పుస్తకం... నా ప్రియ నేస్తం...

.                                          

🌷🌷🌷🌷🌷🌷🌷🌷🌷🌷🌷🌷🌷🌷🌷🌷

                                            ~ యం. ధరిత్రీ దేవి 

   పుస్తకం నా ప్రియ నేస్తం...

   నాకు ప్రాణప్రదం...

   అలసిన వేళ సేదదీర్చే ఔషధం

   ఒంటరినైన...ఊరడించే నెచ్చెలి...

   తెరిస్తే చాలు... అక్షరాలు కావవి...

   అనంత కోటి ఆలోచనలు 

   కొలువుదీరిన కూటమి...!

   మేధావుల కలం నుండి జాలువారి

   చెక్కుచెదరక నిలిచిన 

   అక్షర శిల్పాలే మరి...!!

   అలరిస్తూ..మురిపిస్తూ ఒకసారి...

   నవ్విస్తూ..విషాదంలో ముంచేస్తూ

   మరోసారి... అంతలోనే...

   ఓదారుస్తూ.. నిద్రాణమైన శక్తిని 

   తట్టిలేపుతూ.. బద్ధకాన్ని వదిలిస్తూ...

   గమ్యం చూపిస్తూ.. ఆగకుమా 

   సాగిపొమ్మంటూ..వెన్నుతడుతూ 

   ముందుకు తోసే స్ఫూర్తిప్రదాతలవి !!

   హస్తభూషణం కాదు పుస్తకం...

   మస్తిష్కాన్ని మధించే 

   మహిమాన్విత ఉపకరణం..

   ఉజ్వల భవితకు సోపానాలు 

   వేసే ఉత్తమోత్తమ సాధనం...!

   విజ్ఞాన వినోదాల భాండాగారం...

   కాలక్షేపం కలగలసి..లభ్యం..

   మానసికోల్లాసం...!

   పుస్తకపఠనం..మెదడును

   పదును పెట్టే ఇంధనం...

   కావాలి దినచర్యలో అదో భాగం..

   నూతనోత్తేజానికి పడుతుందపుడే బీజం!!

   అందుకే... పుస్తకం నా ప్రియనేస్తం..

   నాకు ప్రాణప్రదం...!

🌷🌷🌷🌷🌷🌷🌷🌷🌷🌷🌷🌷🌷🌷🌷

అమ్మ గురించి పాప...

         

   🌺🌺 🌺🌺🌺🌺🌺🌺🌺🌺🌺🌺🌺🌺🌺

   పసిపాపకు పాలిచ్చి జోకొడుతూ నిద్రబుచ్చుతుంది తల్లి.అది పాలు తాగే పసిపాపల వరకే వర్తిస్తుంది. అందులో ఆ అమ్మ శ్రమ ఉంటుంది, కానీ... కొంతవరకే...! అయితే... రెండు నుండి ఐదేళ్ల పిల్లల విషయంలో  అది మాత్రమే సరిపోదు. వాళ్లకి అన్నం తినిపించడమన్నది ఆ తల్లికి...అబ్బో!! చాలా కష్టంతో కూడుకున్న తతంగమే...! ఒకచోట కూర్చోరు... ఒకచోట నిలబడరు... అటూ ఇటూ పరుగులు! దాక్కోవడాలు !! అంతేనా.. ఇంకా ఎన్నో ఎన్నెన్నో... చిలిపి చేష్టలు...! అలాగని బుజ్జి తల్లి కడుపు నింపకుండా ఆ తల్లి ఉండగలదా !

    ఎన్నో ఊసులు చెప్తుంది... ఏవేవో కబుర్లు చెప్తుంది... ఉన్నవీ లేనివీ కల్పించి కాసేపు మైమరపిస్తుంది. ఏదైతేనేం... ఆకాస్త  బువ్వ బుజ్జిదాని కడుపులోకి వెళ్లేదాక ఊరుకోదుగా...! ఆ సహనమూర్తికి జోహార్లు అర్పించాల్సిందే..!

