మనసారా చెబుదాం శుభాకాంక్షలు...

 🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹

 ఎగుడు దిగుడు దారుల్లో 

 ఎదనిండా బాధల బరువు మోస్తూ...

 అడపాదడపా అంతో ఇంతో 

 మధురిమల నాస్వాదిస్తూ...

 జీవనగమనం సాగుతూ సాగుతూ.. 

 ఓ వత్సరకాలాన్ని వెనక్కి నెట్టి ..

 మరో వత్సరంలోకి ప్రవేశిస్తూన్న 

 తరుణాన..మనకెందులకీ ఎగసిపడే 

 సంతోష తరంగాల వెల్లువ..!!. 

 ఒక్క రోజు దాటితే సద్దుమణిగి మరల 

 చీకూచింతలూ..పలకరించే 

 సమస్యల సవాళ్లు..మామూలేగా!

 అయినా..అన్నీ కట్టిపెట్టి..

 ఆవలకు నెట్టి..ఆనంద డోలికల్లో 

 ఊగుతూ ఆహ్వానం పలుకుతున్న

 ఓ మనిషీ..! నీకు జోహార్లు..

 బాధలన్నీ మరిచిపోయి... 

 బరువంతా దించేసుకుని...

 తీపిని నెమరేసుకుంటూ..

 కలిమిలేములు..కష్టసుఖాలు..

 కావడికుండలన్న నిజాన్ని చాటుతూ...

 రేపటిపై ఆశలు పెంచుకుంటూ...

 ఒక్కరోజు..ఈ ఒక్కరోజు గడుపుదాం

 అందరితో కలిసి..చేతులు కలిపి..

 అంటూ..స్ఫూర్తి పాఠాలు నేర్పిస్తూ..

 నూతనోత్సాహం నింపుతూ 

 వడివడిగా సాగే నీకు నీరాజనాలు..

 నీవందించే సందేశంతో..సంతోషంగా..

 మనసారా..అడుగిడుతున్న 

 ఆంగ్ల సంవత్సరానికి 

 చెబుదాం శుభాకాంక్షలు... 💐

  💐🌹Happy New Year  2026💐🌹

🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹

పుస్తకం... నా ప్రియ నేస్తం...

.                                          

🌷🌷🌷🌷🌷🌷🌷🌷🌷🌷🌷🌷🌷🌷🌷🌷

                                            ~ యం. ధరిత్రీ దేవి 

   పుస్తకం నా ప్రియ నేస్తం...

   నాకు ప్రాణప్రదం...

   అలసిన వేళ సేదదీర్చే ఔషధం

   ఒంటరినైన...ఊరడించే నెచ్చెలి...

   తెరిస్తే చాలు...అక్షరాలు కావవి...

   అనంతకోటి ఆలోచనలు 

   కొలువుదీరిన కూటమి...!

   మేధావుల కలం నుండి జాలువారి

   చెక్కుచెదరక నిలిచిన 

   అక్షర శిల్పాలే మరి...!!

   అలరిస్తూ..మురిపిస్తూ ఒకసారి...

   నవ్విస్తూ..విషాదంలో ముంచేస్తూ

   మరోసారి...అంతలోనే...

   ఓదారుస్తూ.. నిద్రాణమైన శక్తిని 

   తట్టిలేపుతూ..బద్ధకాన్ని వదిలిస్తూ...

   గమ్యం చూపిస్తూ..ఆగకుమా 

   సాగిపొమ్మంటూ..వెన్నుతడుతూ 

   ముందుకు తోసే స్ఫూర్తిప్రదాతలు 

   ఆ అక్షర దీపాలు...!!

   పుస్తకం..కాదు హస్తభూషణం...

   మస్తిష్కాన్ని మధించే 

   మహిమాన్విత ఉపకరణం..

   ఉజ్వల భవితకు సోపానాలు 

   వేసే ఉత్తమోత్తమ సాధనం...!

   విజ్ఞాన వినోదాల భాండాగారం...

   కాలక్షేపం కలగలసి..లభ్యం..

