నిద్రను ' నిదురమ్మ ' అంటుంటాం. ఎందుకని? అమ్మ లాలన, అమ్మ ప్రేమ, అమ్మ ఆప్యాయత అన్నీ కలబోసి మన దేహాన్ని ఆవహించి స్వస్థత, సాంత్వన, ఉపశమనం-- ఇలా అన్నీ అందించి సేదదీరుస్తుందని అనుకుంటా . బాగా అలసి పోయి బడలికగా ఉన్నా, చిన్నచిన్న రుగ్మతలు బాధిస్తున్నా ఓ గంట గాఢనిద్ర లోకి జారుకుంటే చాలు అవన్నీ మటుమాయమై పోతాయి. నిద్రకింతటి మహత్తుందన్నమాట !రోజుకి ఏడు నుండి ఎనిమిది గంటల నిద్ర ఈ శరీరానికి అవసరమని చెప్తూనే ఉంటారు మరి !అలాంటి నిద్రను నిదురమ్మ అనడం ఎంత సమంజసం !ఈ విషయం మన సినీకవులు ఏనాడో గ్రహించారు కాబోలు, అలనాటి నుండీ చిత్రసీమకు ఎన్నో అమూల్యమైన గీతాల్ని సృష్టించి వాటిని భావితరాలకు కానుకగా ఇచ్చివెళ్లారనిపిస్తుంది ఆ మధురాతిమధురమైన పాటల్ని వింటుంటే.
*నిదురపోరా తమ్ముడా
నిదురపోరా తమ్ముడా
నిదురలోనా గతమునంతా
నిమిషమైనా మరిచిపోరా
కరుణలేని ఈ జగాన
కలత నిదురే మేలురా
నిదురపోరా తమ్ముడా 🐦
--- లతా మంగేష్కర్ గారి మధుర స్వరం నుండి జాలువారుతున్న ఆ పాట అమృతం కురిపిస్తున్న ట్లుగా ఉండదూ ! ఇంకా, పాట లోని భావం హృద్యంగా ఉండి మనసుల్ని కదిలించి వేస్తుంది.
" నిదురలో గతాన్ని నిమిషం పాటైనా మరిచిపో
నీడనిచ్చే నెలవు మనకు నిదురయేరా తమ్ముడా "
---- అందులో ఎంత నిజం దాగి ఉన్నదోకదా !
---- నిజమే, నిద్రపోతే కొన్ని ఆరోగ్య సమస్యల నుండి ఉపశమనం కలుగుతుంది. నిద్రలేమి దేహానికి ఎంతటి అపకారో అందరికీ తెలిసిందే.
పైన ఉదహరించిన' సంతానం' చిత్రంలోని పాటే కాదు, నిద్రకు సంబంధించిన మరపురాని మధుర గీతాలు ఇంకా ఉన్నాయి..
చిన్న పిల్లలకు తల్లులు జోల పాడటం సినిమాల్లోనే కాదు
నిత్యం నిజ జీవితాల్లో కూడా చూస్తూ ఉంటాం. ఇప్పటి సినిమాల్లో ఈ జోల పాటలు అంతగా వినిపించవుగానీ,పాత సినిమాల్లో బాగా ప్రాచుర్యం పొందినవి ఉన్నాయి. అలాంటి వాటిలో పి. సుశీల గారు పాడిన పాటలు కొన్ని ---
* చిట్టీపాపా చిరునవ్వుల పాపా
నా జాబిల్లీ నీవే బంగరుతల్లీ
గోముగ నీకు గోరుముద్దలే తినిపించేనమ్మా
ఒడినే చల్లని ఊయల చేసి లాలించేనమ్మా
చిట్టీపాపా చిరునవ్వుల పాపా 🐦
-- గారాల చిట్టి పాపకు గోరుముద్దలు తినిపిస్తూ ఇలా పాడితే ఏపాపైనా ఇట్టే నిద్రపోదా !
* కలలూ గనే వేళ ఇదే కన్నయ్యా
నిదురలో ఎంతో హాయి చిన్నయ్యా
కలత మాని తీపి నిదురా పోవయ్యా
లాలీ.. లాలీ.. లాలీ 🐦
* అత్త ఒడి పువ్వువలే మెత్తనమ్మా
ఆదమరిచి హాయిగా నిదురపోమ్మా
ఆడుకొనీ ఆడుకొనీ అలసిపోతివా
అలుపు తీర బజ్జో మా అందాలబొమ్మా 🐦
-- ఇవన్నీ ఆ కోవకు చెందినవే. ఎన్నో ఏళ్ల క్రితం వచ్చినవే
అయినా జనాల హృదయాల్లో సుస్థిరంగా నిలిచిపోయాయి.
