🌷🌷🌷🌷🌷🌷🌷
భువి భావనలు🐦
🌷🌷🌷🌷🌷🌷🌷
" అవనీ, ఇలా అవుతుందనుకోలేదు. మా చెల్లెలు సుధ తెలుసు కదా, మూణ్ణెల్ల క్రితం తనకి ఓ సంబంధం వచ్చింది. పెళ్లిచూపులు కూడా జరిగాయి... కానీ వాళ్లు ఏ సంగతీ అప్పుడు స్పష్టంగా చెప్పలేదు. దాని గురించి అంతా మర్చిపోయాం కూడా. సడన్ గా మొన్న సాయంత్రం ఫోన్ చేసి, మీ సంబంధం మాకు ఇష్టమే, మీరూ సరేనంటే ముహూర్తాలు పెట్టుకుందాం అని చెప్పారు. అనుకోని ఆనందం ఇంట్లో చోటు చేసుకుని, అంతా వెంటనే ఓకే చెప్పారు. వాళ్లు నిన్ననే వచ్చి, ఇప్పటికే ఆలస్యం చేశామంటూ తాంబూలాలు పుచ్చుకుని వెళ్ళిపోయారు... మరో పది రోజుల్లోనే పెళ్లి!."
" సంతోషమేగా, అయితే మరి ఏంటి.? "
మధ్యలో ఆపి అడిగింది అవని.
"... అదే చెప్పబోతున్నా, ఇదంతా మొన్న నేను నీకు ఫోన్ చేశాక జరిగింది. బాగా ఆలోచించాను, మనం అనుకున్న ప్రకారం ఇప్పుడు వెళ్ళిపోవడం సబబుగా తోచలేదు. ఈ విషయం నీకు డైరెక్టుగా చెప్తే బాగుంటుందనిపించి, ఫోన్ చేయలేదు..."
తదేకంగా అతన్నే చూస్తూ ఉండిపోయింది అవని.
".. ఇప్పుడు మనం ఇలా వెళ్ళిపోయామంటే, కుదిరిన పెళ్లి కాస్తా చెడిపోతుంది. దాని జీవితం చిక్కుల్లో పడి పోతుంది... అందుకే మనం కొద్ది రోజులు.. అంటే చెల్లి పెళ్లయిపోయేదాక... ఆగుదాం.."
నాన్చుతూ విషయం బయట పెట్టేశాడు గిరీష్.మ్రాన్పడిపోయింది అవని !
" అదేంటి గిరీష్,ఇవతల నా పెళ్లి కూడా ఖాయమయిపోయింది. నాలుగు రోజుల్లో పెళ్లి. నా సంగతేంటి?.. "
" ఇంట్లో చెప్పేయ్ అవనీ, క్యాన్సిల్ చేయించు..."
వెంటనే అతని నుండి వచ్చిన ఆ మాటకు అవాక్కయిపోయింది అవని !
".. సారీ, అవనీ, ఇలా చెప్తున్నందుకు ఏమీ అనుకోకు. ఇప్పుడు మనం వెళ్ళిపోతే మా చెల్లెలి పెళ్ళి జరగడం కష్టమైపోతుంది. అమ్మ నాన్న తట్టుకోలేరు. పైగా కుదిరిన పెళ్లి ఆగిపోయింది అంటే నలుగురూ నాలుగు రకాలుగా అనుకుంటారు.. మన విషయంలో ఆ సమస్య ఉండదు. నీవు పెళ్లి క్యాన్సిల్ చేసుకున్నా మనం పెళ్లి చేసుకుంటాం.."
