అదిగో వర్షం !
మొదలైంది చిరుజల్లుగా
తడుస్తోంది నేల మెల్లమెల్లగా...
పుడమితల్లి పరవశిస్తూ
మట్టి వాసనల కమ్మదనాన్ని అందిస్తూ
పులకరించిపోయింది ఒక్కసారిగా !
అల్లదిగో.. మొలకలు! చిట్టి చిట్టి మొలకలు!
నేలంతా పరుచుకుని !!
తల్లి ఒడి నుండి తొంగి చూస్తూ... !
చూస్తున్నా మైమరచి... చూస్తూనే ఉన్నా...
మొలకలు పెరిగాయి
పెరిగి పెరిగి పెద్దయి చెట్లయినాయి..!
ఆహా ! ఆ చెట్ల నిండుగ పూలు !!
రకరకాల పూలు! రంగు రంగుల పూలు!
పరిమళాలు వెదజల్లుతూ...
కొత్త కొత్త సొబగులేవో అద్ది
ప్రకృతిని రమణీయం చేస్తూ...
తీపి తీపి తేనియలు స్రవిస్తూ...
అదిగో..! గ్రోలుతూ తుమ్మెదలు!!
ఝుమ్మంటూ అవి చేసే నాదాలు !
వింత వింత సంగీత తరంగాలై
హృదిని తాకుతూ పలికిస్తూన్నాయి
ఏవో..ఏవేవో మధుర స్వరాలు !!
ఏ సంగీతకారుడూ కట్టలేని బాణీలవి !
ఏ గాయకుడూ ఆలపించజాలని
కమ్మ కమ్మని గీతాలవి !!
ప్రకృతితో మమేకమై ఆస్వాదించగల
మదికి మాత్రమే వినిపించే రాగాలవి !!
🐦🐦🐦🐦🐦🐦🐦🐦🐦🐦🐦🐦🐦🐦🐦
No comments:
Post a Comment