కల్లాకపటం ఎరుగని
పాలబుగ్గల ఆ పసితనం
కల్మషం, కాఠిన్యం దరిజేరని
బాధ్యతలకతీతమైన నా బాల్యం
నాకు మళ్ళీ కావాలి
కదులుతున్న కాలమా, కాస్త ఆగవా !
వెనుకకు మరలి గతంలోకి పరుగిడవా !
ఏ బంధం లేని బంధువులు
అనుబంధాలే బంధాలై
పెనవేసుకున్న స్నేహాలు
అయిన వాళ్ళను సైతం మరిపించి
మధుర స్మృతులుగా మిగిలిపోయిన
నా నేస్తాలు! నాకు మళ్ళీ కావాలి
ఆ స్వేచ్ఛ జీవనంలోకి
తిరిగి నను నడిపించవా !
నిద్రలేని రాత్రులు, తీరిక దొరకని క్షణాలు
అయినా ప్రతీ క్షణం ఎగసి పడే ఆనందకెరటాలు !
తీయనైన ఆ బానిసత్వసేవలు !
నడివయసులో నడిసంద్రంలో ఆ జీవనయానం
గతించిన గతంలోని సజీవ జ్ఞాపకాలతో సహజీవనం
నాకు మళ్ళీ కావాలి, ప్రసాదించవా !
ఒక్క ఘడియ సైతం తిరిగి రాదని తెలుసు,
అయినా ఏదో ఆశ!
అత్యాశే అయినా మారాం చేస్తోంది పిచ్చి మనసు !
అందుకే --
ముందుకు కదులుతున్న కాలమా, ఆగిపోవా!
ఒక్కసారి వెనుదిరిగి గతంలోకి చేరుకోవా!
పసిపాపగ మళ్ళీ పుడతా,
ఆ మహద్భాగ్యం నాకు కలిగించవా !!
🌺🌺🌺🌺🌺🌺🌺🌺🌺🌺🌺🌺🌺🌺
* భువి భావనలు *
🌺🌺🌺🌺🌺🌺🌺🌺🌺🌺🌺🌺🌺🌺
No comments:
Post a Comment