ఎన్ని సుడిగుండాలు ! ఎన్నెన్ని ఎత్తుపల్లాలు! కొండలు,లోయలు, బండరాళ్లు! అడ్డుపడినా అదరక బెదరక, వెనుదిరగక, మిన్ను విరిగి మీద పడ్డా భీతిల్లక... ప్రశాంతంగా, గంభీరంగా సాగిపోయే నదీమతల్లి ప్రవాహంలా కదులుతూ పోయేదే కాలం!! క్షణం ఆగని ఆ పయనం యుగయుగాలుగా, తరతరాలుగా సాగుతోంది. ఆ గమనంలో ఆనందమే కాదు.. విషాదాన్నీ చవిచూస్తుంది. ఎన్నెన్నో అనుభవాల్ని మూటగట్టుకుంటుంది. మనిషికి సందేశాలను ఇస్తుంది, గుణపాఠాలనూ నేర్పిస్తుంది.
అప్పుడప్పుడూ... పరవశిస్తూ, వినూత్నంగా వెల్లివిరుస్తుంది... అదే.. ! కొత్త సంవత్సరాన్నంటూ.. ! కొత్త పేరుతో నవ్యతనద్దుకుంటుంది. 🙂
" గతంలో జీవించకండి "
" వర్తమానం విలువ తెలుసుకోండి "
" రేపటి కలల్ని నిజం చేసుకోండి "
-- అంటుంది. భుజం తడుతూ ముందుకు నడవమంటుంది. తనలాగే... అచ్చం తనలాగే.. తడబడక సాగమంటుంది కాలం. కాలగమనమది ! ఎప్పటికీ ఆగని నిరంతర ప్రవాహమది !
ఆ గమనంలో... అదిగో.. ! ప్రవేశిస్తున్నది ముస్తాబౌతున్న మరో కొత్త సంవత్సరంలోకి. కొత్త ఆలోచనలతో, కొత్త తీర్మానాలతో సరికొత్తగా సిద్ధం కమ్మంటున్నది. అందర్నీ తనతో కదిలి రారమ్మంటున్నది.
అదిగో... అదిగదిగో.. !😊 వచ్చేసిందిగా... 2023 నూతన సంవత్సరం ! ముక్తకంఠంతో స్వాగతిద్దాం... 🙂
🌷💐💐💐🌷💐💐💐🌷
No comments:
Post a Comment