ఊహ ఎంత మధురం !

🐦🐦🐦🐦🐦🐦🐦🐦🐦🐦🐦🐦🐦🐦🐦🐦🐦🐦

🌷🌺🌹🌷🌺🌹🌷🌺🌹🌷🌺🌹🌷🌺🌹🌷🌺🌹

ఊహలకే రెక్కలొస్తే !!
నింగిని చేరి మేఘాల పరుపుపై

తేలియాడుతూ... అరమోడ్పు
కన్నులతో కలలుగంటూ...
ఎల్లలు.. భాషా భేదాలు లేని...
అవాస్తవాల్ని వాస్తవాలుగా
ఎదుట నిలిపే ఆ వినూత్న ప్రపంచం
ఆహా! ఎంత మధురం !!
ఆ క్షణాన ---
కడు బీదను తరగని పెన్నిధి
కధిపతినౌతాను !
బానిసై మగ్గుతున్న బందీని
వినువీధిని విహరించే
విహంగమౌతాను !
అనాకారిని అందాల రాణిగా...
అక్షరమే ఎరుగక అపర మేధావిగా...
నడకే రాక నాట్యమయూరిగా... 
రూపాంతరం చెందుతాను !
ప్రేమరాహిత్యంలో పగుళ్ళు వారిన
నా గుండె తలుపులు తడుతూ
రా రమ్మంటూ వేనవేల పిలుపులు... 
వినిపించేదీ ఆ క్షణాల్లోనే !!
నిరాశతో నిట్టూర్పులతో
ప్రశ్నార్థకమైన భవిత
ఆశల చివుళ్ళతో 
కొత్త ఊపిర్లు పోసుకునేదీ 
ఈ ఊహల ఊసులతోనే !!
ఓహ్ !! వర్ణించనలవికానిది !!

ఎంతటి విలక్షణ జీవన చిత్రమది !
నా భావి ప్రయాణానికి

ఇంధనం ఈ ఊహా ప్రపంచం...
అందుకే--- ఊహలకే రెక్కలొస్తే...! 
ఎంత మధురం! ఎంతెంత మధురం !!

🌺🌹🌷🌷🌹🌺🌺🌹🌷🌷🌺🌹🌷🌺🌷🌺🌷

'ఆంధ్రభూమి' వారపత్రిక 4.4.2013 లో ప్రచురితం

🌺🌷🌹🌺🌷🌹🌺🌷🌹🌺🌷🌹🌺🌷🌹🌺🌷