" పెరుగుట విరుగుట కొరకే " అన్న నానుడి అనాది నుండీ ఉన్నదే. కానీ ఈ మధ్య కొద్ది రోజులుగా వింటూన్న ఇంకా ప్రత్యక్షంగా చూస్తోన్న విపరీతాలు ఆ మాటని పూర్తిగా మార్చి పారేసేలా ఉంటున్నాయి.
ఈ ' కరోనా ' మహమ్మారి ఏ గడ్డు క్షణాల్లో ఉత్పన్నమైందోగాని అయిదు నెలలు దాటిపోయినా తగ్గడం అటుంచి రోజు రోజుకీ అనూహ్యంగా రెచ్చిపోతూ మనుషుల్లో ఎన్నడూ ఎరగని ఓ భీతి కలగజేస్తోంది. ఏ వైరస్ అయినా సహజసిద్ధంగా కొద్ది పీరియడ్ తర్వాత దానంతటదే తగ్గిపోతూ ఉండేది ఇదివరలో. లేదా వాటిని నిర్మూలించే మందులు త్వరగానే కనిపెట్టగలిగే వారు. కానీ ఇది కొరకరాని కొయ్యగా తయారై శాస్త్రవేత్తల్ని సైతం ముప్పుతిప్పలు పెడుతూ తలలు పట్టుకునేలా చేస్తోంది. " దేవుడా! దీనికి అంతం ఎప్పుడు? మళ్లీ మామూలు పరిస్థితి అన్నది అసలు వస్తుందా? " ఇదీ నేడు ప్రతి వారిని తొలిచేస్తున్న ప్రశ్న!
ఇదివరకు ఏ వైరస్ కు లేని ఆంక్షలు, ప్రత్యేకతలు ఈ మహమ్మారి కుండడం విశేషం !
- బయట కాలు పెడితే చాలు, మాస్క్ తప్పనిసరి. భౌతిక దూరం పాటించి తీరాలి. అంటరానితనం నేరం అని మునుపు అంటే అంటుకుంటే రోగం అంటున్నారు ఇప్పుడు !
- ఎవరింటికైనా వెళ్లాలంటే ఆలోచిస్తూ మన ఇంటికి ఎవరైనా వస్తున్నారంటే హడలి పోయే దుస్థితి !
- పూజలూ, వ్రతాలు ఇంటికే పరిమితం. వరలక్ష్మీ వ్రతం వాయినాలు బంద్. మా ఇంటికి వాయనాలు అంటూ ఎవరూ రావద్దు అని ఓ పూజారి గారు ఇంటి ముందు బ్యానర్ కూడా పెట్టారట! ( ఈరోజు తాజా వార్త )
- ఇదివరకు ఎవరింట్లో అయినా ఏ చిన్న సమస్య ఉత్పన్నమైనా వెళ్లి పరామర్శించి రావడం కనీస ధర్మంగా భావించేవారు. ఇప్పుడు మరణం సంభవించినా కదలడం లేదు.
- అనుకోని విధంగా దారిలో ఎవరికైనా ఏ ప్రమాదమైన జరిగితే పదిమంది కూడి ఆ వ్యక్తికి సహాయం అందించే సహృదయత అప్పుడుండేది. మరి ఇప్పుడు--- రోడ్డుపై పడి హఠాన్మరణం పాలైనా కనీసం కుటుంబ సభ్యులు కూడా స్పందించడం లేదు ! ( నిన్నటి రోజు గుంటూరు జిల్లా సత్తెనపల్లిలో జరిగిన ఉదంతం ఇందుకు నిదర్శనం. ఇదెంతటి హృదయవిదారకం !
- ' కరోనా ' తో మరణిస్తే చివరిచూపుకు కూడా నోచుకోని దౌర్భాగ్యస్థితి !
- అంత్యక్రియలకు అడ్డుకుంటూ ఒక చోటి నుండి మరో చోటికి తరిమేస్తూ మరణం తరువాత మనిషికి కనీస గౌరవమన్నది ఇవ్వని క్రూర మనస్తత్వం మనుషుల్ని ఆవరించడం !
- ఈ పరిస్థితుల్లో కర్మ కాలి ఏ అనారోగ్య స్థితి తలెత్తినా బేజారవ్వాల్సివచ్చి మానసికంగా మరీ దిగజారిపోతున్న జనం! డాక్టర్లు సైతం రోగిని పరీక్షించి చూడాలంటే ఆలోచిస్తున్నారు, నిరాకరిస్తున్నారు కూడా.
- గత కొద్ది నెలలుగా జరుగుతున్న విపరీత పరిణామాల వల్ల మరీ సున్నిత హృదయులు మానసిక రోగులుగా మారిపోయారని పేపర్లలో వార్తలు!
- ఇలా ఇలా ఇంకెన్నెన్ని దారుణాల్ని చూడాల్సి వస్తుందో !ఏమో !ఈ పెరుగుట ఆగిపోయి " పెరుగుట విరుగుట కొరకే " అన్న పై మాట నిజమైపోతే ఎంత బాగుంటుంది కదా !!
- ****************************************-
- మళ్ళీ కలుద్దాం
- *******
No comments:
Post a Comment