుట్టామని మరువకు!!

👍👍👍👍👍👍👍👍👍👍👍👍👍

[ 'సంచిక' ఆన్లైన్ వార పత్రిక..( 22.2.26 ) లో 

     ప్రచురితమైన నా స్వీయ కవిత ]