నిన్న మొన్నటి చిన్నారి చిట్టితల్లి
నేడో అందాల అపరంజి !
పట్టభద్రురాలైన పాతికేళ్ల పడతి
అయినా --
అయింది తండ్రి గుండెల మీద కుంపటి
పెళ్ళి చూపుల తంతు మొదలైపోయి
ఆక్రోశించిందామె అంతరంగం
రుణగ్రస్తుడై కన్నతండ్రి
అనారోగ్యం పాలై తల్లి !
కడకు పడిందామె మెడలో తాళి !
తరలి వెళ్ళింది ఇల్లాలై మరో ఇంటికి
అక్కడ --
అత్త...అత్తమ్మ కాలేక ఆరళ్ళు ఆరంభం !
తల్లి కొంగు చాటు మగడు !
ఆలి బాధ అర్థం చేసుకోడు
ముద్దూ మురిపాలు మృగ్యమై
మూడేళ్లు గడిచిపోయి
అయ్యిందా అతివ తల్లి !
కొడుకును గన్న తల్లి !
ఒడిని జేరిన ముద్దు పాపడు
అయ్యాడామె ఆరోప్రాణం !
ఏళ్ళు గడిచి ఎదిగాడు కొడుకు
అత్త కాబోవు తరుణమాసన్నమాయె
ఏమి చిత్రం !!
కొత్త హోదా మత్తు ఆవరించెనో ఏమో !
గతం మరిచి వరకట్నవీధిని బేరమాడుచుండె !!
మరో ఆడపిల్ల ఆవేదన
ఎంత మాత్రం పట్టదాయె !
ఆహా ! నేటి కోడలా !
రేపటి అత్తవు నీవే కదా !
వ్యధల పాలైన నీవే
వ్యధలకు మూలం అవుతున్నావే !
చరిత్ర పునరావృతం
అంటే ఇదేనేమో !!
******************************
🌷భువి భావనలు 🌷
******************************
No comments:
Post a Comment