పసిపాపల్ని నిద్రబుచ్చడానికి తల్లులు పాడే జోలపాటలు
పెద్దవాళ్ళకూ హాయిగా నిద్ర పట్టేలా చేస్తాయంటే అతిశయోక్తి గాదు. ఈ సూత్రం తెలిసిన సినిమావాళ్ళు ఆ ప్రయోగాలు కూడా చాలానే చేశారు మరి !
-- అలాంటివి కొన్ని చూద్దాం..
* కునుకు పడితె మనసు కాస్త కుదుటపడతదీ
కుదుటపడ్డ మనసు తీపి కలలు కంటది 🐦
'మూగమనసులు 'లోని ఈ పాట విననివారుంటారా? ఘంటసాల గారి స్వరం లోని ఆర్ద్రత ఆపాటకు ఎంత నిండు దనాన్నిచ్చింది !భావం సంగతి సరేసరి !
* నీలాల కన్నుల్లో మెలమెల్లగా
నిదురా రావమ్మా రావే నెమ్మదిగా రావే
నెలవంక చలువల్లు వెదజల్లగ
నిదురా రావమ్మా రావే నిండారా రావే 🐦
-- కలత చెందిన మనసుతో ఉన్న అన్నను ఓదారుస్తూ, సేదదీరేలా మృదుమధురంగా ఓ చెల్లి పాడే ఈ పాట వెన్నెలకురిసే రాత్రి వేళ ఎంత ఆహ్లాదకరంగా ఉంటుందోకదా !
* నీమది చల్లగా స్వామీ నిదురపో
దేవుని నీడలో వేదన మరిచిపో 🐦
-- కొన్ని సందర్భాల్లో భర్త కూడా భార్యకు ఓ పసివాడులా కనిపిస్తాడేమో ! మానసిక ఆందోళనతో సతమతమౌతున్నపుడు ఇలాంటి సన్నివేశాలు సహజమేకదా అనిపిస్తుంది. ' ధనమా, దైవమా ' చిత్రంలోని ఈ పాట ఓ ఆణిముత్యం !
* సడిసేయకోగాలి సడిసేయకో
బడలి ఒడిలో రాజు పవళించెనే 🐦
-- అలసిన రాజు బడలికతో ఉన్నాడు, సడి సేయకు ఓ గాలి, నిదురించనీ.... అంటూ ప్రియురాలు పాడే ఈ మృదువైన గానం లీల గారు పాడినది' రాజమకుటం 'చిత్రంలోనిది.
ఈమధ్య వచ్చిన చిత్రాల్లో ఎంతో మెలోడియస్ గా హృదయాన్ని కదిలించేలా ఉన్న ఓ చక్కని పాట నాకెంతగానో నచ్చింది. ఓనలుగురు చిన్నపిల్లలు ఓ పసివాడికి పాడే ఈ జోలపాట ' వినయవిధేయరామ ' చిత్రంలోనిది. దేవిశ్రీ ప్రసాద్ సంగీత సారధ్యంలో రూపుదిద్దుకున్న ఈ పాట ఓసారి వింటే మళ్ళీ తప్పకుండ వినాలనిపిస్తుంది.
* అమ్మా నాన్నా లేని పసివాళ్లు
అయినా అన్నీ ఉన్నోళ్లు
నింగీనేలా వీరి నేస్తాలు
కొమ్మారెమ్మా చుట్టాలు
ఈ ఆడీపాడే పాండవులు
కలతే లేనీ మహారాజులు
ఈ బంధం లేనీ బంధువులూ
కలిసుంటారంటా ఎనలేని రోజులూ
లాలిజో.. లాలిజో... లాలిజో 🐦
అప్పట్లో వచ్చినన్ని జోలపాటలు ఇప్పుడు రాకపోయినా అడపాదడపా ఇలా అరుదుగానైనా పలకరిస్తూ ఉంటాయి.
అజరామరమైన ఈ గీతాలు ఎన్నిసార్లు విన్నా మళ్ళీ మళ్ళీ వినాలనిపిస్తుంది ఎవరికైనా. నిజంగా ఆయా కవుల భావుకతకు వందనాలు సమర్పించాల్సిందే. అలాగే మధురాతిమధురమైన స్వరాలు కూర్చి వాటిని గాయనీగాయకుల గళంలో పలికించిన సంగీతకర్తలకు ప్రణమిల్లాల్సిందే.
🐦🐦🐦🐦🐦🐦🐦🐦🐦🐦🐦🐦🐦🐦🐦🐦
* భువి భావనలు *
🐦🐦🐦🐦🐦🐦🐦🐦🐦🐦🐦🐦🐦🐦🐦🐦
No comments:
Post a Comment