షాక్ తగిలినట్లుగా అచేతనంగా మారిపోయింది అవని. ఆమెలో మెల్లిగా ప్రకంపనలు! నిజమే! కుదిరిన పెళ్లి ఆగిపోయిందంటే నలుగురూ నాలుగు రకాలుగా అనుకుంటారు. మరి నాకూ ఇదే సూత్రం వర్తిస్తుంది కదా! గిరీష్ మగవాడు. అయినా ఎంతో వివేకంగా తన చెల్లి గురించి, తన కుటుంబ పరువు గురించీ ఆలోచిస్తున్నాడు. మరి, తను ఆడపిల్ల అయి ఉండీ ఈ ఇంగితం తనకు లేకుండాపోయిందే ! నాలుగు రోజుల్లో పెళ్లి పెట్టుకుని ఎవడితోనో లేచిపోయింది అనే అపవాదు తన తల్లీదండ్రీ మాత్రం భరించగలరా ! తన తర్వాత తన చెల్లి పరిస్థితి ఏమిటి?
ఇంటి నుండి బయలుదేరే ముందు అమ్మతో,
" అమ్మా, పనుంది, బయటికెళ్తున్నా " అని చెప్పింది. తను ఎక్కడికని గానీ, ఏంపని అని గానీ అడగలేదు. త్వరగా వచ్చేయ్ అని మాత్రమే అనింది. అంటే తన మీద అంత నమ్మకం అన్నమాట! తన కూతురు గాడి తప్పదన్న భరోసా! కానీ... తనేం చేసింది! మై గాడ్!
నాణేనికి బొమ్మా బొరుసు ఉన్నట్లే, గిరీష్ లో కూడా రెండు కోణాలు చూస్తోంది అవని ఇప్పుడు! తన చెల్లి గురించి, తన కుటుంబం పరువు గురించీ ఆలోచించాడు. అంతవరకూ బాగానే ఉంది, కానీ అదే సమయంలో తను ప్రేమించిన అమ్మాయి జీవితం గురించీ, ఆమె తల్లిదండ్రుల గురించీ ఏ మాత్రం ఆలోచించలేక పోతున్నాడు. అక్కడే ఏదో తేడాగా అనిపించి క్షణకాలం ఆలోచనలో పడింది అవని.
ఎంత తేలికగా చెప్పేశాడు, పెళ్లి క్యాన్సిల్ చేయించు అని ! తనను పెళ్లయితే చేసుకుంటాడట, చేతులు కాలాక ఆకులు పట్టుకున్నట్లు! కానీ చిత్రంగా, అవనికి అతనిపై కోపం రావడం లేదు, పైగా వక్రమార్గంలో అడుగులు వేయబోతున్న తనను సరైన దారిలోకి మళ్ళించడానికి వచ్చిన ఓ దూతలా కనిపిస్తున్నాడు! అందుకే అతన్నేమాత్రం తప్పు పట్టలేకపోయింది. కాస్త ఆలోచిస్తే తన వైఖరి లోనే లోపం ఉన్నట్లు తెలుసుకోవడానికి మరో క్షణం పట్టిందా అమ్మాయికి.
క్షణాల్లో ఆ పిల్ల మదిలో స్థిర నిర్ణయం చోటు చేసుకుంది. అంతే ! వెంటనే లేచి, బ్యాగ్ పట్టుకుని ముందుకు పరుగుతీసింది. ఈ హఠాత్పరిణామానికి గిరీష్ విస్తుబోయి ఆమె వెనకాలే పరిగెత్తాడు. అలా పరిగెడుతున్న అవని ఉన్నట్టుండి ఆగింది, వెనకే వస్తున్న గిరీష్ వైపు గబగబా నడిచి, అతని చేతులు పట్టుకుని,
" థాంక్యూ గిరీ, నా కళ్ళు తెరిపించావు. నీకు జన్మంతా రుణపడి ఉంటాను. బై..."
