లోపాలే వారి బలగం... బలం... !?

*  " భార్య అందంగా లేదనీ, తనకు నచ్చినట్లుగా నడుచుకోవట్లేదనీ విడాకులు కోరిన భర్త " !

*  " అదనపు కట్నం తేవాలంటూ భార్యను వేధిస్తూ పుట్టింటికి తరిమేసిన భర్త!"

* " భర్తకు  సంపాదన లేదంటూ నిత్యం వేధిస్తూ,సణుగుతూ సంసారాన్ని నరకం చేస్తున్న భార్య!"

* తన తాగుడుకు డబ్బులు ఇవ్వలేదని భార్యను హతమార్చిన భర్త !"

*  నిత్యం కీచులాటల్తో రోడ్డెక్కిన భార్యాభర్తలు !"

---- ప్రతిరోజు న్యూస్ పేపర్లలో ఇలాంటి వార్తలు ఎన్నో! విషయానికి వస్తే ---

   వివాహ వ్యవస్థ పై ఏ మాత్రం గౌరవమన్నది లేకుండా విలువల్ని పాటించకుండా ఒకరి  లోపాలను ఒకరు విమర్శించుకుంటూ జీవితాల్ని  నరకప్రాయం చేసుకుంటున్న దంపతులు వినాల్సిన ( చదవాల్సిన )

ఉదంతమొకటి కొద్ది రోజుల క్రితం' ఈనాడు' దినపత్రికలో చదివాను.

" దారిచూపు నువ్వు... అడుగేస్తా  నేను.." అన్న హెడ్డింగ్ తో ప్రచురితమైన ఆ వార్త ఎంతగానో ఆలోచింప చేసేదిగా అనిపించింది నాకు..

--- ఆ ఇద్దరూ భార్యాభర్తలు. భర్త పుట్టుకతోనే అంధుడు ! భార్యేమో  నడవలేదు ! అయినా సరే, వాళ్లు నిరాశానిస్పృహలకు లోనుగాలేదు. ఇద్దరి లోపాల్ని ఒకరికొకరు బలంగా భావిస్తూ, పరస్పరం సహకరించుకుంటూ జీవనయానం సాగిస్తున్నారు. ఎలాంటి పని ఎక్కడున్నా అతను సైకిల్ పై భార్యను కూర్చుండబెట్టుకొని, ఆమె దారి చూపిస్తూ ఉంటే ఎంత దూరమైనా, మరి ఎంత ఎండగా ఉన్నా సైకిల్ ని తోసుకుంటూ ఎలాంటి ఇబ్బంది లేకుండా వెళ్తాడట ! ఆ ఇద్దరిలోని లోపాలే వారి బలగం అనీ, అదే వారి బలం కూడా అనీ అందులో పేర్కొనడం జరిగింది. 

    కొంతకాలం క్రితం ఇలాంటిదే మరొకటి ! నడవలేని భార్యను భర్త తన వీపు పై మోస్తూ ఓ కార్యాలయానికి అవసరార్థం నడుస్తూ పోతున్నాడు. ఎంతటి మానవీయత ! అందులో ఎంత అవగాహన!  సహనం,  ఓర్పు ! ఇంకా అంతర్లీనంగా ఎంత ప్రేమ దాగి ఉన్నాయో కదా !!

** నిజంగా ముందుగా పేర్కొన్న భార్యాభర్తలు ఎంతగానో ఆలోచించాల్సిన విషయమిది. అన్నీ సవ్యంగా ఉన్నా ఏదో ఒక అసంతృప్తితో చిన్నచిన్న లోపాల్నే  భూతద్దంలో చూస్తూ అనవసరంగా వాటిని పెద్దవిగా చేసుకుంటూ మనశ్శాంతి పోగొట్టుకుంటూ ఉంటారు కొందరు. ఇతరులతో పోల్చుకోవడం, అందరూ తమ కంటే సుఖంగా ఉన్నారనీ, తామే దురదృష్టవంతులమనీ భావించడం ఇలాంటి వాళ్లకున్న  చెడ్డ అలవాటు. ఇంకా చెప్పాలంటే  మానసిక బలహీనత! రుగ్మత ! ఇలాంటి కోవకు చెందిన వాళ్ళు... వాళ్లు ప్రశాంతంగా ఉండరు.. పక్కన ఉన్న వాళ్ళనీ ప్రశాంతంగా ఉండనివ్వరు.

    వీళ్లంతా ఆ పైన ఉదహరించిన జంటలను చూసి నేర్చుకోవలసింది ఎంతైనా ఉంది. లోపాలు ఉండని  మనిషి ఎవరండీ?  ప్రతివారిలోనూ ఏవో కొన్ని మైనస్ లు ( బలహీనతలు) ఉండి తీరతాయి. వాటితో బాటు ప్రత్యేకతలూ ఒకటీ అరా  ఉండే ఉంటాయి. కానీ దురదృష్టమేమిటంటే --- మైనస్ లను మైక్రోస్కోప్ లో చూస్తూ ఉంటారు కాబట్టి ప్లస్ లు మరుగున పడి పోయి  కనిపించవు. అక్కడే వస్తుంది చిక్కంతా ! 

   కాస్త విచక్షణతో ఆలోచించి, విశాల దృక్పథం అలవరచుకుంటే చాలు... పరిస్థితి చక్కబడుతుంది. ఇందులకై కాసింత విజ్ఞత, విలువలకు కట్టుబడి ఉండడం దంపతులిద్దరికీ చాలా  అవసరం. అప్పుడే సంసారాలు విచ్ఛిన్నం కాకుండా కలకాలం పచ్చగా పదుగురికి ఆదర్శంగా నిలుస్తాయి... 

                     🌷🌷🌷🌷🌷🌷🌷🌷