🌷🌷🌷🌷🌷🌷🌷
భువి భావనలు🐦
🌷🌷🌷🌷🌷🌷🌷
🌹
తెలతెలవారుతూ
తొలి కిరణాలు తాకి
ఎర్రగులాబీ విచ్చుకుంటూ
విరబూసింది మెల్లిమెల్లిగా !
వెదజల్లుతూ సౌరభాల్ని
ఆకర్షిస్తూ అందర్నీ
పలకరించింది తీయగా !
అంతలో ఏదో గుర్తొచ్చి
ఎదురుచూడసాగింది ఆశగా !
అదుగో, నిరీక్షణ ఫలించింది 🙂
అటుగా వస్తూ కనిపించిందో చిన్నారి ! 🙎
కానీ, ఆగక ముందుకు సాగింది.
స్పందన జాడలేని ఆ మోము గని
అచ్చెరువొంది ఆపి అడిగింది గులాబీ,
" పాపా, నీ నవ్వుల గలగలలెక్కడ?
ముచ్చటైన ఆ చిలుకపలుకులు
ఎక్కడ చిక్కుకున్నవి ?
తళతళ మెరిసే నీ కళ్ళు
నీళ్లతో నిండినవేమి ?
నను చూసీ నవ్వవేమి ?
చిట్టితల్లీ, దేనికి ఈ విచారం ?
బాలల దినోత్సవం కదా,
నెహ్రూ మామయ్యకు
నను కాన్కగా ఇవ్వవా ఏమి ! "
కదిలే కొమ్మల్ని ముందుకు సాచి
రారమ్మంటూ గారంగా పిలిచింది. 😊
చివ్వున తలెత్తింది చిన్నారి !!🙎
" బడులే లేవు, బాలల పండగెక్కడ ?
పంతుళ్లు రారు, పాఠాల ఊసు లేదు
నేస్తాలు లేరు, ఆటపాటలు లేవు
మొక్కుబడి చదువులు
మౌనంగా రోదిస్తూ నడుస్తున్నాయి రోజులు !
పరీక్షలు లేవు, పై తరగతులైతే ఉన్నాయి !
చదవలేము రాయలేము లెక్కలు రానేరావు
అన్నీ తీసివేతలే మిగిలాయి !
'కరోనా 'అంట !కాలనాగై కాటేసింది !
మా చిరునవ్వుల్ని చిదిమేసి
మా భవిష్యత్తును కాలరాసింది !
ఇంకెక్కడి బాలల పండగ !
ఎన్నడూ లేదంట, ఇలాంటి దురవస్థ !
అమ్మ చెప్పింది, అమ్మమ్మ చెప్పింది.. "
ఎర్రబడ్డ ఆ పాలబుగ్గల మీద
జలజలా కన్నీటి ధారలు "😔
నివ్వెరపోయి క్షణం -- మరుక్షణం
చలించిపోయింది గులాబి !
ఆపై విరిసిన ఆ పూరేకలు
ముడుచుకుపోయి మూగబోయాయి !!
************
No comments:
Post a Comment