   ప్రతి స్త్రీ తన జీవితంలో ఎదుర్కొనే ఓ తీపి అనుభవం ఇది...కాదంటారా!ఆ బుజ్జితల్లి రేపు తానూ తల్లిగా మారినపుడు..తన పాపకు అలాగే తినిపించాల్సి వచ్చినప్పుడు...ఆ తల్లికి  ఒకనాటి తన తల్లి పాట్లు, పాటలు గుర్తుకు రాక మానవు.ఒకనాటి తన అల్లరి, తల్లి మురిపెం ఆమె పెదాలపై చిరునవ్వు చిందించక మానదు.తనలో నిక్షిప్తమై దాగివున్న ఆ జ్ఞాపకాల దొంతర..అలా అలా కదిలి...ఇలా ఓ పాటగా ఎలా మారిందో వినండి... 🙂

       అమ్మ నాకు తినిపించే 

       అల్లిబిల్లి కబుర్లతో 

       ఆకాశం చూపిస్తూ 

       అపరంజిని నేనంటూ    //అమ్మ//👧

        ఇలకు దిగిన ఇలవేల్పునట 

        ఈశ్వరవరప్రసాదినట 

        ఉన్నదంత నాదంటూ 

        ఊర్వశినీ నేనంటూ        //అమ్మ//🤱

        ఎన్నడూ లేదంట 

        ఏలోటూ నాకంట 

        ఐశ్వర్యం నాదంటూ         

        ఐశ్వర్యను నేనంటూ       //అమ్మ//👧

        ఒరులెవరూ సాటిరారంట 

        ఓనాటికి నేనవనికి 

        ఔతానట మహారాణిని 👧

        అందలాలు ఎక్కేనట 

        అః !అహహ !! 

        నేనే ఒక నియంతనట !!  //అమ్మ//

🤗

   ఎప్పుడూ పాప గురించి అమ్మ చెప్పే కబుర్లేనా...! ఓసారి అమ్మ గురించి పాప చెప్పే కబుర్లు వింటే ఎలా ఉంటుంది...! ఆ ఆలోచనతో ఓ చిన్న ప్రయత్నం చేశానంతే 🙂

    తల్లి అయిన ప్రతి స్త్రీకి ఇది తప్పనిసరిగా ఎదురయ్యే అనుభవమే... మరపురాని జ్ఞాపకమే...! బిడ్డకు జోల పాడి నిద్ర బుచ్చడానికి ఆ తల్లి గొప్ప సింగరే అయి ఉండాల్సిన అవసరం లేదు కదండీ..! అమ్మ ఎలా పాడినా పాపకు ఇష్టమే. హాయిగా కళ్ళు మూసుకుని  నిమిషాల్లో నిద్రలోకి జారుకుంటుంది. అదండీ...🙂🤱

         .

    మరొక విషయం... ఈ బాల గేయాన్ని గమనిస్తే, ప్రతి లైన్  లోని మొదటి పదంలోని మొదటి అక్షరం మన తెలుగు వర్ణమాలలోని అచ్చులు... అ నుండి అః వరకు కనిపిస్తాయి. చాలా కాలం క్రితం చిన్నపిల్లల కోసం నేను రాసుకున్న పాట ఇది. ఈ పాట ప్రాథమిక పాఠశాల ఉపాధ్యాయులు తమ తరగతుల విద్యార్థులకు నేర్పించడానికి అనువుగా ఉంటుందని అభిప్రాయపడుతున్నాను. 

 అందరికీ ధన్యవాదాలు.

*******************************

 

ప్రశ్నలు... ప్రశంసలూ...

      

*****************************************

      అందరికీ ధన్యవాదాలు. ఈరోజు ఓ ఆహ్లాదకరమైన అంశం గురించి చెప్పాలనుకుంటున్నాను. ముద్దబంతి పూల గురించి మనందరికీ బాగా తెలుసు కదా.. వీటిని తలుచుకుంటే చాలు...మన తెలుగు సినిమాల్లో చాలా చాలా పాటలు గుర్తొస్తాయి కూడా..

--- ముద్దబంతిపువ్వులో మూగకళ్ల ఊసులో...

--- బంతిపూల రథాలు మా ఆడపడుచులు...

