మధురమైన భాష

తేనెను మించిన మాధుర్యం 
తెలుగు భాషకే సొంతమన్నది నిత్యసత్యం 
ప్రతిపదంలో పరిమళించే కమ్మదనం 
ప్రతీ పాదంలో జాలువారే రసరమ్య భావజాలం !
అమ్మ ప్రేమను గురుతుకు తెస్తుంది ప్రతీక్షణం !

యాభై అక్షరాల కూర్పుతో 
అలరారే తెలుగు అక్షరమాల 
సంస్కృతీసంప్రదాయాల విలువలు 
చాటిచెప్పే వరహాల విరులమాల 

కలం పట్టి కాగితం వేపు అలవోకగా 
చూస్తే చాలు ఆలోచనలు అక్షరాలై 
బారులు బారులుగా సాగిపోతూ 
మధురగీతాలై మది నిండిపోయి 
ఆనందపు వెల్లువలు కురిపిస్తాయి !
 
పరభాషను ప్రేమించటం తప్పని అనం 
తల్లిభాష ప్రాధాన్యం ఎరుగకపోవడమే నేరం 
భావవీచికలు చుట్టుముట్టి 
చెలరేగిన వేళ అవి సరైన ఆకృతి దాల్చి 
నిలిచేది సొంత భాషలోనే 
గుండె వేదనాభరితమై 
కుంగుతున్న వేళ కారే కన్నీటి చుక్కలు 
శిలలను సైతం కరిగించగల 
కావ్యాలయేదీ సొంతభాషలోనే !
అమ్మ తోడి సాన్నిహిత్యం 
మరెవ్వరితోనైనా సాధ్యమా మరి !!

*************************************