అందరికీ పండుగే !

                                           🌷🌷🌷🌷🌷🌷🌷

                                               భువి  భావనలు

                                            🌷🌷🌷🌷🌷🌷🌷

 బోసినవ్వుల బాపూజీ

 జాతిపిత మన  గాంధీజీ

 ఆ నవ్వులో ఏ మహత్తు దాగి ఉన్నదో !

 ఆ మాటల్లో ఏ మర్మమున్నదో !

 ఆ పిలుపే  ఓ ప్రభంజనంలా

 యావత్తు జనావళి కదిలి 

 నడిచిందాయన అడుగుజాడల్లో!

 బానిస బ్రతుకు వద్దన్నాడు

 భయం వీడి పోరాడమన్నాడు

 అహింసా మార్గం ఎంచుకున్నాడు

 దేశమాత దాస్యశృంఖలాల్ని తెంచాడు 

 మానవతా మూర్తిగా నిలిచాడు

 నిస్వార్థ  జీవి నిరంతర శ్రామికుడు

 కొల్లాయి గట్టిన ఈ  నిరాడంబరుడు

 తెల్లవారిని తరిమికొట్టిన ఘనుడు!

 భరతావని పుట్టి విశ్వవిఖ్యాతి గాంచినాడు 

 చరిత్ర పుటలకెక్కి చరితార్థుడైనాడు !

 కారణజన్ముడు మరెందునా కానరాడు!

 నా జీవితమే నా సందేశమన్నాడు !

 ఏ బిరుదు సరిపోదీ 'మహామనీషి 'కి 

' జాతిపిత' తనొక్కరే ఈ దేశానికి !

 ఆయన పుట్టిన దినం మనందరికీ పండుగ దినం

మరణం తర్వాతా జీవించడం

 మహామహులకే  సాధ్యం !!

💐💐💐💐💐💐🌹🌹🌹💐💐💐💐💐💐

ఆక్రోశిస్తున్న అంతరంగం

 ముక్కుపచ్చలారని పసిపాపల్లోనూ             

 ఆడతనాన్ని వెతికే నీచనికృష్టులు !

 తల్లి వయసు ఆడదాని లోనూ

 అమ్మను చూడలేని కామాంధులు!

 అడుగడుగునా పుట్టుకొచ్చి 

 అరాచకంగా మారిపోయి మచ్చపడ్డ 

 సమాజం ప్రస్తుతం మనది ! 

 వయోబేధాలు, వావి వరుసలు              

 ఎరుగని మానవమృగాలు ! 

 విలువలు  మరిచి వీధి వీధినీ 

 విచ్చలవిడిగా విహరిస్తూ 

 పడతులకూ, పసిపాపలకేగాదు 

 స్త్రీజాతి  మొత్తానికే రక్షణ లేదని

 నిరూపిస్తున్న నిత్యం జరుగుతున్న అకృత్యాలు!

 మృగాలతో పోలిస్తే మృగాలు సైతం 

 సిగ్గుతో తల దించుకునే దారుణ ఉదంతాలు ! 

 భారతదేశం పవిత్రతకు మారుపేరన్న 

 పరదేశీయుల ప్రగాఢ నమ్మకం 

 నానాటికీ దిగజార్చుతూ 

 పెచ్చరిల్లుతున్న పైశాచికకాండలు ! 

 ప్రత్యక్ష సాక్షులుగా నిలుస్తూ నిలదీస్తున్నాయి 

 చట్టాలకు వెరవని, శిక్షలకు లొంగని 

 కరడు గట్టిన క్రూర మానవుల 

ఈ మారణకాండలు భరించాల్సిందేనా?

భరించి సహించాల్సిందేనా? 

ఎప్పటికైనా  మారునా  ఈ మనుషుల నైజాలు !

 అసలొస్తాయా మారే ఆ రోజులు !

 నేడు  ----

 ఆక్రోశిస్తున్న ప్రతీ అంతరంగం అడుగుతున్న 

 జవాబు దొరకని ప్రశ్న ఇది !!

🌷🌷🌷🌷🌷🌷🌷🌷🌷🌷🌷🌷🌷🌷🌷

                

                 🌹భువి భావనలు 🌹

🌷🌷🌷🌷🌷🌷🌷🌷🌷🌷🌷🌷🌷🌷🌷

గురువులకు వందనం...చిన్నారులకో బాలగేయం

                                         🌺భువి భావనలు 🌺🐦

                                             ************

[ గురు పూజోత్సవం సందర్భంగా చిన్నారులకోబాలగేయం 🌷]

చదువుల బడిలో 'అ ఆ' లు 

 దేవుని గుడిలో బాజాలు

 జీవన గతిలో జేజేలు! 

 అ ఆ లు, బాజాలు, జేజేలు

 భవితకు అవియే బంగరు  బాటలు

 వెయ్ రా అడుగులు ముందుకు 

 వేరే వాదం ఎందుకు పదరా ముందుకు  " చదువుల"

 తూరుపు  దిక్కున తెల్లారేను 

 పడమటి దిక్కున పొద్దారేను 

 అటు ఇటు తిరిగి చూసేలోగా

 కాలం హరించి పోయేను 

 బుడగ వంటిదీ బ్రతుకు

 చితికేలోగా మెరుపై  మెరిసీ 

 కథగా నిలిచీ తరించి  పోరా

 వెయ్ రా అడుగులు ముందుకు

 వేరే వాదం ఎందుకు పదరా ముందుకు  " చదువుల"

 ఆడే వయసున అక్షరమాలతో

 పునాది వేసే పాఠశాలలు 

 మనిషిగ నిన్ను తీరిచిదిద్ది 

 నిలబెట్టే కళాశాలలు 

 తీర్చలేనిదా ఋణము 

 కరములు రెండూ  జోడించి

 నమస్కరించిన చాలునూ 

 వెయ్ రా అడుగులు ముందుకు

 వేరే వాదం ఎందుకు పదరా ముందుకు   " చదువుల"

 బాలలు  మీరు భావితరాలకు

 దూతలుగా వెలుగొందాలీ 

 భాషకు అందని బాధలు ఎరుగని

 మరో జగతియే జనియించాలీ 

 దీక్షా కంకణబద్ధులై

 ధీశాలురు మీరందరూ

 వెలుగూనీడల పోరాటంలో

 అదరక ముందుకు సాగాలీ 

 వెయ్ రా అడుగులు  ముందుకు 

 వేరే వాదం ఎందుకు పదరా ముందుకు " చదువుల"

😇😊😇😊😇😊😇😊😇😊😇😊😇😊😇