   మానసికోల్లాసం...!

   పుస్తకపఠనం..మెదడును

   పదును పెట్టే ఇంధనం...

   కావాలి దినచర్యలో అదో భాగం..

   నూతనోత్తేజానికి పడుతుందపుడే బీజం!!

   అందుకే...పుస్తకం నా ప్రియనేస్తం..

   నాకు ప్రాణప్రదం...!

🌷🌷🌷🌷🌷🌷🌷🌷🌷🌷🌷🌷🌷🌷🌷

భరతభూమి మనదిరా...

 పల్లవి :

 భరతభూమి మనదిరా 

 భరతజాతి మనదిరా 

 మహామహులు జనియించిన 

 మహిమాన్విత చరితగల 

 ధాత్రి మనది సోదరా 

 జోహార్ జోహార్ అనరా 

 జైహింద్ జైహింద్ అనరా సోదరా       // భరత//

 చరణం :

 శతాబ్దాల పరపీడన 

 సొంత ఇంట పరాయి భావన

 వేదనలకు యాతనలకు 

 సమాధులే కట్టిన కరంచంద్ గాంధీ 

 నడయాడిన ధరణి ఇదీ మనదిరా 

 భరతమాత ముద్దుబిడ్డ తానెరా

 జాతిపితగ ఇల నిలిచినాడురా

 జోహార్ జోహార్ అనరా 

 జైహింద్ జైహింద్ అనరా సోదరా       //భరత//

 చరణం :

 గుజరాతున పుట్టినాడు 

 గుండె ధైర్యమున్నవాడు 

 సర్దారై నడిచాడు   

 ఉక్కుమనిషి అయినాడు 

 సమగ్రతకు సమైక్యతకు 

 చెరిగిపోని చిహ్నమతడు 

 అతడే మన పటేలు 

 వల్లభ భాయ్ పటేలు

 జోహార్ జోహార్ అనరా 

 జై హింద్ జై హింద్ 

 అనరా సోదరా                                   //భరత//

 చరణం :

 జవహరంటె ఆభరణం

 జగతిని అతనో ఉజ్వల కిరణం 

 ఆనందభవనాన జనియించినాడు 

 అందరికీ ఇష్టుడు అయినాడు చూడు

 పగ్గాలు పట్టిన తొలి ప్రధాని అతడు

 స్వతంత్రభారతాన వెలుగులీనినాడు 

 గులాబీల అభిమాని బాలలంటే కడుప్రీతి 

 జోహార్ జోహార్ అనరా

 జైహింద్ జై హింద్ అనరా  సోదరా              //భరత //

 చరణం :

 తెలుగు వీర లేవరా అన్నాడు 

 మన్యం వీరుడు మన అల్లూరి 

 కదిలాడు కదనరంగమే సృష్టించాడు 

 ఆంగ్లేయుల గుండెల్లో నిదురించినాడు 

 గుండె తూట్లు పడుతున్నా ఎదురొడ్డి నిలిచాడు 

 వందేమాతరమంటూ నేలకొరిగాడు 

 జోహార్ జోహార్ అనరా

 జైహింద్ జైహింద్ అనరా సోదరా          // భరత //

 

 

 

తెలుగంటే వెలుగురా...

                                   ~యం. ధరిత్రీ దేవి

[ తెలుగు భాష ప్రస్తుతం ప్రాధాన్యత కోల్పోతున్నదన్నది అందరికీ విదితమే. ఇలాంటి పరిస్థితుల్లో మన మాతృభాష తెలుగును కాపాడుకోవలసిన ఆవశ్యకత ఎంతైనా ఉన్నది. తెలుగు భాష ప్రాధాన్యతను తెలియజేస్తూ ఓ చిన్న గేయం నా మాటల్లో.. ]

