'స్టాక్ డేల్ పారడాక్స్ '...!..? ఓ సిద్ధాంతం..

  '  స్టాక్ డేల్ పారడాక్స్ ' ! 

పేరు చాలా కొత్తగా ఉంది. నేనైతేేే ఎప్పుడూ వినలేదు. మొన్నెప్పుడో దినపత్రిక తిరగేస్తుంటే ఈ పేరు చూసి, ఆసక్తికరంగా అనిపించి, ఏదో ఆర్టికల్ లా ఉందే అనుకుంటూ చదివేశాను. చదవడం పూర్తయ్యేసరికి అదోో సిద్ధాంతమనీ నిజంగా ప్రతివారికీ ఎంతో స్ఫూర్తినిచ్చేదనీ ఇంకా ఎంతో అవసరమనీ తెలిసింది. దాని గురించి నాలుగు మాటలు రాయాలనిపించి వెంటనే కలం పట్టుకున్నాను.

    ఆ చిన్న వ్యాసం ఇలా ప్రారంభమయింది ----

 చిన్నచిన్న ఎదురు దెబ్బలకే తల్లడిల్లి పోతుంటాం. అపజయాలకు భయపడుతుంటాం. కానీ ఎంతటి విపత్కర పరిస్థితుల్లోనైనా స్థిరమైన ఆత్మస్థైర్యంతో నిలబడాలని చెప్పే ఒక విధానం గురించి మీకు తెలుసా?... అదే 'స్టాక్ డేల్ పారడాక్స్' !....

----- అలా ప్రారంభమై, దీని వెనుక ఉన్న  కథను వివరించడం జరిగింది. 

జేమ్స్ స్టాక్ డేల్ అనే అతను ఓ అమెరికన్ సైనికుడు. వియత్నాం యుద్ధంలో ఖైదీగా మరికొందరు సైనికులతో పాటు శత్రు దేశానికి చిక్కాడు. రోజులు గడుస్తున్నాయి. ఆ సమయంలో చిత్రహింసల తో నరకం అనుభవిస్తూ, బెంగతో విడుదల అవుతామన్న ఆశలు బొత్తిగా సన్నగిల్లడంతో అతని తోటి సైనికులంతా ఒక్కరొక్కరే కన్ను మూస్తున్నా జేమ్స్ మాత్రం నమ్మకాన్ని కోల్పో లేదట ! ఎప్పటికైనా ఇల్లు చేరి, తన వాళ్లను కలుసుకుంటానన్న బలమైన విశ్వాసంతో ధైర్యం కూడగట్టుకొని ఉన్న అతన్ని ఎట్టకేలకు ఏడున్నరేళ్ళకి విడుదల చేశారట ! పట్టుబడ్డ ఖైదీల్లో ఎప్పటికైనా మంచి జరుగుతుందని బలంగా నమ్మిన జేమ్స్ మాత్రమే మానసికంగా ధైర్యంగా ఉండి ప్రాణాలతో బయట పడడం జరిగిందన్న మాట ! తదుపరి కాలంలో అతను సైన్యంలో అడ్మిరల్ గా  కూడా పని చేశాడట !!

    ఇంతకీ ఈ సిద్ధాంతాన్ని ప్రతిపాదించింది జిమ్ కాలిన్స్ అనే రచయిత ! జేమ్స్  అనుభవాల ఆధారంగా ఈ 'స్టాక్ డేల్ పారడాక్స్ ' అనే సిద్ధాంతాన్ని తను రాసిన 'Good to Great ' అనే  పుస్తకం లో ప్రతిపాదించాడని ఆర్టికల్ లో తెలియజేయడం జరిగింది.

    ఇంతకీ ఈ  సూత్రం ఏమి  బోధిస్తుందంటే.... ఎలాంటి కష్ట సమయంలోనూ ధైర్యాన్ని కోల్పోకూడదు అని ! చిన్న సమస్య వచ్చినా భయపడి పోకుండా వెంటనే ఈ స్టాక్ డేల్ పారడాక్స్ సిద్ధాంతాన్ని ఓసారి మననం  చేసుకుంటే ఊరట కలిగి ఆత్మవిశ్వాసం పెంపొందుతుందని నా భావన. 

    బాగా తెలిసిన విషయమే అనిపిస్తోంది కదూ ! నిజమే! పాత సూత్రమే. మానసికంగా బలంగా ఉండేవాళ్ళు పాటిస్తూ ఉంటారు కూడా. కాకపోతే....  ప్రస్తుత గడ్డు పరిస్థితుల్లో ఇలాంటి విధానాన్ని మళ్లీమళ్లీ మననం చేసుకోవడం చాలా చాలా అవసరం అనిపిస్తోంది. చిన్న చిన్న సమస్యలకే భీతిల్లిపోతూ డిప్రెషన్ లోకి పోవడం.. ఆత్మహత్యలు చేసుకోవడం చేస్తున్న యువతకు ఇది మరీ మరీ అవసరం.

   *  భవిష్యత్తులోకి తొంగి చూడటం అలవాటు చేసుకోవాలి. ఆశావహ దృక్పథం అలవరచుకోవాలి. మంచి రోజుల కోసం నమ్మకంగా ఎదురు చూడాలి. ఏమో ! మనకోసం ఏ మంచి ఘడియలు మున్ముందు వేచి ఉన్నాయో !  అంతే కదా !! 🙂😊

                    🌷🌷🌷🌷🌷🌷🌷