🌷🌷🌷🌷🌷🌷🌷
భువి భావనలు🐦
🌷🌷🌷🌷🌷🌷🌷
మీరెప్పుడైనా ఇల్లు కట్టించారా? లేదా! పోనీ ఎక్కడైనా కడుతున్న ఇంటిని గమనించారా? నాకైతే కొద్ది రోజుల క్రితం నిర్మాణంలో ఉన్న ఓ ఇంటిని బాగా దగ్గరగా చూసే అవకాశం లభించింది.
" ఇల్లు కట్టి చూడు, "పెళ్లి చేసి చూడు", అని మన పెద్ద వాళ్ళు ఎందుకన్నారో నాకు అప్పుడు తెలిసి వచ్చింది. మొదలుపెట్టినప్పటి నుంచీ పూర్తయ్యేదాకా ఎన్ని రకాల అంశాలు అందులో చోటు చేసుకుంటాయో గదా అనిపించింది. వాటన్నింటిలో నన్ను బాగా ఆకర్షించింనదీ, ఎక్కువగా ఆసక్తి గొలిపినదీ ఏంటంటే-
-- అక్కడ మేస్త్రీల దగ్గర పని చేసే పని వారు! మరీ ముఖ్యంగా ఆడవాళ్ళు!తాము ఆడవాళ్ళం, శారీరకంగా బలహీనులం అన్న ఆలోచన ఏ మాత్రం దరిజేరనీయకుండా వాళ్ళు చేసే కష్టం చూస్తే నిజంగా ఆశ్చర్యం వేయక మానదు. ఇంతకీ విషయం లోకి వస్తే-
ఉదయం ఆరు ఆరున్నర కంతా పనిలోకి వస్తారు ఆడ, మగ పనివాళ్ళు. ఆడవాళ్ళయితే వచ్చేటప్పుడు ఓ మోస్తరు చీరలో చక్కగానే వస్తారు. కేవలం ఓ పది నిమిషాల్లో వాళ్ళ వేషధారణ మొత్తం మారిపోతుంది. చీరను ఎగదోపి దాని చుట్టూ ఓ పాత వస్త్రం చుట్టేసుకుని పైన ఓ షర్టు వేసుకుంటారు. ఆపై తలకో గుడ్డ కట్టుకుంటారు. అసలు పది నిమిషాల క్రితం వచ్చింది వీళ్లేనా అన్న అనుమానం వచ్చేలా ఉంటుంది వాళ్ళ ఆహార్యం ! మగవాళ్లూ దాదాపు ఇంతే. మంచి డ్రెస్ తీసేసి, పాత దుస్తులేవో వేసుకుని ఇక పనిలోకి దిగుతారు. గోడ నిర్మాణంలాంటి పనులు మగవాళ్ళు చేస్తుంటే ఆడవాళ్ళు ఇటుకలు అందించడం, ఇసుక, సిమెంటు, కంకర కలిపేసి తట్టల్లో నింపి మోయడం లాంటి పనులు చకచకా చేసేస్తుంటారు. కొందరు ఆడవాళ్లు గడ్డపారల్తో గుంతలు తవ్వడం కూడా చేస్తుంటారు. మట్టి పనులు చేయడం వాళ్లకు కరతలామలకమేమో అనిపిస్తుంది వాళ్ల నైపుణ్యం చూస్తుంటే. వాళ్లను చూస్తూ ఇంతటి శక్తి సామర్థ్యం వీళ్ళకెలా వచ్చిందబ్బా అని ఆశ్చర్యపోయాన్నేను !
కులాసాగా నవ్వుకుంటూ చలాకీగా కదులుతూ ఉంటారు అలుపన్నది తెలియకుండా ఉండేందుకో ఏమో ! పని భారం ఎక్కువైనప్పుడు ఒకరిమీద ఒకరు గయ్యి గయ్యి మంటూ అరుచుకుంటూ ఉంటారు. మళ్లీ అంతలోనే సర్దుకుని మామూలయిపోతుంటారు.
తెచ్చుకున్న భోజనాలు అందరూ గుంపుగా కూర్చుని, కబుర్లాడుకుంటూ తింటారు. కాసేపు అలా కూర్చుంటారోలేదో మళ్లీ యధాలాపంగా పనిలోకి దిగుతారు. అంతే! సాయంత్రం ఆరైనా ఆరోజు నిర్ణయింపబడిన పని పూర్తయ్యేదాకా వాళ్లకదే ధ్యాస !
వెళ్లేటప్పుడు మళ్ళీ వాళ్ళ వేషధారణ మారిపోతుంది. చుట్టుకున్న పాత వస్త్రం, వేసుకున్న షర్టు అన్నీ తీసేసి ఉదయం వచ్చేటప్పుడు ఎలా వచ్చారో అలాగే తయారైపోయి, శుభ్రంగా ఇళ్లకు కదులుతారు. రోజు అలా ముగుస్తుంది వాళ్ళకి! మరుసటిరోజు తెల్లారేసరికి మళ్లీ ప్రత్యక్షమయేవారు. ఆ విధంగా వారానికి ఐదు రోజులు శ్రమిస్తూనే ఉంటారు.
ఈ శ్రమజీవులు కార్చే చెమట ధారలే వారికి కాసులు కురిపిస్తాయి. అవే వారి జీవనాధారాలు మరి !
🌄🌄🌄🌄🌄🌄🌄🌄🌄🌄🌄🌄🌄🌄🌄🌄
No comments:
Post a Comment