👌
పచ్చా పచ్చని ముద్దబంతివే !
పరుచుకున్న పసిడి వర్ణం పరిమళభరితమే !
ఏ తోటలో ఏ కొమ్మను విరబూసితివే !
ఏ దోసిలి నిండి ఎన్నెన్ని దూరాలు దాటి
ఇట కేతెంచితివే !!
మా ఇంటికొచ్చి వెలుగులు వెదజల్లి
పసుపు రాసిన మా గడపకు
వెలలేని అందాలు అద్దినావే !
గుదిగుచ్చిన మాలవై గుభాళిస్తూ
మా గుమ్మానికి తోరణమైనావే !
ఇంతకీ ---
ఏ తోటలో ఏ కొమ్మను విరబూసితివే ?
ఏ దోసిలి నిండి ఎన్నెన్ని దూరాలు దాటి
ఇటకేతెంచితివే ?
ముంగిట ముచ్చట గొలిపే
ముత్యాల ముగ్గు అదిగో, చూడరమ్మ !
ఆ మధ్యన ముద్దులొలికే గొబ్బెమ్మ !
పైన ఠీవిగా నీ సోయగం! అద్భుతమమ్మ !!
ఆ సొగసు వర్ణింప నా తరమా! ముద్దబంతమ్మ !
ఇంతకీ ---
ఏ తోటలో ఏ కొమ్మను పూసితివో ?
మరి, ఏ దోసిలి నిండి ఎన్నెన్ని దూరాలు
దాటి మా ముంగిట నిలిచితివో ?
వాలుజడ వయ్యారి సిగను ఒదిగి
మబ్బుల మాటున చందమామను బోలి
వేయి రేకులొక్కపరి విప్పుకుని
వినూత్నరీతిని శోభిల్లినావే !!
ముద్దబంతి పువ్వా ! ముద్దరాలి
ముద్దుమోము నీ ముందేపాటిదమ్మ !
ఇంతకీ, చెప్పవా,
ఏ తోటలో ఏ కొమ్మను విరబూసితివి ?
ఏ దోసిలి నిండి ఎన్నెన్ని దూరాలు
దాటి మమ్ముల మురిపింప
మా ముంగిలి జేరితివి ? 🙂
🐦🐦🐦🐦🐦🐦🐦
No comments:
Post a Comment