ఓ ప్రాథమిక పాఠశాల ఉపాధ్యాయిని అంతరంగం.....

రేపు ( 5.9.2020 ) ఉపాధ్యాయ దినోత్సవం. ఈ శుభ సందర్భంలో ఓ ప్రాథమిక పాఠశాల ఉపాధ్యాయిని తన అంతరంగం ఇలా నివేదిస్తోంది. 

గణగణమంటూ మ్రోగే బడిగంట 

 బిలబిలమంటూ బుజ్జాయిలు పరుగులంట !

 బిరబిర మంటూ కొలువుదీరి నా ముంగిట

 కల్మషమెరుగని ఆ కిలకిల నవ్వులు 

 మిలమిల మెరిసే ఆ కళ్ళలో కాంతులు

గుసగుసగా చెప్పేవి ఎన్నెన్నో ఊసులు 

అన్నీ ఆ చిన్నారుల రేపటి కలలు !

అవి నిజాలై ఎదుట నిలిచిన క్షణాలు 

ఆ ముచ్చట వివరిస్తా వింటారా మరి 

నా మధురానుభూతుల చిరుసవ్వడులు !

రెండు దశాబ్దాల క్రితం ---

 ఐదేళ్లు నిండిన ఓ బుడతడు

 బుడి బుడి అడుగులతో దరి జేరాడు 

 బుంగమూతి పెట్టి బలపం నా చేతికిచ్చాడు 

 పలక చేతబట్టి పలికించినవన్నీ నేర్చాడు !

ఈనాడు --

ఆజానుబాహుడై అందలాలెక్కి 

నాముందు మోకరిల్లి --

అ ఆ లు దిద్దించిన మా పంతులమ్మ 

అపురూపం నాకెంతో అంటున్నా నిజమమ్మ !

వేలు పట్టి నడిపించిన చేతులమ్మ నీవి 

చేతులెత్తి నమస్సుమాంజలులర్పిస్తున్నా 

గైకొనుమమ్మా !🌷💐🌷

కుర్చీలో నేను కూర్చున్న వేళ 

సడిసేయక చెంతజేరి నా చీర కుచ్చిళ్ళు 

సవరిస్తూ కొంటెగ నవ్విన ఓ అల్లరి పిల్ల !

ముద్దుముద్దు మాటలతో మురిపాలు 

పంచిన చిన్నారి బాల !

నేడు -- 

నేను తలెత్తుకునేలా ఓ అధికారిణిగా 

ఇంతెత్తు ఎదిగి అయినా నా ముందు ఒదిగి 

అన్నది కదా --

ఎందరెందరో పాఠాలు చెప్పారు 

ఎంతెంతో విజ్ఞానాన్నందించారు 

నా మొదటి గురువునైతే 

మరిపించలేకపోయారు 

నా మదిలో చెరగని ముద్ర నీవే 

అంజలి గైకొనుమమ్మ !

అంటూ కరములు రెండూ 

జోడించింది !🌷💐🌷

( మంత్రులకూ, మాన్యులకూ, 

వైద్యులకూ, వయోవృద్ధులకూ 

ఆర్యులకూ, అధిపతులకూ 

అందని అరుదైన గౌరవం 

ఉపాధ్యాయులకే సొంతం ! )

🌹🌺🌷🌹🌺🌷🌹🌺🌷🌹🌺🌷🌹🌷🌹🌺