ఏడంతస్తులమేడ
🌺🌺🌺🌺🌺🌺🌺
అందమైన బొమ్మరిల్లు నా ఇల్లు
పూరిళ్లయితేనేమి గాక !
నాకదే ఏడంతస్తుల మేడ!
ఇది మమతానురాగాలు
వెల్లివిరిసిన చోటు
మధురమైన జ్ఞాపకాలు
నిక్షిప్తమైన ఓ నిధి !
ఇవన్నీ నా ఆత్మీయులైతే
కలతలు, కన్నీళ్లు
కష్టాలు, కడగండ్లు
వచ్చి పోయే చుట్టాలు మాత్రమే !
నా ఈ కుటీరం
నను సేదదీర్చే బృందావనం !
ముంగిట్లో ముచ్చటగా
ముత్యాల ముగ్గులు
అటూ ఇటూ అలరించే
మందారాలు, మల్లెమొగ్గలు !
అటుపై నర్తించే పలువన్నెల
సీతాకోక చిలుకలు !
అనుదినం అనుక్షణం
నను ఆహ్లాదపరుస్తోంటే
అల్లంత దూరాన పారే
సెలయేటి గలగలలు
సరిగమలై వీనులవిందులు
చేస్తూ మురిపిస్తాయి!
గాలికి ఊగే కొమ్మల రెమ్మల
వాయిద్యగోష్ఠులు
ఆపై వంత పాడుతూ
కొమ్మ చాటు కోయిల
కుహూ-కుహూ రాగాలు !
అలసిసొలసి మేను వాల్చిన నాకు
జోల పాటలై నిదురమ్మ ఒడినిజేర్చి
విశ్రమింపజేస్తాయి !!
ఇంతకన్నా వైభోగం
మరెక్కడైనా దొరకునా?
పోటీ పడగలదా దీనితో
ఏ భవంతైనా?
అందుకే --
నా ఈ కుటీరం నాకెంతో ప్రియం
పూరిల్లయితే నేమి గాక !
నాకిదే ఏడంతస్తుల మేడ !!
🌺🌺🌺🌺🌺🌺🌺🌺🌺🌺🌺🌺🌺🌺🌺
భువి భావనలు
🌺🌺🌺🌺🌺🌺🌺🌺🌺🌺🌺🌺🌺🌺🌺
No comments:
Post a Comment