రుజువుకోసం నాటి చూడు నేస్తం...

విత్తనం..అతి సూక్ష్మరూపం..

అందులో ఉన్నది జీవం...

అనంతమైన శక్తి నిక్షిప్తం.

కంటికి కనిపించని మహత్తుకు అది నిలయం...  

ఊహలకందని బలానికి నిదర్శనం!! 

రుజువు కోసం నాటు నేస్తం...

నేల పొరల నడుమ ఓ విత్తనం...

అందులో నుండి ఓ మొక్క రావచ్చు..

ఆహ్లాదానిచ్చే పుష్పాలు పరిమళించవచ్చు..

నీడనిచ్చే వటవృక్షాలూ విస్తరించవచ్చు...!

ప్రకృతి నిండా పచ్చదనం పరిచేది 

ఈ వృక్షజాలమే కాదా...! అందుకే.. 

నేల పొరల నడుమ నాటు నేస్తం...ఓ విత్తనం...

చిలకరించు చారెడు జలం దినం దినం..

చూడగలవు ఓ అద్భుతం.. 

మూడు రోజుల అనంతరం....

భూమి తల్లి ఒడిని దోబూచులాడుతూ ఓ అంకురం.. 

తొలిసారి నిను చూసి కురిపిస్తుంది చిరునవ్వుల వర్షం

ఆ దరహాసం అది నీకు పలికే శుభోదయం..!

మారాకుతో అలరించిన ఆ మధుర క్షణం...

తొలిపూత పువ్వుగా మారుతున్న వైనం..!

కాయలు ఫలాలై మురిపిస్తూ సాగే ఆ పయనం..!!

అనిర్వచనీయం... అమూల్యం !!

చెబితే తీరదు మరి... అది అనుభవైకవేద్యం...

రుజువు కోసం నాటి చూడు నేస్తం..ఓ విత్తనం.. 

ఆ స్వానుభవం చెబుతుంది నీకు ఈ వాస్తవం...!!

🥀🌴🌲🌳🌴🌲🌳🪻🌻🌴🌲🌳🪻🌲🌴🌾