కదలిరండి కదలిరండి తెలుగు బిడ్డలారా 

కరం కలిపి కదం కదిపి కదలండీ తెలుగు తమ్ములారా

ఒక్కటిగా నడుద్దాం పోరాటం సాగిద్దాం

అమ్మ భాష గౌరవం నిలబెట్టి చూపుదాం 

నలుదిశలా మన తెలుగు బావుటా ఎగరేద్దాం 

                                                          //కదలి రండి// 

దేశభాషలందు తెలుగు లెస్సయనీ 

అన్నాడు ఆంధ్రభోజుడు

తెలుగు భాష సంగీతమంటు 

పొగిడెనుగా రవీంద్రుడు  

భాషలోన తీయదనం తెలుగుకే సొంతమూ 

మధురమైన తెలుగుభాష మనదే ఇది నిజము

తెలుసుకొనుము చవిచూడుము తమ్ముడూ

తెలుగునేల జన్మించిన మనమంతా ధన్యులము 

                                                          //కదలిరండి//

కవులెందరో విరచించిరి కావ్యాలెన్నో

గాయకుల గళం నుండి జాలువారె తేనెలూరు గేయాలెన్నో/

మాతృభాష మాధుర్యం మూటగట్టి మన చేత పెట్టి /

మహామహులు నిలబెట్టిరి తెలుగు కీర్తి శిఖరాన / 

వారి బాట నడవాలీ అది మన ధర్మం 

అమ్మ భాష ప్రాధాన్యత చాటాలీ 

అందరమూ..అది మన కర్తవ్యం

                                                          //కదలిరండి //

అభ్యాసం కోరనిదీ అమ్మపాలతో  ఒడిసిపట్టేది

అమ్మభాష అమృతమిది అమ్మ ప్రేమ అమరమే సోదరీ

అవగాహన లేని చదువు వ్యర్థమురా వినుమురా 

అమ్మ భాషతోనె అదీ సాధ్యమనీ నమ్మరా

తెలుగుజాతి మనదిరా తెలుగునాడి పట్టరా

తెలుగంటే వెలుగురా తెలుగు నేర్చి 

వెలుగులోకి వేగిరమే  నడవరా    

                                                          //కదలిరండి//

         

 

చదవక మది నిలవదే !

 తెల్లారింది ! దిన పత్రిక వచ్చేసింది!

 వార్తల్ని మోసుకొచ్చింది..తెరవాలంటే భయం!

 నిండా వెక్కిరించే సమస్యల తోరణాలు!

 మింగుడుపడని నమ్మలేని నిజాలు!

 అయినా, తెలుసుకోవాలన్న కుతూహలం!

 చదవక మది నిలవదు... ఆపై...

 మదనపడక మానదు..పిచ్చి అంతరంగం !

 పదవుల కోసం కుమ్ములాటలంటూ ఒక చోట

 రాజకీయ చదరంగపు ఎత్తుగడలంటూ

 కుట్రలు కుతంత్రాలంటూ మరోచోట!

 రక్తసిక్తమైన రహదారులంట!దుర్మరణాలంట !

 దోపిడీ దొంగల దురాగతాలంట 

 దుర్మార్గుల అరాచకాలట !

 ఇంకా--హత్యలు ! ఆత్మహత్యలు!

 పరువు హత్యలు ! ఇవి చాలవన్నట్లు--

 అడుగడుగునా సంచరించే మానవ మృగాలు!

 రక్షణ కరువై రోదించే అబలల ఆర్తనాదాలు!😔

 'అయ్యో!మమ్ముల మరిచావా'అంటూ, 

 అదిగో, అంతుబట్టని వైరస్ మహమ్మారులు, 

 వాటి 'వేరియంట్లు' !!😅 అంతేనా !

 రగిలిపోతూ కుల మత విభేదాల కార్చిచ్చులు !

 ముందుకు కాదు వెనక్కి నడుద్దామంటూ 

 దుస్సాంప్రదాయాలు ! దురభిప్రాయాలు ! 

 రకరకాల రంగురంగుల చిత్ర విచిత్ర 

 విన్యాసాలు ! విపరీతాలు !

 ఆసాంతం వెక్కిరించే సమస్యల తోరణాలే !!

