Monday, April 12, 2021

ఉగాది

అదిగో కోయిల !
కుహూ కుహూ అంటూ 
వీనులవిందుగ బహుపసందుగ 
అమృతగానం కురిపిస్తూ... 

ఇదిగో మామిడికొమ్మ !
కాయల బరువుతో వంగినా 
దృఢంగా దర్పంగా కనిపిస్తూ... 

అల్లదిగో వేపమాను !
లేత పసుపురంగులో లేలేత పూతతో
అరవిచ్చిన పూరేకులతో అలరారుతూ....
రారమ్మంటూ నను పిలుస్తూ
' శ్రీ ప్లవ ' నామ వత్సరాన్ని 
 స్వాగతించమంటున్నాయి !
 కదిలే నా కలం హఠాత్తుగా ఆగిందో క్షణం!
 ఇలాంటి పలుకుల కవితా సుమాలు
 వెదజల్లే వెలుగుల కాలమా ఇది? 
'వికారి 'నంటూ 'శార్వరి 'నంటూ 
 వచ్చిన ఉగాదులు సార్థక నామధేయులై 
 మిగిల్చాయి కన్నీటిధారలు !
 వికారిగా సకల వికారాల విశృంఖల ప్రదర్శన!
 శార్వరిగా సమస్త జగతినీ ఆవరించిన చిమ్మ చీకటి!
 ఇక-- ఆహ్లాదకరమైన కవితా  గానానికి చోటెక్కడ? 
 అంటూ ప్రశ్నిస్తోంది నా అంతరంగం!

 అయినా--
 రాబోతున్నది 'ప్లవ ' నామ వత్సరం 
 ఈ అంధకారం నుండి వెలుగులోకి 
 దాటిస్తుందని నమ్ముదాం అందరం
 అందుకే --
 పండుగ వేళ నైరాశ్యాన్ని విడనాడుదాం 
 సంవత్సరాదిని మనసారా స్వాగతిద్దాం !!

🌹🌹🌹🌹🌹🌹🌹🌹🌹🌹🌹🌹🌹🌹
                  * భువి భావనలు *
🌹🌹🌹🌹🌹🌹🌹🌹🌹🌹🌹🌹🌹🌹


 

No comments:

Post a Comment