అంటూ వెళ్లబోయి, ఏదో గుర్తొచ్చి వెనక్కి తిరిగి,
".... నాలుగు రోజుల్లో నా పెళ్లి, నీకు వీలైతే తప్పకుండా రా, బై.. "
అనేసి, అవాక్కై నిల్చుండిపోయిన గిరీష్ ను అలా వదిలేసి, అటుగా వెళ్తున్న ఆటోలో ఎక్కి కూర్చుని, లోపల మాత్రం "బై ఫరెవర్ " అనుకుంది. తల్లిదండ్రుల ప్రేమ, పెంపకం, ఇంటి పరువు ప్రతిష్టల ముందు రెండు సంవత్సరాల తన ప్రేమ చాలా అల్పంగా, పేలవంగాతోస్తోందిప్పుడు ఆ అమ్మాయికి!చుట్టూ అంతా చీకట్లు ముసురుకున్నాయి. అవని మనసులో అప్పుడే వెలుగు పొడసూపడం మొదలైంది. ఇందాక బయలుదేరిన హైదరాబాద్ వెళ్లే బస్సు ఆటోను దాటుకుని వెళ్లడం గమనించిన అవని చిన్నగా నవ్వుకుంది. ఇందాక అదే బస్సు ఎక్కడానికి తను పడ్డ ఆరాటం గుర్తొచ్చిందామెకి. కొద్ది నిమిషాల్లోనే తన మానసిక స్థితిలో వచ్చిన మార్పు తలుచుకుని గుండెల మీద చెయ్యి వేసుకుని 'అమ్మయ్య' అనుకుని 'రిలాక్స్డ్' గా కళ్ళు మూసుకుంది .
*************
మరో పావుగంటలో ఇంటిముందుంది అవని. మేనత్త, పిల్లలు వచ్చినట్టున్నారు, గేట్ చప్పుడు విని, బిలబిలమంటూ బయటికి వచ్చి, అవనిని చుట్టేసి, లోపలికి తీసుకెళ్లారు. ఆ ప్రేమకూ, ఆప్యాయతకూ మనసంతా ఆర్ద్రమయిపోయిందిఅవనికి.
ఇల్లంతా సందడి సందడిగా ఉంది. నాన్న, బాబాయ్, నానమ్మ భోంచేస్తున్నారు. అమ్మ, పిన్ని వడ్డిస్తున్నారు. అంతా సంతోషంగా ఉన్నారు. ముఖ్యంగా అమ్మానాన్న. ఈ ఆనందాన్నంతా ఒక్కరోజులో సర్వ నాశనం చేయ బోయింది. భగవంతుడా! ఎంత ఉపద్రవం నుండి నన్ను కాపాడావు తండ్రీ ! గిరీష్ తో వెళ్ళిపోయుంటే మహా అయితే కొద్దిరోజుల పాటు బాగుండేదేమో! ఆ తర్వాత,..? బంధువుల గుసగుసలు, తన గురించి రకరకాల వ్యాఖ్యానాలు, తల్లిదండ్రుల కుంగుబాటు, చెల్లి దీనావస్థ...!! కుటుంబం పరువు ప్రతిష్టలు మంట గలపడంతో పాటు శాశ్వతంగా తన వాళ్ళందరికీ దూరమైపోయి... అన్నీ ఒక్కసారిగా కళ్ళ ముందు కదలాడాయి అవనికి. తలచుకుంటేనే వణుకు పుట్టింది అవనికి.
" అక్కా, ఏమిటింత లేటు? ఎక్కడికెళ్ళావ్? జాకెట్లకోసమా? రెడీ అయ్యాయా? తెచ్చేసుకున్నావా? ఏవీ, చూడనియ్.."
అక్కను చూడగానే అనిత ప్రశ్నల వర్షం కురిపిస్తూ అవని వెంటే గదిలోకి నడిచింది.
" అవన్నీ తర్వాత. ముందు పద, ఆకలి దంచేస్తోంది.."
అంటూ బ్యాగ్ బీరువా లోకి తోసేసి, వంటింట్లోకి నడిచింది అవని. వివాహం నిశ్చయం అయిన క్షణం నుండీ తిండీ, నిద్ర రెండూ కరువై స్థిమితం అన్నది లేని అవని ఆ రాత్రి కడుపారా తిని, కంటినిండా నిద్రపోయింది. అవును మరి! తను నేటితరం అతి సాధారణమైన ఆడపిల్ల!!
🌹శుభం 🌹
