భగభగ మండే ఎండలు
భరించలేని ఉక్కపోతలు !
చల్లగాలికై ఎదురుచూపులు
అలసి సొలసి పోతున్న దేహాలు...
మొరపెట్టుకుంటూ జోడించాయి చేతులు !
"భానుడా ! చాలించవా ఇక
నీ ప్రతాపం, చూపించవా
మాపై కాస్త కనికరం !"
జనాల ఘోష విన్నాడేమో
సూర్య భగవానుడు...
ఆకాశం నిండా కమ్ముకున్నాయి
నీలి నీలి మేఘాలు !
మేఘాల నిండా కదుల్తూ నీటికుండలు !
చల్ల గాలి సోకింది
చిరు జల్లు కురిసింది
తొలకరితో నేలంతా తడిసింది!
ప్రకృతి పరవశించింది !
అంతలోనే --
వానలు అయ్యాయి వరదలు
వెల్లువెత్తి మిగిల్చాయి వేదనలు !
మళ్లీ మొదలు... వేడుకోలు !!
"వరుణుడా ! కనికరించు !
శాంతించి మమ్ము కాపాడు.. "
వానదేవుడూ విన్నాడేమో?
గాడిని పడింది జనజీవనం
సాగించింది నవజీవనం...
మళ్ళీ అంతలోనే ---
మొదలైంది చలి మెల్లిగా...
మొదట ఆహ్లాదమే ! ఆపిదప...
ఆరుబయట ఆకాశం చూస్తూ
ఎండకోసం వేచిచూస్తూ...
' అబ్బా!చలి!తాళలేము'
అంటూ వణుకుడే !!
" ఔరా ! మానవ నైజం !"
తక్కువైనా ఎక్కువైనా
తట్టుకోలేరుగా జనం !
అవసరానికి మించి అందితే
ఏదైనా మరి అంతే...
సహజం ! అది సహజమే 😊! !
************************************
No comments:
Post a Comment