Thursday, September 16, 2021

ఆక్రోశిస్తున్న అంతరంగం

 ముక్కుపచ్చలారని పసిపాపల్లోనూ             
 ఆడతనాన్ని వెతికే నీచనికృష్టులు !
 తల్లి వయసు ఆడదాని లోనూ
 అమ్మను చూడలేని కామాంధులు!
 అడుగడుగునా పుట్టుకొచ్చి 
 అరాచకంగా మారిపోయి మచ్చపడ్డ 
 సమాజం ప్రస్తుతం మనది ! 
 వయోబేధాలు, వావి వరుసలు              
 ఎరుగని మానవమృగాలు ! 
 విలువలు  మరిచి వీధి వీధినీ 
 విచ్చలవిడిగా విహరిస్తూ 
 పడతులకూ, పసిపాపలకేగాదు 
 స్త్రీజాతి  మొత్తానికే రక్షణ లేదని
 నిరూపిస్తున్న నిత్యం జరుగుతున్న అకృత్యాలు!
 మృగాలతో పోలిస్తే మృగాలు సైతం 
 సిగ్గుతో తల దించుకునే దారుణ ఉదంతాలు ! 
 భారతదేశం పవిత్రతకు మారుపేరన్న 
 పరదేశీయుల ప్రగాఢ నమ్మకం 
 నానాటికీ దిగజార్చుతూ 
 పెచ్చరిల్లుతున్న పైశాచికకాండలు ! 
 ప్రత్యక్ష సాక్షులుగా నిలుస్తూ నిలదీస్తున్నాయి 
 చట్టాలకు వెరవని, శిక్షలకు లొంగని 
 కరడు గట్టిన క్రూర మానవుల 
ఈ మారణకాండలు భరించాల్సిందేనా?
భరించి సహించాల్సిందేనా? 
ఎప్పటికైనా  మారునా  ఈ మనుషుల నైజాలు !
 అసలొస్తాయా మారే ఆ రోజులు !
 నేడు  ----
 ఆక్రోశిస్తున్న ప్రతీ అంతరంగం అడుగుతున్న 
 జవాబు దొరకని ప్రశ్న ఇది !!

🌷🌷🌷🌷🌷🌷🌷🌷🌷🌷🌷🌷🌷🌷🌷
                
                 🌹భువి భావనలు 🌹

🌷🌷🌷🌷🌷🌷🌷🌷🌷🌷🌷🌷🌷🌷🌷





No comments:

Post a Comment