ఏడు పదులు దాటిన స్వతంత్ర భారతావని
అతివకొసగిన ఆనందానుభూతి ఏది ?
అహరహం శ్రమించినా పట్టెడన్నం నోచని వైనం !
బడుగు జీవియై లాగిస్తోంది బతుకు బండి పాపం !
అయినా -- సహనం కోల్పోలేదు మరి-- ఆమె నారీమణి!
చదివి చదివి అలసిసొలసి ఆదమరచి నిదరోయిన
చిన్నారి చిట్టితల్లి విహరిస్తోంది
రేపటి ఆశల రెక్కల గుర్రం పైని
కలలు తీరం చేరక కల్లలై వెక్కిరించిన క్షణాన
ఏడుస్తుంది పాపం, పొగిలి పొగిలి!
అయినా స్థైర్యం కోల్పోదు మరి --
ఆమె నేటి తరుణీ ప్రతినిధి !🙋
కన్యాశుల్కం కనుమరుగై వరకట్నం వట వృక్షమై
అప్పుడూ ఇప్పుడూ బలిపీఠం తనకే సొంతమై
ఉరి బిగుస్తూ తపిస్తూ తపిస్తూ
తల్లడిల్లుతున్న తటిల్లత !😔
కోర్కెలు శిధిలమై కోరింది అందకున్నా
అందినదే అందలం అనుకునే నెలత !
ఎందుకంటే -- నాడు, నేడు --ఏనాడైనా
ఆమె ఓ సగటు మహిళ !
అంతటి ధీరవనిత నేడు --
మహిలో మానవమృగాల మధ్య
మనలేక మగ్గిపోతున్నదే !
సహనం, సర్దుబాటు, ఓర్పు, నేర్పు, దీక్ష, దక్షత
త్యాగం, శీలం --అన్నీ కలబోసుకున్న ధన్యజీవి !
దుష్టసాంప్రదాయాల దురంతాల కోరల జిక్కి
నలిగిపోతున్నదే ! ఈ సమాజం ఏ తీరున మారాలి?
మహిళాదినోత్సవాలెన్ని వచ్చిపోతున్నా
మారని ఈ రాక్షస వైఖరినేమనాలి?
స్త్రీ, పురుష సమానత్వం మాటలకే పరిమితమైతే
చట్టాలన్నీ కాగితాల్లోనే పదిలమైతే
తరుణి తలరాత మారడం ఎలా సంభవం !
అర్ధరాత్రి ఆడది ఒంటరిగా నడిచిననాడే
అసలైన స్వాతంత్య్రం అన్నావు
పట్టపగలే పడతికి పదుగురున్నా
రక్షణ కరువైన దుస్థితి పైనుండి చూస్తూ
ఓ మహాత్మా ! ఎంతగా కుమిలిపోతున్నావో గదా !
చివరగా --
ఎవరో వచ్చి ఏదో చేస్తారని
దిక్కులు చూస్తూ ఎదురు చూడడం
ఎండమావిలో జలధారకై
వెతుకులాడుతూ తపించడమే !
మహిళకు మనుగడ సడలని తన మనోధైర్యమే
తరగని చెదరని ఆత్మవిశ్వాసమే
సదా ఆమెకు రక్షణ కవచం
ఈ నిజం గ్రహించగలిగితే చాలు
ప్రతి స్త్రీ అవుతుంది ఓ ఉక్కు మహిళ !
అందుకే --
ఓ మహిళా ! మేలుకో !
మేలుకొని నీ భవిత నీవే తీర్చి దిద్దుకో !
అబలను కాను సబలను
అని నిరూపించుకో !! 🙏
🌷🌷🌷🌷🌷🌷🌷🌷🌷🌷🌷🌷🌷🌷🌷
నేడు [ 08.03.2021 ]
మహిళా దినోత్సవం 💐
🌷🌷🌷🌷🌷🌷🌷🌷🌷🌷🌷🌷🌷🌷🌷
🌺 భువి భావనలు 🌺
No comments:
Post a Comment