"ఎవరో వస్తారని ఏదో చేస్తారని
ఎదురు చూసి మోసపోకుమా
నిజం మరిచి నిదురపోకుమా "
అన్నాడో కవి..! మాటలా అవి..!
కానేకావు.. పచ్చి నిజాలు..
మనిషిలో నిద్రాణమై ఉన్న శక్తిని
మేల్కొలిపే అక్షరసత్యాలు !
గమ్యంవైపు అడుగులు కదపమంటూ
ముందుకు నడిపించే హితబోధలు!!
అందుకే.. నేస్తమా!
ఎదురుచూడకు ఎవ్వరికోసం..
ఎవరో వచ్చి ఏదో చేస్తారని
నిన్ను అందలం ఎక్కిస్తారని ఆశ పడకు..
స్వయంకృషిని మించినదేదీ
ఉండదు..గ్రహించు...
ఆత్మన్యూనతను వదిలించుకొని..
ఆత్మవిశ్వాసం పెంపొందించుకొని..
ఆత్మగౌరవం నిలబెట్టుకుంటూ..
కదులు.. ముందుకు.. మున్ముందుకు...
ఆత్మనిర్భరత నీకు శ్రీరామరక్ష
ఎల్లవేళలా నీకదే అండాదండ..
స్వయంసమృద్ధిని సాధించు..
సాగిపో..ముందుకు...
స్వఆధారితజీవనం వైపు దృష్టి సారించు..
స్వావలంబన ఇచ్చే ధైర్యంతో
నిర్భీతిగా కదులు...
అహాన్ని మాత్రం దరిజేరనీకు...
నీ దృడసంకల్పమే సదా
నీ గుండె ధైర్యానికి చేయూత
నీ ఆశయసాధనకు ఊపిరిలూదే
స్ఫూర్తి ప్రదాత..తెలుసుకో..!
నీ భుజం నీవే తట్టుకో..
నీకోసం నీవే ఆలోచించుకో...
నాకేమీ తెలియదని దిక్కులు చూడకు
అవసరం నీకోసం దారులు సృష్టిస్తుంది
స్వయంకృషిని మించిన దేదీ
ఉండదని గ్రహించు...
నీలో ప్రతిభ నిజంగా ఉంటే అదే
నీకు పట్టం కడుతుంది..
అందుకే..నేస్తమా !
ఎదురు చూడకు ఎవ్వరికోసం
పయనం సాగించు ముందుకు...
🎋🎋🎋🎋🎋🎋🎋🎋🎋🎋🎋🎋🎋🎋🎋🎋
['విహంగ ' ఆన్లైన్ మహిళా మాస పత్రిక..
ఏప్రిల్ 2026 సంచికలో ప్రచురితమైన నా స్వీయ కవిత ]
