భూమాతా... నీకిదే వందనం 🙏

🌹🌹🌹🌹🌹🌹🌹🌹🌹🌹🌹🌹🌹🌹🌹🌹

                                ~ యం. ధరిత్రీ దేవి 

కొండలు తవ్వి కోటలు కడుతున్నా...

గునపాలు గాయాలు చేస్తున్నా...

గరళం గొంతులో నిండిపోతున్నా...

పెదవి విప్పదు...చలించదు...

ఆనకట్టలు కట్టి అలవికాని భారమైనా..

ఆక్రోశించదు.. అసహనం అసలుండదు...

వటవృక్షాల వేళ్ళు గుండె లోతుల్లోకి 

చొచ్చుకుని గుచ్చుకుంటున్నా.. 

చిరునవ్వులు చిందిస్తుంది...

పర్వతాల్ని భుజాలపై మోస్తుంది...

సముద్రాల్ని కడుపులో దాచేస్తుంది...

పంటలు పండిస్తుంది... 

పశుగ్రాసాన్నిస్తుంది...

అందరి కడుపులు నింపుతుంది...

అందరికీ ఆవాసాన్నిస్తుంది...

స్వార్థపూరిత మనుషుల చేష్టల్ని 

పసిపిల్లల అల్లరి అనుకుని 

నవ్వుకుంటుంది...క్షమిస్తుంది... 

అన్నీ భరిస్తుంది...అంతా సహిస్తుంది..

ధరణికి కాక మరెవరికుంటుంది..

ఇంతటి ఓరిమి...!! భూమాతా !

నీకిదే వందనం... పాదాభివందనం...🙏

🌹🌹🌹🌹🌹🌹🌹🌹🌹🌹🌹🌹🌹🌹🌹🌹