--- భామా భామా బంతీపువ్వా...

--- బంతిపూల జానకీ జానకీ...

ఇలా చాలా చాలా పాటలే ఉన్నాయి బంతిపూల మీద...

---- ఈవిధంగా సినీకవుల కలం  బంతిపూల మీదకు మళ్ళడానికి ఆ పువ్వు యొక్క ముగ్ధమనోహర అందమేనంటే అతిశయోక్తి కాదేమో!

   కన్నెపిల్లల వాలుజడల్లో ఒక్క పువ్వు పెట్టినా చాలు ఆ జడకే కొత్త అందాన్నిచ్చి అలరించే ఈ ముద్దబంతి పువ్వు ఇంతులందరికీ ఇష్టసఖి అంటే వింతేముంది!!

 ఒక్క సిగ సింగారానికేనా...! పండగపబ్బాలొస్తే చాలు...వీధుల్లో రాశులుగా దర్శనమిచ్చే ఈ పసుపు,ఎరుపు వర్ణాల బంతిపూలు మన గుమ్మాలకు తోరణాలుగా, సంప్రదాయానికి ప్రతీకలుగా నిలుస్తాయి. ఏ శుభకార్యం జరిగినా  అలంకరణలో ముందుగా కనిపించేదీ ఈ సుమబాలలే...!

   ఓ సంక్రాంతి పర్వదినాన బుట్ట నిండుగా మా ఇంటికొచ్చిన ఈ పరిమళభరిత బంతి పూలను చూడగానే...వెంటనే వాటితో మాట కలిపి,ఏవేవో ప్రశ్నలు అడగాలనిపించింది నాకు... వాటిలో మరీ ముద్దొస్తున్న ఓ పువ్వును అందుకుని మొదలెట్టాను ఇలా...🙂

ఏ తోటలోన..ఏ కొమ్మ పైన..విరబూసినావే...

ఏ దోసిలి నిండి...ఎన్నెన్ని దూరాలు నడిచొచ్చినావే 

మాకోసం విరిసీ...మాముంగిట నిలిచి 

మా ఇంట వెలుగులే వెదజల్లినావే 

బంతిపువ్వా...ఓ బంతిపువ్వా...        /ఏతోటలోన /

మా ఇంటి గడపకు పసుపునే అద్దినావు 

మామిడాకు పచ్చదనం నీకు జంట కాగా 

గుదిగుచ్చిన మాలవై గుభాలిస్తు నువ్వు 

మాఇంటి గుమ్మానికి తోరణం అయ్యావు...

బంతిపువ్వా... ఓ బంతిపువ్వా...     /ఏ తోట లోన /

ముంగిట్లో ముత్యాల ముగ్గులు 

ఆనడుమ గొబ్బెమ్మల మెరుపులు 

ఆపైని ఠీవిగ  నీ సోయగాలు 

వర్ణించ నా తరమా...ఓ పుష్పరాజమా...

బంతిపువ్వా... ఓ బంతిపువ్వా...    /ఏ తోట లోన /

వాలుజడల వయ్యారి భామలు 

ఆ సిగలో ఒదిగిన పూబంతులు 

వేయిరేకులొక్కపరి విచ్చుకున్న రీతి గనీ 

చందమామ చిన్నబోయి దాగింది చూడు మరీ...!

ముద్దరాలి ముద్దుమోము నీముందది ఏపాటి..!

నిజం నిజం... నిజం'సుమా'.. నీకు నీవె సాటి..

బంతిపువ్వా... ఓ బంతిపువ్వా...  /ఏ తోట లోన /

  🙂 

అలా చూడచక్కని ఆ ముద్దబంతి పూలపై ప్రశ్నలూ, ప్రశంసలు కురిపించాను. బదులుగా అవి ఏమివ్వగలవు చెప్పండి...! వాటి అందచందాలతో పరిమళాలు వెదజల్లుతూ మనల్ని అలరించడం, మన గృహాలకు అలంకారాలుగా మారడం తప్ప...!!

   అదండీ... ముద్దబంతి పూల ముచ్చట.. 🙂🤗

           🌺 అందరికీ ధన్యవాదాలు 🌺