🌷🌹🌷🌹🌷🌹🌷🌹🌷🌹🌷🌹🌷🌹
పచ్చదనాల కొత్త కోక గట్టి
పసిడి వర్ణం మేనిలో నింపి
పరిమళాల పూదోట నుండి
పల్లవించే రాగాల తోడి
పరుగు పరుగున వస్తోంది
మన కోసమే మన కోసమే !
దోసిలి నిండా పూరేకులు
దోబూచులాడే కొత్త ఊసులు
కళ్ళ నిండా కోటి కాంతులు
ఎదనిండా ప్రేమానురాగాలు
ఒడి నిండా వరాల మూటలు
మోస్తూ మోస్తూ వస్తోంది
మన కోసమే మన కోసమే !
తెలతెలవారుతుండగా
పొగమంచు చీల్చుకుంటూ
వెలుగులు వెదజల్లుతూ
నిన్నటి చేదును మరిపిస్తూ
రేపటి 'ఆశ 'కు పునాది వేస్తూ
అదిగో అదిగో! అడుగిడుతోంది
నూతన సంవత్సరం! మన కోసమే!
" విషాదాలెన్నుంటే నేమిగాక ! లెక్క చేయకు!
మూసేయ్ గతాన్ని! ముందుకు కదులు !
వర్తమానం నీ చేతిలోనే! ఆలోచించు"
అంటూ ప్రగతి దారి పట్టమంటోంది !
అదిగో అదిగో ! అడుగిడుతోంది
🌺నూతన సంవత్సరం 🌺
స్వాగతిద్దాం సంబరాలు చేసుకుందాం
నిరాశా నిస్పృహలు వదిలేద్దాం
నీరసం నిశ్శబ్దం పక్కకునెడదాం !
నవ్వుతూ నవ్విస్తూ జీవనయానం సాగిద్దాం !
అదిగో అదిగో !నూతన సంవత్సరం!
అడుగిడుతోంది మనందరికోసం
స్వాగతిద్దాం సంబరాలు చేసుకుందాం !!💐🌷
🌷🌺🌷🌺🌷🌺🌷🌺🌷🌺🌷🌺🌷🌺🌷🌺
No comments:
Post a Comment