 కానరావే ఏ మూలనా ఆశాకిరణాల చిరుదివ్వెలు !

 నక్కినక్కి ఏ మూలనో ఒకటీ అరా దాగినా 

 అన్నింటి నడుమా చిక్కిపోయి అందిన 

 ఆవగింజంత ఆనందం కాస్తా 

 ఆవిరైపోతుంది కదా ! 

 అందుకే భయం, తెరవాలంటే భయం !

 అదిగో, మళ్ళీ తెల్లవారింది !

 దిన పత్రిక మళ్లీ వచ్చేసింది !

 వార్తలెన్నో  మోసుకొచ్చింది

 మళ్లీ మామూలే! తెరవాలంటే భయం!

 కానీ.. చదవక ఉండలేరే పిచ్చి జనం !!

       ****      *****       ****      ****

 

ఎన్ని కలలు.. ఎన్నెన్ని ఆశలు..!!

"ఆకాశానికి చిల్లు పడిందా... 

అన్నట్లు జోరున వర్షం...

అయినా ఆగక గమ్యం చేరడమే 

లక్ష్యంగా దూసుకుపోతున్న వాహనం...!

ఆదమరిచి నిశ్చింతగా నిద్రిస్తున్న 

అమాయక జనం...ఒక్కసారిగా

భయంకరమైన విస్ఫోటనం !!  

కన్ను మూసి తెరిచేలోగా

బూడిదగా మారిన క్షణం !

ఆ నిశీధి వేళ.. ఆహుతైపోయి...

మాంసపుముద్దలై మిగిలిన 

మానవ నిర్జీవ శరీరాలు !!"

స్పందించని హృదయముండునా!

ఇటువంటి దుర్వార్త విన్న క్షణాన..

ఆక్రోశించని మనిషుండునా!

జీవితం క్షణభంగురమేనా !!

గాలిబుడగేనా ఈ బ్రతుకు!!

అనిపించదా ఎవరికైనా...

ఎన్ని కలలు! ఎన్నెన్ని ఆశలు !!

అన్నీ కల్లలై బ్రతుకులే తెల్లారిపోయే!! 

ఊహించని ఉత్పాతమా...

ఎంత వేదన మిగిల్చితివో కదా!

ఎన్ని పెనవేసుకున్న బంధాలు..క్షణంలో

తెగిపోయి తలరాతలు మారిపోయెనో ! 

ఎన్ని కుటుంబాలు దిక్కులేక 

అయిపోయెనో కదా అనాధలు !

ఇది విధివిలాసమా ! 

విధాత వ్రాసిన విషాద గీతమా !!

నా ఆశావాదం నా ఊపిరి...

 

నా కలలు కల్లలై కూలిన నాడు 

కలవరపడను..మరో కలకు 

ఆహ్వానం పలుకుతాను...

నిరాశ నిస్పృహలు  ముంచెత్తిన క్షణాన 

నీరసించిపోను..నన్ను నేను నిందించుకోను.. 

తడబడక నిలబడి అడుగులు కదుపుతాను 

అవహేళనలు..అవమానాలు...

నా భావి కట్టడానికి పునాదులు.

ప్రతి అపజయం నా విజయానికి ఓ మెట్టు 

ఆ నిచ్చెన నాకో ఆసరా...

నిత్యం భుజం తడుతూ ఇచ్చే భరోసా...

నా దృఢసంకల్పం నాలో 

నవ చైతన్యానికి రహదారి...

ఒకనాటికదే నా చేతికందే 

సత్ఫలితానికి నాంది..అందుకే...

కలలు కల్లలైతే కలవరపడను...

మరో కలలో లీనమవుతాను...

నా ఆశావాదం నా ఊపిరి...

నా జీవనగమనానికి అదో తిరుగులేని 

ఇంధనం..అనుక్షణం..ఆగక నను

ముందుకు నడిపించే ఆయుధం...  

[ 'విహంగ' అక్టోబర్ 2025 మహిళా మాస పత్రికలో నా కవిత]