సాయంత్రం ఆరున్నర దాటింది. టీవీలో కొత్త సినిమా చూస్తోందన్న మాటే గానీ నవీన లో మెల్లిగా ఏదో గుబులు తొలి చేయడం మొదలైంది. పక్కన ఉన్న భర్త, ఇద్దరు పిల్లలు, అత్తగారు, మామగారు ఇంకా ఆడపడుచూ... అంతా తెగ ఎంజాయ్ చేస్తున్నారు సినిమాని. కానీ నవీనే .. ఆ అదృష్టానికి నోచుకోలేక పోతోంది. కారణం?...
శనివారం వస్తోందంటే మహదానందం. ఎందుకంటే అది దాటితే ఆదివారం వస్తుంది కదా మరి ! ఆరు రోజులపాటు ఎదురు చూస్తే వచ్చే ఒకే ఒక ఆటవిడుపు ఆదివారం. అదిగో.. శనివారం రాత్రి గడిచిపోయి తెల్లారింది. అమ్మయ్య ! వచ్చేసింది ఆదివారం ! అందరికీ ఇష్టమైన, ఎంతో ఆత్రంగా ఎదురు చూసే ఆదివారం !!
ఆడవాళ్లు ...ఒక్క ఉద్యోగినులే కాదు... ఇంటిపట్టున ఉండే గృహిణులు కూడా ఎంతగానో ఎదురుచూసే దినమిది ! పాపం అమాయకపు ఆడవాళ్లు! అల్ప సంతోషులు!నిజం ! ఆరోజు... రోజుకన్నా పనులు, శ్రమ అధికంగా ఉన్నా... అదే మీ వాళ్ల మనసుకు పట్టదు. ఏదో కాస్త తీరిగ్గా, నిదానంగా, టెన్షన్ కు దూరంగా లాగించవచ్చులే అన్న ఉద్దేశం కావచ్చువారిది !
ఇంతకీ ఆదివారం బెనిఫిట్స్... ( ఇదివరకు ఓసారి చెప్పుకున్నవే అయినా ) మళ్లీ మరోసారి చూద్దాం...
* ఆలస్యంగా నిద్రలేవచ్చు
* పిల్లల్ని త్వరగా రెడీ చేయాల్సిన పని ఉండదు.
* టిఫిన్లు, భోజనాలు.. స్పెషల్ సే అనుకోండి.. అయినా హడావుడి పడాల్సిన పని ఉండదు.
* తీరిగ్గా దినపత్రిక తిరగేయొచ్చు !
* ఆదివారం అనుబంధం ! అదో స్పెషల్! ఇంకా అదనపు ఆనందం !
* OTT లో కొత్త సినిమాలు చూడొచ్చు. అది లేని వాళ్లు! మరే మీ పరవాలేదు, విడుదలైన నెలకే ఏదో ఒక కొత్త సినిమా ప్రతీ వారం టీవీలో దర్శనమిస్తూనే ఉంటోంది ఈమధ్య ! మరింకేం? పైసా ఖర్చు లేకుండా చూసేయొచ్చు !
ఇలా పెద్ద లిస్టే ఉంటుంది.. చెప్పుకుంటూపోతే. ఇంకా నాకు తోచనివి కూడా ఉండే ఉంటాయి. మరి... ఇన్ని ఆనందాలు ఉండగా నవీన కి వచ్చిన సమస్య ఏమిటబ్బా? ఆమె గుబులు కు కారణం ఏంటి?
ఏ గడ్డు సమస్యో అనుకుంటున్నారా? అదేమీ లేదండీ.. సింపుల్.. ! రేపు.. అంటే తెల్లారితే... సోమవారం.. !! నవీన ఓ గవర్నమెంట్ ఎంప్లాయి. ఆమె బాధలూ, బాధ్యతలు ఆమెకు ఉంటాయి గా మరి! ఒక రోజంతా టెన్షన్ ఫ్రీగా గడిపేసి, మళ్లీ బిజీ లైఫ్ లోకి జొరబడాలంటే.. ఏదో చెప్పలేని అనాసక్తి.. ఆ కాస్త సోమవారం గడిస్తే చాలు, మళ్ళీ మామూలే.. !మనసు, శరీరం.. రెండూ కుదుటబడతాయి.
చదువుకునే రోజుల్లో ఇంగ్లీషు సబ్జెక్ట్ లో ఓ లెసన్ ఉండేది. Monday morning --- ఆ లెసన్ పేరు. శనివారం మధ్యాహ్నం నుండీ ఆదివారం రాత్రి దాకా తెగ ఆహ్లాదంగా గడిపేశాక, సోమవారం ఉదయం త్వరగా నిద్ర లేవాలన్నా, రెడీ అయిపోయి స్కూలుకు వెళ్లాలన్నా పిల్లలకు ఎక్కడలేని నీరసం. అమ్మ లేపినా, నాన్న లేపినా ఇంకాసేపు పడుకుంటా అంటూ మారాం చేయడం ! బళ్లో పాఠాలు వినాలన్నా, బుర్రకెక్కించు కోవాలన్నా, చదవాలన్నా తగని బద్ధకం! అబ్బా ! ఈ ఒక్క రోజు టీచర్ పాఠాలు చెప్పకపోతే ఎంత బాగుంటుంది కదా ! అనుకుంటూ అన్యమనస్కంగా ఉండడం స్కూల్ పిల్లలకు మామూలే ! అంతే, ఆ ఒక్క రోజే అలా.. మరుసటి రోజు నుండీ మళ్లీ కథ మామూలే !
అలా సోమవారం నాడు పిల్లల 'మూడ్' గురించి వివరించే లెసన్ అది ! కానీ నిజం చెప్పొద్దూ.., ఒక్క పిల్లలకేనా? గృహిణులకూ, ఉద్యోగినులకూ... ఇంకా ఇంకా.. ఇంట్లో అందరికీనూ... ఆదివారం అంటే ఎంత ఇష్టమో.... సోమవారం అంటే అంత అయిష్టం.. కష్టం !ఔనా.. కాదా.. !
ఇంట్లో అంతా ఎంజాయ్ చేస్తూ ఉన్నా నవీన చేయలేకపోవడానికి అదే కారణం మరి ! ఇంట్లో మిగతా వాళ్లకు ఇంటి పనులు, వంట పనులు ఇంకా పిల్లల పనులు.. ఇలాంటి అదనపు బాధ్యతలు ఉండవు. తనకు టీవీ చూస్తున్నా అదే ధ్యాస, అదే చింతన ! తెల్లారితే చేయాల్సినవన్నీ ఇంటాబయటా ఎదురుచూస్తూ ఉంటాయి..! అదన్నమాట సంగతి !
నాకైతే... రిటైర్ అయిపోయి ఇంతకాలమైనా... ఆదివారం ఉదయం ఎంత ఆహ్లాదంగా అనిపిస్తుందో.. సోమవారం ఉదయం అంత నిస్తేజంగా అనిపిస్తూ ఉంటుంది. నాతో పాటు రిటైరయిన నా కొలీగ్ కమలకుమారిదీ ఇదే ఫీలింగ్ ! నేనైతే ఆ ఫీలింగ్ పోగొట్టుకోవాలని ఎంతగానో ప్రయత్నిస్తుంటా గానీ... మనసు మాట వినదే... ! 🙂
*******************
No comments:
Post a Comment