అన్నా ! రైతన్నా !

అన్నా !రైతన్నా !
నీకెంత కష్టం వచ్చిందన్నా !
నలుగురికి పెట్టే చేయి నీదన్నా 
 నలిగి పోతున్నావు కదన్నా
 హలం పట్టి పొలం దున్ని
 నారు పోసి నీరు పోసి
 బండెడు బాధ భరించి
 మట్టి నుంచి మంచి
 ముత్యాలు సృష్టించి
 జనాల దోసిలి నింపి
కాలే కడుపుల ఆకలి తీర్చి 
 నేనున్నానంటూ నిలిచే రైతన్నా 
 నీకెంత కష్టం వచ్చిందన్నా !
 ఆరుగాలం శ్రమించి పండించి
 అమ్మకానికెళ్తే ' కరోనా ' అంటారు
 ' లాక్ డౌన్ ' అంటారు 
 పారబోసి పరుగులు తీయిస్తారు 
 కూరగాయలు కుళ్ళిపోయి 
 ఆకుకూరలు వడలిపోయి
 గుండెకు మానని గాయాలై 
 అన్నా, రైతన్నా ! 
 నీకు ఎంత కష్టం వచ్చిందన్నా !
 పండించే రైతుల కష్టం
 పక్కకు నెట్టేస్తే 
 అన్నదాతకు అవమానమే
 మిగిలిస్తే పళ్లెంలోకి
 పరమాన్నం కాదు కదా
 పట్టెడన్నం కూడా పుట్టదు కదా!
 అన్నా ! రైతన్నా !!   

*****************************************
యం. ధరిత్రీ దేవి 
మళ్ళీ కలుద్దాం !
*****************************************